تمارا

14

تمارا..

بارت14

مساء اليوم التالي..
ماسكة الورقة ومغمضة عيونها وهي بتتذكر الصباح..
لمن صِحت اول وحدة وجات تفتح  باب المطبخ..
عقدت حواجبها باستغراب وهي بتجر الورقة الفي ترباسو..
رمشت مرتين وبدت تقرا..

"تمارا
مُصطفى سيد احمد قال:
عارفني منك..
لا زمن يقدر يحوّل قلبي عنك..
لا المسافة ولا الخيال تبعدني عنك..
  
م تبكي ولا تنفسني..
لأني راجع ليكي وح اكون دايماً
زي ما حِميّد قال: 
ياما شايلك فيني حايم
في الأرض تكوين قضية
في السما الأحمر غمايم
لا اللّيالي الماها ليَّ ..
لا الشّمَاتات العليَّ ..
لا البنوك المخملية ..
لا تفاهات الحضارة ..
لا عفاريت المدينة ..
لا العمارات السّوامِق ..
فوق ضَهَر ناساً فتارى ..
لا الهتاف الفاوة ضارى ..
غطَّى بالي من الفوارق ..
لا الإلوه الطُوطَميّة ..
لا البرندات الوسيمة ..
ولا الأسامي الأجنبية ..
بتمحى من عيني ملامحِكْ ..
وإنتي جاية المغربية ..   

                                          -عُمرك"
بلعت ريقها وقرتها تاني وتالت وعاشر..
عيونها اتملو دموع..
قعدت في الارض وهي بتبكي بي حُرقة..
سافر..
عمر سافر..
من غير ما يودعها..
امبارح ليه م وراها انو د الوداع؟!..

فاقت من شرودها بي صوت عُناب البتقعد جنبها وبتقول:تمارا سِت حنان بتناديكي
تمارا عقدت حواجبها بضيق..
عُناب بس بتعاين ليها..
بي خوف..
وشفقة على حالتها..
البت من الصباح دمعتها م نشفت..
م قادرة تتكلم مع زول ولا قادرة تعمل ليهم شي اصلا..

في غرفة المُشرفات..
دقت الباب ودخلت بي خطوات ميتانة..
سِت حنان وهي بتأشر ليها على الكرسي الجنبها:تعالي ي تمارا
دخلت وقعدت في الكرسي وهي ساكتة..
سِت حنان عاينت ليها مساافة:يصل بالسلامة عمر..ادعي ليهو ربنا يوفقو ويسهل طريقو
بلعت ريقها وعيونها اتملو دموع..
سِت حنان مسحت على ضهرها:م تزعلي..افرحي لأنو ح يشوف مستقبلو
تمارا عاينت ليها:بعيد..ح يشوف مستقبلو بعيد منك ومن نقتك وكواريكك فيهو وبعيد عن الدار الانتي خانقانا فيه د
سِت حنان اتخلعت وبقت تعاين ليها..
اول مرة تمارا في حياتها تتكلم معاها بي الطريقة دي..
تمارا:ان شاء الله تكوني مبسوطة بس
سِت حنان:تمارا شكلك تعبانة
تمارا:مااا عليكيي بي..عايزة مني شنو دايرني اخت ليكي العشا ولا اعمل ليك حرجل..ولا عايزاني ارفّع ليكي الفِقر؟! اكيد عايزاني اعمل ليكي شي لي راحتك وانتي م حاسة بي النار القايدة فيني
سِت حنان عاينت ليها مسااافة:م عايزاك تعملي لي شي..عايزاكي تتعشي وتنومي عشان راحتك انتي
تمارا رمشت مرتين من غير ما تقول شي..
سِت حنان:تصبحي على خير
تمارا حركت ليها راسها من غير ما تقول شي..
وطلعت..
مسحت دموعها..
اوف ي عمر اوووف..
مشت نامت من غير ما تاكل..

صحت تاني يوم بي صوت حنينة..
زحتها منها واتلفتت على الحيطة وقعدت بتبكي..
باقي البنات طبعا مسكو الشغلة..
لكين حنونة ابت تخليها في حالها..
تلف وتجي تزن ليها..
في النهاية قامت وشالتها:نعم ي حنو في شنو؟!
حنو:انتي م تبدي
"تبكي"
تمارا:م قاعدة ابكي ي حنو في شنو؟!
حنونة:انا دعانة وعنبة م جابت لي اكل سمح زي حقك
تمارا ابتسمت:م جابت ليكي اكل سمح؟!
حنو حركت راسها نظام اي..
تمارا:طيب انا هسيي اجيب لي حنونتي اكل سمح وحلو زيها كد
حنو ضحكت وباستها في خدها مسااافة..
تمارا ضحكت وباستها في راسها..
شالتها وطلعت..
لقت الصالة هادية..
دخلت المطبخ..
لقت عشة قاعدة بتفرم في خُدرا..
تمارا:ما شاء الله اموركم زابطة
عشة:اي..انتي افطري وارجعي ارتاحي بس
تمارا:ارتاح وين من زُنان حياتي د
عشة عاينت لي حنو وضحكت:مالا قال؟!
تمارا وهي بتتحرك عشان تخت لي حنو اكل:قالت عُناب م عملت ليهة اكل سمح زي البعملو ليها انا
عشة ضحكت:ي بت هي ابت تجي جنب صينية الفطور اصلا
تمارا:عارفاها انا بتتلكك
عشة ضحكت:والله ي حنو
تمارا قعدت جنب حنو وهي شايلة الاكل..
والاتنين قدام عشة في الفرشة..
تمارا سألتها:وين فلانة وعلانة؟!
عشة:ديل عندهن صياعةً دايرات يتمنها
تمارا ابتسمت:لسه مُعلقين مع الاولاد ديكا؟!
عشة:معلقين شديد
تمارا عاينت ليها:وانتي؟!
عشة:انا شنو؟!
تمارا حركت  ليها راسها..
عشة:اههه بس..اول ما بديت احبو اتسجن
تمارا ضحكت بدون نفس
عشة عاينت ليها مسااافة..
تمارا:احسن يتسجن من يمشي يخليكي قاصد
عشة م قالت شي..
وتمارا بقت مركزة مع اكل حنو..