''အလိမ္မာရင်မှာရှိ''

အပိုင်း(၂၇)

''ဘယ်သွားမှာလဲ?နွေရင်ခတ်...´´

ဒေါ်ဒေါ်နုယဥ်အသံကြောင့် နွေရင်ခတ်လန့်သွားရသည်။ရောက်လာကတည်းက မျက်နှာချင်းမဆိုင်ရသေးပေ။

''ဟို...အိမ်ပြန်မလို့´´

''ဘာ!´´ဒေါ်ဒေါ်နုယဥ်အသံက ကျယ်လောင်စွာထွက်ပေါ်လာသည်။

''မင်းက ဒေါ်ဒေါ်တို့မိသားစုကို တာဝန်မဲ့တဲ့လူတွေလို့ထင်နေတာလား?မင်းအဲဒီလိုပြန်သွားရင် ရွာထဲကလူတွေကဘယ်လိုထင်ကြမလဲ?....တောင်းရမ်းမပြီးမခြင်း သားငယ်အခန်းမှာပဲနေလိုက်´´

''ဟုတ်ကဲ့ပါ...ဒေါ်ဒေါ်နုယဥ်´´နွေရင်ခတ် ထိုကဲ့သို့ တစ်ခါမှတွေးမကြည့်ခဲ့မိပေ။ရွာပြန်ရောက်ရင် ကိုယ့်အိမ်မှာပြန်နေပြီး တကယ်လို့ သူကြီးတို့က အလိမ္မာသွေးရှင်ကို နှင်ချတာဖြစ်ဖြစ် မောင်းထုတ်တာဖြစ်ဖြစ်လုပ်ရင် သူ့အိမ်မှာခေါ်ထားလိုက်မည်။ရွာထဲက ဘယ်သူဘာပြောပြော ဂရုစိုက်နေမည်မဟုတ်။ယောကျာ်းဆိုတာလုပ်ရဲရင် ခံရဲရတယ်လေ။ဒါပေမဲ့ အခုကိစ္စက ထင်သလောက် လွယ်ကူမနေ။လူကြီးတွေပါ ပါဝင်ပတ်သတ်လာပြီဖြစ်သည်။တောင်းရမ်းမည်ဟု ပြောပုံထောက်ရင် နှင်းရီတို့အိမ်ကို စကားကြောင်းလှမ်းပြီးပြီထင်သည်။ဘကြီးနဲ့အရီးလေးက လက်ခံလိုက်ပုံပဲ။ထိုအကြောင်းကိုတွေးမိတော့ သူတို့နှစ်ယောက်ကိစ္စက ထင်သလောက်လည်း မျက်မုန်းကျိုးမခံရပါလားဟု တွေးကာသက်ပြင်းချလိုက်သည်။

ဘယ်သူ့မှဂရုမစိုက်ဘူးလို့ ရင်ထဲမှာအမြဲ​ကြွေးကျော်နေပေမဲ့ သေချာသိလိုက်ရတာက အနည်းနဲ့အများတော့ ငါလည်းစိတ်ပူနေခဲ့တာပဲ။

နွေရင်ခတ် ဒေါ်ဒေါ်နုယဥ်နဲ့စကားပြောပြီး အခန်းထဲဝင်တော့မည်အလုပ် အလိမ္မာသွေးရှင်ကရောက်လာသည်။

''မေမေ...ဘာဖြစ်လို့လဲ?´´

အလိမ္မာသွေးရှင် ရင်မှာထူပူသွားရသည်။မေမေကမာနကြီးသည်။သူတို့နှစ်ယောက်ရဲ့ကိစ္စကို လွယ်လွယ်နဲ့ခွင့်လွှတ်ပေးမှာမဟုတ်ပေ။ခြေဖျားလက်ဖျားများပင်အေးစက်လာရကာ တုန်ရင်နေမိသည်။

မေမေနဲ့နွေရင်ခတ် မျက်နှာချင်းဆိုင်ရပ်နေသည်ကိုမြင်လိုက်ရတော့  ဇာတ်လမ်းတွေထဲက ယောက်ခမကချွေးမကိုအနိုင်ကျင့်သည့် ဇာတ်ဝင်ခန်းဟုထင်လိုက်မိခြင်းဖြစ်သည်။