تمارا..
بارت9
كانت بتكنس في الحوش لمن شافتو طالع من الصالة..
وقفت كنس وبقت تعاين ليهو..
تشوفو هل ح يتكلم معاها ولا ح يطنشها زي ما كان بعمل في الايام الفاتت..
وطبعا جا ماري فيها فوو..
كأنو الحوش م فيهو زول..
بلع ريقها وهي بتشوفو بطلع من البوابة وصاري وشو..
اتنهدت بحزن ورجعت تكنس..
وقف قدام القسم وسأل البواب:الضباط محمد مداوم الليلة؟!
البواب:محمد منو؟!
عمر عاين ليهو مساافة..
صحي اسمو محمد منو؟!..
اتنهد ورجع خطوة لورا وهو بعاين للبواب..
اتلفتو وراهم لمن سمعو صوت عربية بتقيف..
عمر ابتسم وهو شايف محمد بوقف عربيتو وبنزل..
محمد طبعا نزل من عربيتو ومرا فيهم سريع وهو برفع يدو للبواب نظام صباح الخير..
اداهم نظرة سريعة وعاين قدامو..
تاني رجع عاين ليهم..
عاين لي عمر مسااافة وضحك:اووو العُمر
عمر ابتسم ليهو ورفع يدينو الاتنين..
محمد سلم عليهو:الامور والصحة
عمر:نحمدالله..انت كيف؟!
محمد:والله يخي م كسير تلج وبتاع لكين بعد شفتك جد جد اموري زبطت
عمر ضحك بخفة وم قال شي..
محمد مسكو وبقو ماشين سوا..
عمر سألو:الليلة ورديتك بالنهار؟!
محمد:تؤ..عندي شغلة خفيفة بقضاها ونطلع طوالي
عمر:نطلع وين؟!
محمد:يعني..نقعد في حتة رايقة ونتكلم
عمر عاين ليهو مساافة وم ردا..
فعلا دخلو القسم..
ومحمد خلص شغلتو وطلع..
ركبو عربية محمد..
عمر قفل الباب وهو بعاين للعربية حولينو..
محمد عاين ليهو..
عمر طوالي وراهو اسم العربية وإصدارها وسرعتها..
محمد ابتسم:انت خطير والله
عمر ابتسم:دي شغلتي يخ
محمد دور العربية:كانت شغلتك..بعدا شوف شغلة غيرها
عمر حرك ليهو راسو وهو بعاين بالشباك..
محمد وهو بلف بي شارع كد:طبعا انا م بحب جو الكافياهات والمطاعم دي ف ح اوديك حتة ح تشرب احلى قهوة في حياتك
عمر ابتسم وم قال شي..
فِهم انو محمد م عايز يوديه مطعم ويحرجو وكد..
فعلا وصلو عن سِت شاي وكد..
حتتها كان تحت ضُل شجرة كبيرة كد..
ومرشوشة وباردة كد..
محمد سلم عليها وجرا بنبرو قعد..
وجرا لي عمر بنبر..
عمر قاعد قدامو:انت متأكد انك ضابط؟!
محمد ضحك:الضُباط م بقعدو في ستات شاي ولا شنو؟!
عمر:يعني..بكونو مشغولين وبتاع
محمد:دي دعايات ساي والله
عمر ابتسم وعاين لي سِت الشاي الجابت ليهم كوز موية كبيير كد..
سألت محمد:جبنتك صح؟!
محمد:بالضبط كد+المان د ح ياخد وحدة برضو
تاني عاين لي عمر..
وقال:ولا انت ما بتشربهاا
عمر ابتسم:ممكن شاي
عمر:عليكي الله جيبي ليهو شايكك الزابط داك
الخالة ضحكت ومشت..
محمد بدا يحكي:الخالة دي بشرب عندها من قبل اخش الجامعة..وكانت بتتفهم ظروفي وممكن عادي اشرب عندها بي الايام واسدد لمن الله يديني
عمر ابتسم..
محمد:تصدق كنتا بدين منها مصاريفي عديل؟!
عمر:سبحان الله
محمد:فبس..بعد اتخرجتا وبقيت ضابط لقيت انو اقل حاجة ممكن اقدمها ليها اني احميها
عمر ابتسم وم قال شي..
محمد صفق يدينو:المهمم ي مان
عمر عاين ليهو نظام شنو؟!..
محمد:حياتك ماشة كيف؟!
عمر:حمدلله مُدقشين
محمد ابتسم على ردو..
جد جد رد زول راجل ومسؤل..
متأكد انو م ح تكون زابطة وح يكون مزنوق لكين ردو د براهو بوحي ليك قدر شنو هو انسان قوي..
فاق من تفكيرو بي صوت عمر..
وهو بسأل:انت طلعتني كيف؟!
محمد:مبدئياً ربك هو الكاتب ليك اصلا تطلع وانا بقيت سبب
عمر:حمدلله
محمد:طبعا بعد عاينتا كداا وكد ولقيت زولك د امورو زابطة وم عندنا عليهو ولا دليل
عمر حرك ليهو راسو نظام اي..
محمد:خليتو بالجنبة ومشيت طاط لي سيد الورشة المهم شبكتو ليك عمر د زي ولدك وامين ومُتربي علي يدك وجاي جاي خليتو يسحب الشكوة
عمر ضحك:بلللل
محمد ضحك:اي ي مان..قلتا اول شي نطلع المان د بعداك نشوف طريقة لي زولك داك
عمر:زولي د موضوعي معاهو طويل
محمد:مشكلتو معاك شنو؟!
عمر عاين ليهو مساافة بعدها قال:مُجاكرة بس
محمد عاين ليهو مسااافة وسألو:وهسي معاملتو معك في الدار كيف؟!..يعني م يكون بعمل ليك شي
عمر:شايفني فلانة ولا شنو؟!
محمد ضحك بصوت عالي
ست الشاي جابت ليهم حاجاتهم..
عمر ابتسم وهو بصوط في كباية الشاي..
وسألو:ليه؟!
محمد:ليه شنو؟!
عمر:صدقتني وطلعتني وهسي قاعد معاي..ليه؟؟
محمد عاين ليهو مسااافة:معارف..انا من اول يوم شفتك في القسم تصدق شفتا مستقبلك؟؟
عمر رفع حواجبو باستغراب..
محمد:شفتا راجل عظيم عندو اسمو ودورو في المجتمع..وحبيت اكون مع الزول د خطوة بخطوة
عمر ابتسم وهو بشيل نفس عمييق..
محمد:طبعا مف زول بقول ليك الكلام د واكيد ناس الملجئ بكونو شغالين فيكم تحطيم
عمر:اكيييد..لكين في زول سبقك وشاف مستقبلي د
محمد ابتسم:طيب اعتبرني تاني زول مؤمن بيك
عمر ابتسم وم قال شي..
محمد:انا طبعا طول عمري عايش ومُتربي في الطبقة المخملية..حتى إحتكاكي اصحابي كل حاجة حوليني مخملية وعيت بي قناعة انو العالم د م كعب انو اي شي حولينا حلو..الناس،البلد،الاهل وفوق ديل كلهم الدين والاسلام
عمر حرك ليهو راسو نظام اي..
محمد:فلمن وعيت شوية كد بقيت شايف انو لا..القناعة دي ما كل الناس واصلة ليها ولا كل الناس شغالة بيها
عمر بحرك ليهو راسو نظام اي..
محمد:فبقيت ساعي وان شاء الله اقدر يخي..ساعي اني اوصل القناعة دي للكُل
عمر رمش مرتين وم قال شي..
محمد:انو يخي يا شباب نحنا في امة الخيرر وبالذات السودان د معروف انو بلد الخير واهلو اهل الخير فاا ليه يعني الكئابة والبؤس؟!
عمر ضحك:طولتا شديد ما شفتا زول سوداني
محمد:عفوا..الحولينك ديل كلهم سودانين
عمر:السوداني الحقيقي ياهو البكون مؤمن بي ربو فخور بي جنسيتو وشعبو ومتفائل انو لسه الدنيا بي خيرها..لكين ناس الايام دي كلهم بقو كيف كيف
محمد ضحك وم قال شي..
عمر بقى يعاين ليهو بإعجاب..
حرفياً اول مرة يشوف زول متفائل للدرجة دي..
تابعو ونستهم..
محمد شاركو حياتو ومواقفو..
وعمر كان بسمع وبتسفيد منها..
لحدي قررريب الضهر..
قامو ومحمد ساق عمر الجامع..
صلو..
بعداك عمر وراهو انو ح يمشي..
محمد ختا يدو في ضهرو:ح نتلاقى تاني صح؟!
عمر:ي زول انت مالك ملاوز؟!
محمد:والله ملاوز يخي..خايفك تختفي وم اعرف عنك شي
عمر:لا لا ان شاء الله متواصلين
محمد:تمام..ولو احتجتا اي شي عارف القسم بوين
عمر ابتسم:يلا
محمد:يلا
ومشا..
عمر بعد مشاا مسااافة حتى اتذكر انو في مية الف مفروض كان يسددها لي سيد القروش..
منو الدفعها..
اتلفت وراهو عايز يرجع يسأل محمد..
تاني اتلفت قدامو وتابع مشيهو..
ح يسألو لمن يشوفو المرة الجاية..
