تمارا..
بارت5
وفي الثُلث الأخير من الشهر الفضيل..
وآخره عتقّ من النار..
جعلنا الله وإياكم من الصوّامين القوّامين المعتوقين من النار..
ختت صحن الفول في الصينية وهي بتقول:يلا شيليها ي عشوش
عشة شالتها وهي شالت جردل العصير وطلعت وراها..
ودوهو للمشرفات..
لقو سِت فاطمة قاعدة جنب التربيزة ومنتظرة الصينية..
اول ما شافتهم قالت:سرعة ختي الصينية دي هنا وافتحي لينا الشباك د عشان نسمع الاذان
تمارا ختت العصير واتحركت على الشباك الكبير الفاتح في الشارع..
سِت حنان جات داخلة وهي متوضية قعدت جنب الصينية وقالت:امشو افطرو حممو الشفع ديل..خديجة الدلالية بتجيب بضاعتها وتجي الليلة
تمارا حركت راسها نظام طيب وقالت:يعني اخلي الغسيل يعني؟!
سِت حنان:خليهو اي غسلي بكرة ولا بعد بكرة عشان تكون غسلة العيد فت مرة
تمارا:طيب عايزة حاجة تاني؟!
سِت حنان:لا لا امشي عشان تلحقي تفطري
تمارا ابتسمت ليها ومشت..
وقبل ما تصل المطبخ الاذان اذن..
فطرت مع البنات بعداك عُناب عملت القهوة وسُهيلة وعشة لمن العدة عشان يغسلوها..
تمارا ساقت خالدة وشالت بنبرها ومشت الحمام..
بقت تحمم الشفع وترسلهم لي خالدة في الحوش تغير ليهم..
طبعا هم زي 15 شافع..
اولاد وبنات بين الخمسة سنة واكبر واحد فيهم عمر 11..
غير حنو طبعا..
حممت الصغار وخلت الكبار يستحمو براهم..
ومشت طوالي ركبت العشا..
بعداك خديجة الدلالية جابت بضاعتها..
طبعا بتجيب ملابس اطفال وسِت حنان بتشتري لي كل شافع فيهم لبسة..
عشان لو متبرع جا يوم العيد وكد يلقاهم لابسين جديد..
تمارا شالت ليها عصير وموية ومشت..
سلمت عليها..
طبعا خديجة بترديها شديد..
بعداك قعدت سِت حنان وتمارا وخديجة..
وبقو يختارو للشفع ملابس..
وينادوهم يقيسوها فيهم..
ومووضووووع..
لحدي بعد الساعة 11 حتى خلصو..
خديجة وقفت طالعة..
تمارا طلعت معاها تقدمها..
اول ما طلعو الحوش الامامي..
خديجة سألت تمارا:انا وانتي م عايزة جلباب ولا حاجة؟!
تمارا:لا والله ي خديجة..عمر ظروفو كعبة اليومين دي وم قال لي لمن خديجة تجي شيلي منها
خديجة:سمح شيلي وخليهو وقت يقدر يسدد ي بتي..انا والله كان علي اديكي حاجة سااي لكين براكي عارفة الحال
تمارا:لا والله ي خدووج م بتقصري..م مشكلة بشتري في عيد الاضحى
خديجة:الله يغطيكي ي بتي ويفتحها على عمر
تمارا:امييين ي خدوج
بعداك خديجة ودعتها ومشت..
تمارا دخلت المطبخ طوالي وبدت في موضوع العشا..
خلصتو وغسلت العدة لأنو البنات قالو فترانات الليلة..
شالت حنو وطلعت بيها السطوح..
شوية كد وحنو نامت..
بقت تعاين ليها..
جميلة شديد حنو دي..
حلبية و وشها مدور..
وحواجبها غُزار ورموشها طوال..
ابتسمت:شكلك بت ناس مرتاحين ي حنينة
اتنهدت بي حزن على حالتها..
اتخيل تتولد وتكبر وانت م عارف اصلا اهلك منو ولا عاملين كيف..
م تكون عارف جنسك شنو اساسا..
باست راس حنو..
حست بي زول بجي..
عاينت ولقتو د عمر..
ابتسمت ليهو..
باس راسها وقعد:حبيبي
قالت:مشتاقين وكد
ضحك:كتيير وكد
ابتسمت ورجعت تعاين ل حنو..
عاين لحنينة وسألها:مالا عيانة؟!
حركت ليهو راسها نظام لا وهي بتقول:ساي قلتا اجيب انومها هنا
ابتسم وم قال شي..
قالت:عمر عاين ليها حلاتا كيف..شكلها بت راحات
عاين لي حنو ورجع يعاين ليها وقال:اي زول حلاتو ود راحات؟!
قالت:م بعرف..حاسة انو الناس المروقين ديل بكونو حلوين
تكل ضهرو لورا وهو بقول:م شرط..في ناس مروقين لكين م حلوين وفي ناس حلويين لكين م مروقين
عاينت ليهو مساافة بعدها قالت:بالجد؟!
قال:اي والله..انتي بس عشان م بتشوفي اصناف من البشر بتقولي كد
ابتسمت:امممممم
سألها:م نفسك تطلعي؟!
قالت:اطلع احوم يعني؟!
صلح قعدتو:تؤ..تطلعي تعيشي برا الدار
عاينت ليهو مساافة بعدها قالت:بخاف
عقد حواجبو باستغراب:تخافي من شنو؟!
قالت:من برا..العالم برا كبير شديد ومخيف ي عمر الناس م بتحترم بعض ولا عندهم رأفة بي بعض
قال:بتقولي كد عشان عمرك م عشتي برا..انتي شايفة بؤس الدار ومتخيلة انو العالم ح يكون زيو لكين ع اوسع
قالت:اي اصلا حاسة كد..انو اي حاجة كعبة هنا برا في اضعاف منها
ابتسم وهو بقول:م شفتي برا بس..برا في حاجات كتيرة حلوة
اتنهدت وم قالت شي..
جراها لي حضنو..
وهطت راسها وهي بتقول:زمان اول ما وعيت..كنتا خايفة من هنا..كنتا بصحى قبل 6 عشان سِت حنان م تجي تصحينها بالخرطوش لا بجري لا بلعب بس بكون قاعدة ساكت اليوم كلو عشان شايفة الاطفال المعاي لمن يلعبو ويغلطو بدقوهم وبعاقبوهم في الشمس
رمش مرتين وهو بسمع في طفولتها الكانت قبل هو يجي..
تمت كلامها:كان ماسكانا وحدة اسمها سِت بلقيس سِت حنان المساعدة..سِت بلقيس ديك كانت قرصتها حارة يخي ولو لقت واحد فينا هدومو فيها حبة غبار بتوقفو في الشمس بالساعات وانا طبعا كنتا بخاف منها لدرجة بكبس بيها بليل
ضحك بخفة:للدرجة دي
عاينت ليهو وقالت:اي والله ي عمر..يخي شكلها كان مخيف جد جد
قال:متذكرها اي..اول سنة جيت فيها كانت قاعدة
قالت:اي وبعداك نزلوها معاش
قال:وجات سِت زفتان
قالت:هئا..وجيت انت بقيت انوم لحدي الشمس ما تشرق لأنو عارفاك م ح تخلي سِت حنان تصحيني بالخرطوش
ابتسم وهو بتذكر ايام كان بحرسها لحدي ما تصحى داك..
صلحت راس حنونة في يدها وهي بتقول:بقيت م بخاف من اي شي لأنك هنا
باس راسها من غير ما يقول شي..
قعدت علي حيلها وقالت:عمر انا نفسي نقدم لي حنونة نفس الامان القدمتو لي انت
عاين لي حنينة:لكين الدار اتصلح م زي زمان
قالت:يمكن عشان نحنا كبرنا وبقينا واعين..لكين انا متأكدة انو الشفع ديل بكونو خايفين هسي
مرر يدو في خد حنينة:طيب م ح نخليها تخاف من شي..ح نأمنها ان شاء الله
ابتسمت:ح تأمنا انت..تأمنا انا وهي
ضحك:تمام م عندك مشكلة
ضحكت..
رقدت كد تاني سألتو:هي سجمي..انتي م ماكل صح؟!
حرك راسو:ح اكل وين يعني؟!
رفعت راسها من صدرو:دقايق طيب اودي حنونة واجيب ليك الاكل
قال:جيبي انزلها عشان الضلام
ابتسمت وادتها ليهو..
نزل ونزلت وراهو..
طبعا السلم ضلام..
هو طوالي اتجه على الغرفة عشان يختها في سرير تمارا..
دخل ودخلت وراهو..
ختاهو وغطاها بالتوب..
اتلفت لقاها واقفة ومبتسمة ليهو..
همس ليها بي صوت واطي عشان باقي البنات نايمين:مالك؟!
حركت راسها وقبل تتكلم..
سمعو صوت شخير بي صوت عااالي..
عمر اتلفت حولينو بخلعة..
تمارا ختت يدينها الاتنين في خشمها عشان م تضحك وتصحي البنات..
تاني شخرو بصوت عالي..
عمر همس بخلعة:يا إلهي
ضحكت بدون صوت وهي بتجرو ويطلعو من الغرفة..
ومن طلعو الصالة فكو الضحكة..
خشت المطبخ وهي بتضحك..
خشا وراها وهو بسألها:ديل بتنومي معاهم كيف ديل؟!
مشت على الحلة القاعدة فوق البتوجاز وهي بتقول:عادي اصلا نومي تقيل
قعد في البنبر وهو بقول:اي لكين لحدي ما تنومي مشكلة
قالت وهي بتولع في البتوجاز:بكون فترانة وراقدة سلطة
ابتسم وهو بجر في الحبل الفي البنبر..
قال وهي بتصوط في الحلة:طبعا فطورنا كان فول لكين الطمام خلص
اتلفتت عليهو:اعمل ليك شطة؟؟
قبل يرد سمعو صوت بقول:م ضروري ممكن تختيها قرون
عمر ابتسامتو اختفت وقلب عيونو..
تمارا اتلفتت عاينت ليهو ورجعت تعاين في حلتها..
الفاضل جا عليها..
عمر قاعد في البنبر وبعاين ليهو بغضب..
الفاضل:تيمو انا جعان ممكن تختي لي اكل مع عمر؟!
تمارا عاينت ليهو وعاينت لعمر وقالت:ح اخت ليك
عمر:براو..م ياكل معاي
الفاضل اتلفت عليهو:ليه ي عمرابي يخ
عمر لوا خشمو بزهج وم قال شي..
الفاضل اتكل في الانبوبة وهو بعاين ليهو باستفزاز..
وتمارا رجعت تخت الاكل..
ختتو في صحنين طبعا..
كانت بتكب في الزيت لمن الفاضل سأل عمر:مالك ي مان ضعفتا كد..بتشرب بنقو ولا شنو؟!
اتلفتت على عمر..
عمر:شغال وكد..م بتصايع مع كافي لي كافي
الفاضل ضحك:انت حصل مشيت كافي؟!
عمر:ولا عايز امشي اصلا
تمارا ختت لي الفاضل صحنو في الفرن قدامو:هاك
وشالت صحن عمر معاهو كيس عيش وقالت:ح تاكل فوق صح؟!
عمر وقف علي حيلو:اي ارح
طلعت وعمر طلع وراها بعد دا ادا الفاضل تحميرة..
الفاضل شات البنبر الكان قاعد فيه عمر وهو بقول:انا بوريكم يا اولااد ال.....
