تمارا

17

تمارا..

بارت17

بعد مرور فترة ليست بقصيرة..
برلين..
العاصمة الألمانية..
في احد القاعات الفخمة..
مؤتمر الميكانيكا العالمي..
قاعد وبهز في رجلو بتوتر وهو بسمع في كلام كُبار تجار وإختصاصين في العالم الميكانيكا..
على قدر ما كان مُهتم بي المؤتمر وبي المعلومات الفيهو..
‏على قدر ما كان متوتر ونفسو المؤتمر ينتهي سريع سريع..

انتهى المؤتمر..
وقامو رجال الاعمال  والسُفراء يسلمو على بعض..
وطبعا بما انو اتكرم رجل الميكانيكا الاول في اخر مسابقة ميكانيكا..
كل شوية بنادوهو..
يسلم على د..
والسفير السوداني في قطر عرفو على السفير السوداني في ألمانيا..
حسن كان فخور بيهو ومُبتسم..
احساس انو د ياهو الصبي الكان شغال في الورشة..
عمر جا وقف جنبو..
حسن عاين ليهو:مبسوط ي عمر؟!
عمر عاين ليهو:بالنسبة؟!
حسن دخل يدو جوا جيب بنطلون البدلة:بي مؤتمر برلين د
عمر ابتسم وهو بدخل يدينو جوا جيوب بنطلونو:اكيد..يعني مؤتمر زي د وناس زي ديل اي زول بكون مبسوط انو بينهم
حسن:حاسي نفسك وصلتا لحلمك؟!
عمر:تؤ..انا اساسا م وصلتا لي حلمي
حسن عاين ليهو:عايز تصل لجنة التحكيم عديل ولا شنو؟!
ضحك:يمكن..م بعيد من ربنا
حسن ربت على كتفو:انا فخور بيك
ابتسم وهو بخت يدو في صدرو..

استاذن من حسن وطلع..
وقف في الحديقة القدام القاعة..
عاين حولينو..
الجو كان مخيم ومرطب كد..
مف مطرة عديل..
لكين غماام لدرجة قطرات الموية في سطوح العربات وفي صفق الشجر..
طلع علبة سجايرو من جيب الجكت الرمادي الفاخر..
ختا سجارة في خشمو وطلع الولاعة..
لمن نزل راسو عشان يولع..
سمع صوت..
كشكك كشكك..
كاميرا بتصور فيه..
عاين محل الصوت..
لقاهو شاب سوداني..
لابس بلوفر تقيل وخاتي الكاب بالمقلوب..
وشايل كاميرا..
ولمن عمر اتلفت عليهو نزلها..
ابتسم وهو قال:سيد عمر..مبسووط شديد اني لاقيتك واسف لأني صورتك من غير ما تعرف لكين اللقطة كانت عفوية جذابة
عمر ابتسم:ولا يهمك..انا مبسوط اكتر
الولد جا عليهو:انا مصعب..المصور بتاع السفير السوداني هنا
عمر صافحو:اووه ما شاء الله عليك والله
مصعب:د ولا حاجة قدام انجازاتك..نحنا كلنا فخورين شديد بيك
عمر ابتسم وهو بخت يدو في صدرو..
وهو م عارف يرد بي شنو..
مصعب:طبعا انا واصحابي تلاتة كد متابعين معاك خطوة بي خطوة..من لمن اتأهلتا للنهائي بتاع مسابقة 2024 ديك ولمن فزتا وكرموك وكلو..انبسطنا شديد انو في زول سوداني قادر يرفع علم البلاد بين اعلام كتيرة
عمر ابتسم:اقل حاجة ممكن اقدمها للسودان
مصعب ابتسم:لكين ي مان انت اختفيت كد كيف؟!..الناس دي كلها بتسأل عنك وعايزة تعرفك حتى نشاطتك في الميديا محدودة شديد
عمر:والله ياهوو..مع الجري م بكون فاضي اكون دايما اون لاين
مصعب:وطبعا اللقاءات معروفة انك م بتطلعها
عمر ضحك:هو بالله الكلام د واصل للدرجة دي
مصعب ضحك:السودان كلو والسودانين البرا كلهم عارفينك رافض تطلع لقاءات
عمر:م عارف يخي..بحسها تقيييلة كد..اقعد واتكلم انا وانا وانا
مصعب:انت م ح تتكلم عن نفسك اتكلم عن إنجازاتك وكد
عمر:تؤ..
ولع السجارة وسألو:عندك مشكلة معاها؟!
مصعب:ابدا..اخد راحتك
عمر حرك راسو وهو بسحب نفس من السجارة..
مصعب بقى يعاين ليهو مسااافة:انت قريت وين؟!
عمر عاين ليهو..
مصعب:المدرسة الاهل الجامعة او الاصحاب..انت وصلتا لي شخصيتك دي كيف؟!
عمر عاين ليهو:ولا واحد في ديل
مصعب:اها
عمر:اها شنو؟!
مصعب ضحك:يعني انا دايما لمن اشوف انجازات شركتك..انا طبعا بفتش في حسابتك في الفيس والانستا وبتاع ومتابع نقطة نقطة
عمر ضحك:د شرف عظيم لي والله
مصعب:يعم المتواضع
عمر ضحك..
مصعب كمل:لمن اشوف انجازاتك و اجي اقرا منشوارتك البسيطة الهي اصلا عبارة عن اشعار حِمّيد بسأل نفسي يعني هل الشخصية دي سبب في الانجازات ولا الانجازات هي السببت الشخصية
عمر عاين ليهو مساااافة:سؤال صعب تصدق..م حصل فكرتا فيهو
مصعب:يلا اها
عمر بفكر مسااافة:اممممم..يعني تقريبا انا من وعيت دي ياها شخصيتي وطبعا حسب الشخصية بتجي الاحلام والاهداف
مصعب:بالضبط
عمر:فااا كد معناها الانجازات ياها الجات بي سبب الشخصية صح؟!
مصعب ضحك:ايوة ايوة
عمر:بس
مصعب:طيب م ناوي ترجع السودان وتشتغل هناك؟!
عمر عاين ليهو مساااافة..
مصعب:يعني قصدي اهلك ناس بيتكم جيرانكم اكيد كلهم بكونو فخورين بيك وراجينك ترجع ليهم
عمر طوالي وشو قلب..
منو يرجاهو..
هو ولا عندو اهل ولا بيت ولا جيران..
قال:انت ي مان عايز تدردقني عشان تعمل معاي لقاء؟!
مصعب ضحك:لا لا يخ العفو..انا بدردش معاك بس لكين شكلي ح اطلع منو لقاء
عمر:اوعاا
مصعب:صورتك بس وح اكتب كلام
عمر:كلامي عني صح؟!
مصعب:م عنك عنك عديل لكين عن الحوار الدار بينا د
عمر:الهسي ونستنا دي تعتبر حوار؟!
مصعب ضحك:ما انت ما عارف..انو العظماء ونستهم العادية لقاء
عمر ابتسم:الله يخليك يخ
مصعب ضحك:طيب م ح اخد من وقتك اكتر..ح انزل صورتك في صفحتي وارسل ليك اللينك في المسنجر
عمر:طيب..مبسوط شديد اني اتكلمتا معاك ونسة خفافية ي مان
مصعب ضحك:وانا اكتر والله..الشباب ح يموتو لو عرفو اني لاقيتك
عمر ابتسم:بلغهم تحياتي نفر نفر
مصعب ضحك:يصل يا معلم
عمر صافحو بي حرارة..
ومصعب مشا..
عمر اتلفت قدامو..
اتكل في سور الحديقة وهو بشيل نفس عمييق ويختو..
مبسوط اكيد..
بي الوصل ليهو والحققو..
مبسوط بي كلمة
"فخور بيك" البتتقال ليهو اكتر من اسمو..
لكين..
زي ما قال لي حسن..
انو م وصل لاحلامو لسه..
احلامو م قروش وانو يروق لا..
احلامو ديييك..
تمارا..
والعيشة معاها..
انو يلبسها دهب..
يروقها ويخليها تلبس احسن هدوم وتركب احسن عربية..
اتنهد ودخل ولاعتو جوا جيبو..
رفع تلفونو وردا لي حسن:مرحب
حسن:عمر وين انت تعال سرعة..السفير السوداني بتاع ألمانيا طالع ومفروض تودعو انت
عمر:تمام جاي
قفل ودخل يدينو جوا جيوب الجكت واتحرك على جوة..