تمارا..
بارت 2
مساءً..
قُبيل الإفطار ب بضع دقائق..
لفى دخل بي واحد من الشوارع الضيقة البتودي للدار..
مُدخل يدينو حوا جيبو وهو عاقد حواجبو..
بتذكر كلامو مع صاحب الركشة الهو كان سايقها..
:عمر معليش لكين الشغلة دي بالجد كد م بتزبط..انت عارف انا بعزك قدر شنو ولو بي يدي كنتا اصلا م ح اطلب منك حاجة زي دي لكين جد كد..
قاطعو وهو بقول:ولا يهمك ي ود عمك..اديني بس يومين وانا ح اكون جهزتا قروشي وح اقدر اصلحا ليك
اتنهد التاني:تمام
ابتسم عمر من غير يقول شي..
اتنهد..
ح يجيب قروش صيانة الركشة من وين؟؟..
وهو اصلا شغلو في الورشة م بطلع ليهو مصروف زي الناس..
وكان بسوق ركشة من واحد كد بعرفو وهسي ليها يومين عِطلت..
وعِطلت في يدو وبقى هو مُلزم انو يصلحها..
وكان عندو قريشات لاميهم وبي سبب حركة الفاضل بتاعة قروش الغاز اتضطرا يطلعها..
اتأفأف وهو بلز باب الدار ويخش من غير ما يسلم على عمو بلال القاعد في البوابة..
جوا الدار..
في المطبخ تحديداً..
اتأفأفت بي زهج من الواقف معاها وشغال يرغي..
شالت صحن العصيدة ولفت عايزة تختو في الصينية بتاعة المُشرفات..
وقف قدامها:تيمو انتي سامعاني؟!
عاينت ليهو:لا والله..زاتو الاذان قررب ولازم اطلّع الصواني
مسك يدينها الماسكة بيهم الصحن:خليني اساعدك
جرت يدينها وبقى هو ماسك الصحن:طيب ختو في الصينية وطلعها للمُشرفات طوالي
الفاضل كان عايز يتكلم لكين لمن شاف عمر واقف جنب الباب بعاين ليهم..
سكت وعمل فيها كأنو شغال مع تمارا جد جد..
ختا الصحن وشال الصينية..
اتلفت على تمارا المداهم ضهرها وقال:طيب ح اودي دي واجي اطلع باقي الصواني
ومشا..
بعد ما ادا عمر ابتسامة خبيثة مُستفزة خلت عمر يغلي..
تمارا غرفت في صحن تاني واتلفتت عايزة تختو في الصينية لقت عمر واقف في نص المطبخ وصاري وشو..
عاينت ليهو:عمر كويس انك جيت قبل الاذان
سألها:الفاضل د بعمل في شنو هنا؟!
حركت عيونها بين عيونو:م بعمل شي..جا هسي وقال عايز يساعدني خليتو يشيل لي الصينية بس
مسك كتفها:والمساعدة إلا يمسك يدك؟؟
حركت راسها:م مسك يدي بس..
قاطعها:تمارا انا شفتو..وم اشوفك واقفة معاهو تاني
عاينت ليهو مسااااافة:انت مالك جاي زهجان؟؟
قال:سامعة كلامي د..م اشوفك واقفة مع الزافت د
قالت:عمر نحنا عايشين في الدار د سوا..وشي طبيعي اننا نتكلم
حرك راسو:طبيعي اي
جا عليها خطوة وهو بقول:طيب وانا م عايز الطبيعي د يحصل..ولو شفتك مارة بي جنبو ساي
بلعت ريقها وهي بتعاين في عيونو البطقو شرار..
همس ليها جنب وشها:م ح يحصل خير
عاينت في عيونو مسااافة..
حست بيهو ح ياكلها..
نزلت عيونها وهي بتتنفس بتوتر:طيب حاضر خلاص
مشت من قدامو..
ختت الصحن في الصينية وهي بتقول:دي صينيتكم طلعوها برا وافطرو مع عمو بلال
حكا فوق حواجبو وشال الصينية وطلع..
ختت يدها في قلبها..
د مالو جاي زعلان كد الليلة؟!..
بعداك ختت صينية تالتة عشانها هي والبنات ومشت تناديهم..
نادتهم وشالت حنينة من الشفع القاعدين يلعبوها في الحوش وجات..
قطعت وهي سامعة الاذان بأذن..
دعت ل نفسها ول عمر طبعا..
