تمارا..
بارت8
بعد مرور يومان..
الثامنة وتسع دقايق مساءً..
واقفة في نص وبتلولي في حنينة..
وسرحانة بتفكر فيهو..
تما ال12 يوم م ظاهر..
يا رب ما يكون حصل ليهو شي..
يا رب تطمني عليهو..
في القسم..
قعد قدامو وهو بمد ليهو السجارة مولعة..
شالا:اول مرة اشوف ضابط بدي المسجون بتاعو سجاير
الضباط ضحك:انت استثناء..لأنو مفروض انت تكون الضباط وكلنا مسجونين عندك
ابتسم وهو بسحب نفس من السجارة..
الضابط:امبارح مُشرفتك قالت انها م حصل فقدت حاجة بي سببك..امنتك عديل
حرك ليهو راسو من غير ما يقول شي..
الضابط وهو بتأمل في ملامح وشو الهادية:شهادتها دي ح تساعدك كتير ي عمر
عمر بهدوء:ح تساعدني وليس تمرقني
الضابط عاين ليهو مساافة..
عمر وقف على حيلو:انت ورديتك انتهت صح؟!
الضابط وهو بقيف معاهو:اي مفروض اكون طلعتا هسي
عمر:طيب تصبح على خير
الضابط:تلاقي الخير ي عُمرابي
عمر ابتسم ليهو ومشا..
الضابط وقف يراقبو لحدي ما الشرطي فتح ليهو الزنزانة وهو دخل..
طلع من القسم وهو مصمم يطلع عمر د..
كل ما يتكلم مع عمر..
او يقعد معاهو..
بصمم زيادة انو يطلعو..
انو يساعدو بكل البقدر عليهو..
عمر رقد في الزنزانة وختا يدينو الاتنين تحت راسو..
ابتسم..
دي حركة تمارا..
بتعملها لمن تكون حزينة..
سبحان الله..
لمن تحب زول شديد لا إراديا بتلقى نفسك شايل من حركاتو..
حتى لو كان بعيد عنك..
في الدار..
راقدة نفس رقدتو..
بتفكر فيهو زي ما هو بفكر فيها..
بلعت ريقها وهي بترفع نظرها للسقف عشان توزع الدموع الفي عيونها..
وينك ي عمر؟!..
والحاصل عليك شنو؟!..
ختت يدها في قلبها لمن حست بيهو ح يقيف من خوفها عليهو..
غمضتت عيونها وهي بتستغفر..
ابتسمت وهي لسه مغمضة..
لمن اتذكرت ضحكتو..
اتذكرت احلامو..
هو قال انو ح يروق ويلبسها دهب..
هو وعدها انو ح يطلعها من الدار د..
قال انو لسه في ايام حلوة راجاهم..
قال..
ومدام قال معناها ح ينفذ القالو..
معناها لسه في امل..
ح يرجع..
ويحقق كل القالو..
بلعت ريقها وهي بتفتح عيونها..
حست نفسها شوية هِدت بي تفكيررها د..
صباح اليوم التالي..
في القسم..
ختا كباية الشاي البشرب فيها و وقف علي حيلو لمن شاف محمد (الضابط المتعاون معاهو)..
بفتح في الزنزانة وهو مبتسم:صباح الخير
عمر مشا عليهو:صباح الخير
محمد:تعال وراي
ومشا..
عمر مشا وراهو..
محمد للتمرجي:رجبب..نزل لينا كباتين شاي لبن وطلب زلابية
عمر عقد حواجبو وهو مبتسم..
محمد دخل مكتبو وقعد في الكرسين القصاد بعد..
عمر قعد قدامو:انت الليلة ورديتك بعد الضهر جاي بدري ليه؟!
محمد:ما شاء الله ملاحظتك قوية
عمر ابتسم من غير ما يقول شي..
محمد:المهم انا لقيت ليك حل لي شغلتك دي
عمر:حل شنو؟!
محمد:هو م حل جزري للموضوع لكين المهم انك ح تمرق
عمر حرك راسو لمن التمرجي جا نزل الحاجات وضاراهو من محمد..
محمد للتمرجي:تسلم ي حبوب
عمر عاين للتمرجي البطلع من الباب ورجع يعاين ل محمد وسألو:ح تعمل شنو؟!
محمد:ح اعمل محاولة خفيفة كد ولو زبطت بكرة من الصباح ح نطردك من هنا
عمر:ولو م زبطت؟!
محمد وقف الكباية جنب خشمو وعاين ليهو..
عمر:ح تتنفذ علي عقوبة السرقة صح؟!
محمد بلع ريقو وهو بتخيل انو يقطعو لعمر يدو..
نفض الفكرة من راسو وقال:ي زول بتزبط انت مالك نكدي كد؟!
عمر ابتسم ورجع بضهرو لورا..
