تمارا..
بارت16
عدت الايام..
محمد وعمر ياهو بتلاقو وبتونسو ولفو وعمر إشترا لي ود محمد هدايا..
بعد اسبوعين محمد خلص شغل وبقى راجع..
وقف العربية قدام باب المطار ونزل بسرعة..
دخل وهو مستعجل..
لحق محمد قريب لصالة المغادرة..
نادهو:محمد
محمد اتلفت عليهو..
ابتسم لمن شافو وجا عليهو..
عمر:معليش يخي..والله جاري من الصباح ويداب خلصتا
محمد ابتسم:م حنك ي مان..اها امورك زبطت؟!
عمر:زبطت حمدلله
محمد:حمدلله وان شاء الله دايما زابطة
عمر عاين ليهو مساافة:والله ح تمسخ لي البلد
محمد ابتسم:بنتلاقى بأذن الله
عمر:ان شاء الله
محمد:يلا المرة الجاية عايز اشوفك هناك
عمر ابتسم:ان شاء الله
حضنو مسااافة وفكاهو..
مشا..
اتلفت لوح ليهو..
وعمر لوح ليهو..
بلع ريقو وهو بطلع من المطار..
حرفيا قعدة محمد معاهو خلتو يفرفش وهسي ح يرجع يكتئب..
اتنهد وهو برفع تلفونو البدق..
وكان حسن..
اكيد عايزو لشغل..
ردا وهو بركب عربيتو..
رجع لحياتو..
الكلها شغل..
وفاضية من اي نوع من المشاعر..
بعد مرور وقت طويل..
السودان..
الخرطوم الدار..
حست اضانها صنت وبقت م سامعة شي..
م شايفة غير عمو بلال ومعاهو ولدين شايلين جثمان سِت حنان..
و وراهم سِت فاطمة بتبكي..
عُناب هزتها:تمارا امسكيهم تمارا ديل سايقين سِت حنان..تمارااا
وقعت في الارض وهي حاسة دموعها بتتسابق من عيونها..
سِت حنان ماتت كيف يعني؟!
هسي الصباح كانت كويسة..
تِعبت شوية و ودوها المركز القريب..
على اساس انهم ح يدوها درب الهبوط وترجع..
لكين لا..
رجع جسد بلا روح..
ختت يدينها الاتنين في راسها وهي بتبكي..
سُهيلة وعشة جنبها بمنحو..
وعُناب بتلولح في الارض وهي بتقول:واييي ي سِت وااييي..واي يا امنا ويا ضُلناا..تاني منو البهرشنا..منو البضحكناا..منو بدينا عيدية..كُرعليناااا واييي
تمارا حضنتها..
عُناب:واي ي تمارا كر علينا ي تماراا..الله ليناا ي تمارااا
وتمارا تبكيييي..
سِت فاطمة رسلت ليهم واحد من الشفع عشان يجو يدوها العفو..
ساقو بعض الاربعة..
خشو غرفتها..
سِت فاطمة كانت بتتكلم بالتلفون عشان يجهزو العربية..
عاينت ليهو:ي بنات ودعوها سريع عشان ح نمشي ندفنها في بلدهم
عشة وسُهيلة وعُناب اترمو جنبها وبقو يبكو..
باسو راسها وكرعينها..
سِت فاطمة ختت يدها في ضهر تمارا..
تمارا عاينت ليها بخلعة..
اشرت ليها نظام امشي..
مشت عليها بي خطوات بطيئة..
قعدت جنب راسها براحة..
مسكتو بي يدينها الاتنين..
قرت اية الكرسي والمعوذتين وكم اية من سورة يس..
باست راسها لمن دموعها نزلو في الكفن..
قالت بصوت مهزوز بالبكى:العفو والعافية ي سِت..ربي يرحمك ويسكنك فسيح جناته
حضنتها..
بكت وهي بتتذكر كل مواقفها معاها..
لمن تهرشها وتمارا تجري منها..
ولمن تناديها عشان ترفع ليها الفِقر..
لمن تجيب ليها الحرجل..
وتمسح ليها راسها بالزيت..
لمن تضحك معاها..
ولمن تجي يوم العيد تحضن الشفع كلهم سوا..
يمكن فعلا كانت شديدة وصارمة..
لكين اكيد بدون شك كلهم بحبوها وبعتبروها امهم..
شالو الجثمان..
والبنات ديل قلبو الدار عديل..
طبعا براهم..
الشفع بس وافقين وبعاينو ليهم..
م فاهمين ولا مستوعبين عظمة الموت..
والفاهمين منهم ماسكين بعض وببكو..
وصولها لحدي البوابة..
في البوابة سِت فاطمة مسكت تمارا:تمارا ابقى عشرة على الدار لحدي ما اجي
تمارا حركت ليها راسها وهي بتبكي..
ركبوها في البوكس وسِت فاطمة ركبت قدام وهي بتبكي..
عمو بلال رجع لورا خطوى من البوكس وهو بردد:لا إله إلا الله
تمارا ببب وقعت في الارض..
عُناب وعشة وسُهيلة جو وقعو جنب كرعينها وهم ببكو..
والشفع كلهمم اتلمو فيها..
حاولت تحاوطهم بي يدينها وم قدرت لأنهم كتار طبعا..
بكت وهي بتعاين للشمس الفي نص السما وبتقول:يا ربي تصبرني..يا رب لطفك
عدو يومهم داك كلو ببكو طبعا..
ختو للشفع وجبة وااحدة بس المغرب..
واول ما بدو ياكلو كد المطرة صبت..
والكهربا قطعت..
وطبعا مطرة بي رعد وبرق وحاجة كد مخيفة شديد..
بقو كلهم قاعدين في المطبخ..
تمارا ماسكة حنو وشافعين..
وعُناب ماسكة كم شافع..
سُهيلة وعشة ماسكين بعض وراقدين في كرعينهم كم شافع..
وببكو..
كلهم ببكو..
الكبار ببكو من موت امهم ومشرفتهم..
والصغار ببكو من الخوف..
شوية كد وسمعو صوت باب الصالة البرا بضرب..
تمارا عاينت لي عشة:م قفلتي باب الصالة انتي؟!
عشة:قلتا لي سُهيلة تقفلو
سُهيلة:قفلتو انا لكين م عارفة الفتحو شنو
تمارا اتنهدت بحزن..
رقدت حنو في الفرشة و وقفت علي حيلها وهي بتمسح في دموعها..
عشة وقفت معاها:اقيفي جاية معاك
مش بي خطوات خايفة وعشة وراها..
طبعا الصالات مُضلمة..
لمن وصلو في نص الصالة القدام المطبخ حسو بي حركة معاهم في الصالة..
عشة مسكت تمارا بي خوف..
تمارا:منو؟!..في منو هنا؟!
طقق ولع ليهم فلاش تلفونو..
الفلاش كان ضعييف ويداب ظاهر جزو من وشو..
تمارا رمشت مرتين بخلعة..
معقول يكون هو؟!..
عشة:الفاضل؟!
حرك ليها راسها نظام اي وهو مقادر يتكلم..
عشة جرت حضنتو..
جدع تلفونو وهو بحاوطها بي يدينو..
عشة بقت تبكي بي صوت:الفاضل م شفتا حصل شنو الفاضل سِت حنان ماتت يا الفاضل..خلتنا برانا ي الفاضل
تمارا ختت يدينها في راسها وهي بتتكل في الحيطة الجنبها..
بي صوت عشة..
عُناب وسُهيلة جرو طالعين..
وطبعا طوالي حضنو الفاضل وبقو يبكو..
وهو يبكي..
بعد اخدو بكيتهم..
فكوهو..
سلم عليهم واحدة واحدة..
كلهم بقو يعاينو لي تمارا..
نظام تعالي سلمي..
تمارا جات عليهم..
حضنت الفاضل وبكت..
وهو بكى..
بعداك قعد في الصالة وجنبو عشة..
وبي شمالو سُهيلة..
وعُناب وتمارا في الكنبة التانية..
وحولينهم الشفع..
سألهم:سِت حنان كانت عيانة!
عشة بدت تحكي ليهو:م عيانة والله بس الصباح هبطت وشالوها المركز..نحنا قلنا ح تاخد الدرب وتجي لكين..
بكت..
الفاضل مسح ضهرها..
عاين ليهو واحد واحد تاني سألهم:عمر وين؟!
كلهم عاينو لتمارا..
تمارا بلعت ريقها وقالت بصوت باكي:عمر مافيش ليهو 3 سنة
الفاضل صرا وشو..
ختا يدينو الاتنين في راسو وهو بجي لي قدام..
بدا يحكي ليهم:انا قاعد في المثلث لي قريب سنة وم بجي هنا الا اكون عايز اشتري حاجات..جيت لي اسبوع ومفروض ارجع من امبارح لكين العربية اتأخرت
عاين ليهم وقال:يمكن اتأخرت لي حكمة اني احضر موتة سِت حنان الله يرحمها
اشرو بي رسينهم:الله يرحمها
بعدها بقو قاعدين لحدي ما المطرة وقفت..
الكهربا جات..
تمارا دخلت تفرش المراتب في غرفة الشفع..
اثناء ما بتفرش فيهم جا الفاضل داخل وهو شايل واحد من الشفع..
ختاهو وعاين ليها..
وهي بتعاين ليهو..
طلعت خلتو..
بقو كلهم ينقلو في الشفع النامو من الصالة لي سرايرهم..
بعد انتهو عشة مشت المطبخ تخت للفاضل اكل..
تمارا دخلت الحمام وطلعت وقفت في الوضاية عشان تتوضى..
الفاضل جا مارق..
عاين ليها..
عاينت ليهو..
سألها:اخبارك شنو؟!
تمارا:زي ما شايف..عايشة
قعد في وحدة من مقاعد الوضاية:عمر اخبارو شنو؟!
تمارا:م عارفة عنو شي
الفاضل:كيف يعني؟!
تمارا:زي ما بقول ليك..من يوم سافر م سمعتا عنو شي تاني
الفاضل اتنهد..
تمارا قعدت في المقعد التاني:يمكن كلامك الكنتا بتقولو صاح..بالجد هو م بشبهني ولا بنتمي للدار د واهو مشا ونساني في اول فرصة لقاني
الفاضل لوا خشمو بحزن وم قال شي..
تمارا عاينت ليهو:انت عملتا شنو؟!
ابتسم:طلعتا من السجن قبل سنتين..بقيت ادقش جاي وجاي ويداب استقريت في شغل في المثلث
سألتو:المثلث د شنو؟!
قال:حدود ليبيا
حركت راسها:امممم
قال:اي اي
عاينت ليهو..
كان لابس على الله لونها رمادي غامق..
ولافي شال اسود في راسو ونازل جزو منو في عيونو..
ولحيتو كثيفة وم مرتبة..
عاين ليها:بقيتي حلوة
ابتسمت:وانت بقيت غريب
عاين ليها:من الشفتو والحياة
اتنهدت:معليش
قال:على؟؟
قالت:انو عمر حبسك وكد
ضحك:دي تصفية حسابات بينا
عقدت حواجبها باستغراب..
قال:اوريك سر بيني وبينك..و سِت..
قطع كلامو:الله يرحمها سِت حنان م عارفاهو
حركت راسها نظام اي..
قال:متذكرة لمن اتحبس 15 يوم؟!
قالت:اي
قال:كنتا حبستو وهو اتسدا حقو
عقدت حواجبها:حبستوو ليه؟!
ضحك:سِر المهنة ي زولة..المهم هو اخد حقو
اتنهدت:ونحنا كنا بنشاكلو..حتى سِت حنان ادتو كف عديل
ابتسم:اي انا وريتها انو حبسني
عاينت ليهو مساافة:وهو م قال انك حبستو
حرك راسو:ياهو عمر وطبعو
اتنهدت:فعلا
قال:لكين والله عمر د زول كارب
قالت:البسمعك بقول بتريدو
ضحك:بريدو والله..لكين م كنتا فاهم الريدة دي ولا عارف قيمتها لحدي ما افترقنا بقيت مشتاق لي شوفتو ونفسي بس احضنو تاني
بلعت ريقها وهي بتبسم بألم..
عاين ليها وقال:طبعا نعمة العيشة في الدار دي انتو م ح تحسو بيها..كونك قاعد هنا بتاكل وبتشرب وسط ناسك كورايك سِت حنان من الصباح فيك دي براها بالدنيا
ابتسمت:بقولووو..الزول م بعرف قيمة الحاجة الا بعد يفقدها
قال:بالضبط كد..فعلا ايام كنا عايشين كلنا هنا كانت احلى ايام والله
حركت راسها من غير ما تقول شي..
عاين ليها مسافة وقال:واكيد انتي هسي فاقدة عمر ومشتاقة ليهو..ولا زعلانة منو؟!
عاينت ليهو مسااافة:مبعرف زاتي..زعلانة ولا مشتاقة ليهو
عاين ليها مسااافة وقبل يرد عشة جاتهم..
عاينت لي تمارا مسااافة بعدها قالت:الفاضل ختيت ليك العشا
حرك راسو:تمام جاي
مشت وهو دخل الحمام.
تمارا بدت تتوضى وهي بتتذكر..
يوم عرفت انو عمر حبس الفاضل..
وكوركت فيهو وقال ليها د حقي..
يوم سِت حنان ادتو كف..
وهو سكت ولا وراها اصلا انو الفاضل زمان حبسو..
قلبها وجعها..
يا الله ي عمر..
حتى وانت بعيد واجع قلبي..
