နှလုံးသားခုံရုံးရဲ့အယူခံ

15 U/Z

Uni

💟နှလုံးသားခုံရုံးရဲ့ အယူခံ💟

💟အပိုင်း ၁၅💟

ချစ်ရသူ၏ လက်ထပ်မင်္ဂလာပွဲ ဖိတ်စာလေးကို ကိုင်ပြီး စည်း အသိတွေ လေးလံထုံးထိုင်းစေခဲ့လေသည်။ ရွှေအိုရောင် ထိုဖိတ်စာလေးကို သူ့ထံရောက်လေအောင် ဦးကောင်းမိုး ပို့လိုက်သည့်ကို သိသော်လည်း ထိုဖိတ်စာပေါ်က ပျိုမဒီဆိုသော အမည်လေးကတော့ သူ့ကို လှောင်ရယ်နေသယောင်။

"တီ  တီ"

ဝင်လာသော ဖုန်း message အသံကြောင့် ဖုန်းကို ကြည့်လိုက်လေတော့  ဦးကောင်းမိုး ထံမှ ဖြစ်နေလေသည်။

"ကမ္ဘာစည်း မင်းနဲ့ ငါ့ အေးဆေး ဆွေးနွေးရအောင် အခု ငါ့ ချိန်းတဲ့ နေရာကို မင်းလာခဲ့ပါ၊ မဟုတ်ရင် မင်းအတွက် နောင်တရစရာ ဖြစ်သွားလိမ့်မယ်"

ထို စာနှင့် အတူ အောက်ဘက်တွင် ရေးထားသော ဆိုင်လိပ်စာကြောင့် စည်း နှုတ်ခမ်းတွေကို မဲ့လိုက်မိလေသည်။ ကမ္ဘာစည်း ဘဝမှာ နောင်တရစရာဆိုတာ ရှိဦးမှာတဲ့လား။

ခံစားချက်မဲ့လွန်းနေသော သူ့ အပြုံးတွေက အသက်သိပ်မဝင်သလို နာကျင်နေသည့် နှလုံးသားကလည်း သူ့ကို တရိရိပဲ့ခြွေ တိုက်စားစေခဲ့လေသည်။ ချစ်ရသည့် ချစ်သူကိုလည်း ရင်ကွဲခံပြီး စွန့်လွှတ်ခဲ့ရသလို ချစ်ရလွန်းသည့် အစ်မဖြစ်သူကိုလည်း ဆုံးရှုံးခဲ့ပြီးသည့် သူ့မှာ နောင်တရစရာတွေ ရှိဦးမည်တဲ့လား အဟက်။

ခြောက်ကပ်စွာ ရယ်မောလိုက်သော သူ့ အသံက သိပ်တော့ နားဝင်ချိုစရာမ​ကောင်းလှပေ။
                     💟💟💟

ဦးကောင်းမိုး အတွက် အမှန်တရား အချို့က ခါးသက်လွန်းလှလေသည်။ ကိုယ့် သမီးဟု ဘယ်သော အခါကမှ လက်မခံနိုင်ခဲ့သည့် ကလေးက အခုတော့ ကိုယ့် သမီး အရင်းဆိုသည့်ကို သိခဲ့ရချိန်တွင် သူ့ အသိစိတ်တစ်ချို့ကို လုံးဝပကတိ မှောင်မိုက်သွားခဲ့လေသည်။ ၁၅ နှစ်လုံးလုံး မတွေ့ဖြစ်ခဲ့ရသော သူငယ်ချင်းဖြစ်သူကို ပြန်တွေ့ရချိန်တွင် သူ့ အမှားကို လက်ခံခဲ့ရလေပြီ။ ထိုနည်းတူစွာပင်   ဖြူစင်သည့် ယွန်းစံမှီ ဆိုသော မိန်းကလေးတစ်ဦးရဲ့ အကြောင်းကို သိခဲ့ရလေတော့ သူ့ ရင်ထဲမှာ ပို၍ ခံစားရလေသည်။