تمارا

3

تمارا..

بارت3

بعد مرور اسبوع بدون أحداث تُذكر..
ياها تمارا مع شغل الدار والدرش..
عمر بقى بطلع من 8 صباحاً للورشة وبعد يخلص بمشي السوق يشوف ليهو اي شغل..
ضاعف مجهودو عشان يقدر يلم ولو جزو بسيط من قروش صيانة الركشة..

ولمن لمى نص مبلغ الصيانة..
جاب الركشة في نفس الورشة الهو شغال فيها..
طبعا ح يصينها براهو بس الاسبيرات وكد الا يشتريها من الورشة زاتا..
ادا صاحب الورشة المبلغ وشال ليهو كم اسبير كد عشان من بكرة ح يبدا يصلح الركشة..
على كد قفل يومو واتجه على الدار..

وصل مع  اذان المغرب..
لقى عمو بلال والفاضل قاعدين في الشارع مع باقي رجال الحلة..
خشا غسل يدينو واتوضى وجا لحق الافطار بي دقايق..
طبعا لاحظ انو العصير طعمو غيير الليلة..
م عارف مشكلتو شنو بالضبط لكين غايتو م ياهو عصير تمارا البعرفو..

جوة في غرفة البنات..
ماسكة كباية الموية ومتمحنة في الراقدة قدامها..
قالت:طيب اجيب ليكي عصير تشربيهو ساي
حركت راسها نظام لا وهي م قادرة تفتح خشمها..
عُناب:طيب تمي باقي مويتك وبلحتك دي ي تمارا
تمارا غمضت عيونها من غير ما تقول شي..
عُناب ختت يدها في جبين تمارا لقتو مولع..
اتنهدت بحزن..
تمارا ليها كم يوم عيونها واقعين وبتقول فترانة..
طبعا بقولو ليها ارتاحي م بترتاح..
لحدي الليلة الصباح..
صحت ليهم بي حمة تغلي عديل..
ومن ساعتها وهي راقدة..
قامت بس عملت ليهو المُلاح وباقي البنات زبطو باقي الافطار..
لكين ياها راقدة من غير ما تاكل او تشرب شي..
عاينت لعشة الدخلت من الباب وهي بتقول:عنبة..لمينا ليكي العدة تعالي عشان تغسليها
تمارا عاينت لي عُناب:وديتو القهوة؟!
عُناب:وديناها اي..اي شي تمام انتي بس ارتاحي واكلي ليكي حاجة
تمارا حركت ليها راسها نظام لا..
عُناب:طيب خليني اوري سِت حنان عشان توديكي المستشفى
تمارا:م توري اي زول..انا لي بكرة كد بصبح كويسة
عُناب اتنهدت بي حزن وطلعت..
لاقت عمر في باب المطبخ..
هي داخلة وهو طالع..
سألها:تمارا وينا؟!
عُناب:في غرفتها راقدة من الصباح
عقد حواجبو بي استغراب لأنو عارفها م بترقد كتير الا تكون عيانة..
سألها:كويسة هي؟!
حركت ليهو راسها نظام لا لا وهي بتقول:م كويسة والله..محمومة من الصباح واصلا ليها كم يوم بتقول جسمي مكسر
شال نفس وختاهو:راقدة وين هسي؟؟
عنبة:في غرفتنا..امشي ليها وحنسها عشان تاكل لأنها بس قطعت بي موية
سألها:صايمة ليه هي؟؟
عُناب:بري قدر ما حنستها ابت تفطر والله
حرك ليها راسو ومشا قبل تتم كلامها..

دخل غرفة البنات..
لقاها راقدة في سريرها ومتغطية بي توبها لحدي نصها..
اتنهد وقعد جنبها في السرير..
مرر يدو في شعرها..
فتحت عيونها براحة عاينت ليهو..
ولمن شافتو د هو همست:عمر
ابتسم ليها:عيون عمر..سلامتك حبيبي
ابتسمت من غير ما تقول شي..
زحا يدو من جبينها لأنو كان مسخن شديد..
مسك يدها الدافية وقال:قومي خليني اوديكي المستشفى
حركت راسها نظام لا وهمست:م بحتاج انا كويسة
قال:كويسة كيف انتي م شايفة جسمك مسخن كيف ي بت؟!
عاينت ليهو من غير ما تقول شي..
اتنهد:طيب اكلي ليكي حاجة
بس بتعاين ليهو وم قادرة تتكلم..
عمر:ح اجيب ليكي حاجة تاكليها طيب؟!..ولو م اكلتي معناها م كويسة وح نمشي المستشفى
حركت راسها نظام طيب..
قام مشا المطبخ..
جاب ليها شوية اكل وكباية عصير وجا..
لقاها حمتها زادت وم واعية عديل..
بقى يهز فيها:تمارا..تمارا اصحي..فتحي عيونك
عُناب جات داخلة:مالا؟!
عمر:جيبي قطعة مبلولة بي موية باردة..سرعة
عُناب جرت جابتها وجو معاها سُهيلة وعشة..
بقى يعمل فيها في المكمدات..
وديل واقفين بعاينو ليهو..
حمتها شوية نزلت وجسمها بقى دافي م حار..
خالدة جاتهم وهي شايلة حنينة..
وحنينة بتبكي طبعا..
عايزة تمارا تنومها..
عُناب شالتها منها وهي لسه بتبكي..
عمر ختا لي تمارا المكمدات في جبينها وعاين لي عُناب..
سألها:مالا حنو؟!
عُناب وهي بتهز فيها:بتكون دايرة تنوم..اصلا دي مواعيد نومها
عمر:م بتنوم الا تمارا تنومها صح؟!
عُناب حركت راسها نظام اي وهي تتحرك يمين وشمال بي حنينة عشان تنوم..
وحنينة حلفت كان تسكت..
وقف علي حيلو وقال:جيبيها كدي
شالها منها وهي لسه بتبكي..
عاين ل تمارا وهو بقول:تابعي ليها المكمدات انا طالع بي حنو برا عشان م تزعجها
قعدت وتابعت ليها المكمدات..
وهو طلع السطوح بي حنينة..
حنو طبعا لمن شافت السطوح والجو الغريب سكتت وبقت تتلفت..
عاين ليها وقال:حتة سمحة صح؟!
ابتسمت ليهو..
ختا ليها راسها في كتفو:يلا نومي
رفعت راسها وقالت:لا تماراا
عمر:تمارا جاية هسي..يلا النوووم
وتاني رجع ليها راسها في كتفو..
وهو واقف طبعا وبلولحها..
شوية كد ونامت..
اول ما نامت نزل بيها..
دخل لقى عُناب وعشة نايمين وسُهيلة قاعدة حنب تمارا وبرضو شبه نايمة..
هزاها من كتفها:امشي نومي في سريرك خلاص
سُهيلة قامت من غير كلام ورقدت في سريرها..
بقى واقف وشايل حنو..
رقدها ورا كرعين تمارا وقعد هو في الارض جنب راسها..
زحا القطعة من جبينها..
لقاهو بارد..
باس بين عيونها مساااافة..
فتحت عيونها برااحة..
ابتسم ليها:اها كيف؟!
ابتسمت:حمدلله
باس يدها وكتفها وقال:الف سلامة عليك..اريتو فيني
ابتسمت وختت يدها في خدو..
مسكها وباس بطن يدها مساااافة..
سألها:بتقدري تاكلي؟!
حركت  راسها نظام لا:عايزة انوم بس
صلح ليها المخدة تحت راسها:نومي يلا
‏وهطت راسها في المخدة وهي بتعاين ليهو..
‏وفي اقل من دقيقة كانت نامت..
‏غطاها كويس وبقى قاعد ويعاين ليها..