تمارا..
بارت10
بعد مرور عدة ايام..
صباحاً..
مسح قطرات الموية من حواجبو وهو بخش الصالة..
ابتسم لمن شافها قاعدة في الصالة وبتشرب في حنونة الشاي..
حست بي حركتو وعاينت ليهو..
باس خدها شدييد وقعد في الكرسي الجنبهم وهو بقول:صباح الخير
ابتسمت ليهو:صباح النور..اجيب ليك الشاي؟!
اشر ليها على كباية حنينة وهو بقول:خلصتي انتي؟!
قالت:الباقي بتشربو براها اصلا
وختت حنونة في الكرسي وادتها كبايتها وقامت دخلت المطبخ..
جابت ليهو الشاي..
ختتو قدامو وقعدت:ح تمشي لبتاع الدكان الامبارح؟!
حرك ليها راسو نظام لا وهو بشرب..
سألتو تاني:ح تشتغل في ياتو دكان طيب؟؟
عاين ليها:معارف ح اشوف
عاينت ليهو مسااافة ورفعت حواجبها الاتنين..
الفاضل جا:صباح الخير ي تيمو
عمر طق عاين ليهو..
وتمارا اتنهدت بملل من الح يحصل بعد شوية..
الفاضل قعد على كرعينو قدام كرسي حنينة وقرص خدها..
حنينة نفضت ليهو يدو..
عاين لتمارا:ممكن تكبي لي شاي؟!
تمارا كانت عايزة تقوم..
عمر:كب شايك براك
الفاضل:عفوا..في حاجة قاعدة تزنن لكين انا م سامعها
عمر ضغط اسنانو بغيظ..
الفاضل عاين لتمارا:ح تكبيهو ي حلوة؟!
تمارا بقت تعاين ليهو..
وتعاين لي عمر البحمر ليها..
وقفت علي حيلها وهي بتقول ليهو:من غير ي حلوة
ومشت المطبخ..
الفاضل عاين لعمر وهو مبتسم ابتسامة نصر..
وقام مشا ورا تمارا..
عمر ختا كباية الشاي بزهج وقام طلع..
في المطبخ تمارا عاينت للفاضل:مالك جاي وراي..كنتا ح اجيبها ليك برا
الفاضل:انتي خايفة من عمر ولا شنو؟!
نعست ليهو عيونها:حبيبي ولازم اخاف منو
الفاضل ضحك:انتو مصدقين نفسكم؟؟..ولا انتي مصدقة انو عمر د بحبك
حركت عيونها بي عيونو بغضب..
الفاضل:الولد د لا بشبهك ولا بشبه الدار د، وابشرك اول ما يلقى فرصة طلعة من هنا ح يطلع وم ح يسأل فيكي اصلا
تمارا:ح يطلعني معاهو..هو وعدني انو يطلعني
الفاضل:وانتي صدقتيه لأنك غشيمة..عمر حركاتو وكلامو د كلو عشان يصل لي حاجة وحدة وانا وانتي عارفينها كويس
بلعت ريقها بتوتر..
الفاضل:لكين بس شوفيه..في اول فرصة ح يطلع وم ح يعاين وراهو
تمارا عيونها اتملو دموع:انت م عليك بينا
الفاضل:بينا؟!..دايما بتلمي نفسك معاهو كأنكم واحد شكلك ناسية انو هو ود ناس وعارف اهلو لكين انتي نكرة
بلعت ريقها وهي بتوزع نظرها عشان دموعها م تنزل..
الفاضل:انا بنصحك لأني زيك..في النهاية انا وانتي نفس الشي لكين عمر م زينا
اتلفتت منو:م عليك بينا..بيهو وبي يعني
الفاضل:انا بوريكي بس
وشال كباية شايو وطلع..
بلعت ريقها وهي بتحاول تنظم في انفاسها عشان م تبكي..
هسي هي ذنبها شنو؟!..
ليه يعني الفاضل من الصباح يسمعها كلام يقلب ليها مودها من الصباح كد؟!..
غمضت عيونها وهي بتتذكر انو عمر كان مقاطعها اصلا..
وانو ربط استمرارية علاقتو معاها بي حاجة وحدة..
حاجة هي عارفاها كويس..
وياها نفس الحاجة الاتكلم عنها الفاضل قبل شوية..
فتحت عيونها وهي بتنفض الفكرة دي من راسها..
فكرة انو عمر م بحبها ومستمر معاها بس عشان الحاجة دي..
