unicode
Taehyungသည် ညအိပ်ရာဝင်ရန်အတွက် ညအိပ်ဝတ်စုံလေးလဲဝတ်ကာ သန့်စင်ထားသည့်မျက်နှာထက်ကို ပေါင်းတင်ကပ်ခွာလေးကပ်နေစဥ် မှန်တင်ခုံထက် တင်ဆောင်ထားသည့် သူ့၏ဖုန်းဆီကနေ မြည်သံထွက်ပေါ်လာသည်မို့ လက်လေးတစမ်းစမ်းဖြင့် ကောက်ယူကြည့်လိုက်ရသည်။
ဖုန်းscreenတွင်ထင်းနေသည်က 'My Alpha'ဟူသည့် နာမ်စားဖြစ်ပြီး သူ အရသာခံ၍ သတ်မှတ်ထားသည့် Jungkook၏ဖုန်းနံပါတ်မို့ ရင်ခုန်သံက ဒိန်းခနဲ'ဖြင့် ဖုန်းမဖြေဆိုခင် ပျာယာခတ်သွားရသေးသည်။ပြီးမှ မိမိ၏လည်ချောင်းလေးကို ချောင်းဟန့်၍ရှင်းလိုက်ကာ Jungkook၏ဖုန်းကို မဝံ့မရဲလေး ဖြေဆိုလိုက်ရ၏။
" ဟယ်...ဟယ်လို...."
ဒါက Jungkookနှင့် သူ ပထမဆုံးအနေနှင့် ဖုန်းပြောရခြင်းပင်...။
တစ်ဖက်က Jungkookသည် အိပ်ခန်းထဲတွင်ရှိနေသည်ဖြစ်ပြီး စာကြည့်စားပွဲတွင်ထိုင်နေကာ မင်းသားငယ်လေး၏သြရှရှဖြေဆိုသံကိုကြားရလျှင် အလိုလိုကွေးညွှတ်သွားသည့်နှုတ်ခမ်းပါး..။
" သက်သာလား... ခေါင်းကိုက်တာက..."
" အော... သက်သာတယ်... မင်းရော.. အိမ်ကိုကောင်းကောင်းပြန်ရောက်တယ်မလား...."
" အင်း...."
Taehyungသည် Jungkookနှင့် ပုံမှန်စကားကိုဆိုရသည်တောင် ရင်ဘတ်ထဲတွင် ယားကျိယားကျိဖြစ်လာစေကာ မလှမ်းမကမ်းက တစ်ရှုးဘောက်စ်ကိုအနားဆွဲယူပြီး အရှက်ပြေ တစ်ရွက်ပြီးတစ်ရွက် ဆွဲထုတ်နေမိသည်။
" ကျွန်တော်.. အိမ်ပြန်ရောက်ရောက်ချင်း မင်းသားလေးဆီ ဖုန်းဆက်မလို့ဘဲ... မင်းသားလေးက နေမကောင်းဖြစ်နေတော့.. နှောင့်ယှက်သလိုဖြစ်မှာစိုးလို့... အခုမှခေါ်ရတာ...."
" အာ... မင်းက ငါ့အတွက် အနှောင့်အယှက် မဖြစ်ပါဘူး... အချိန်မရွေး.. ငါ့ကို ဖုန်းခေါ်လို့ရတယ်.. သိလား.."
ချိုအီနူးညံ့သွားသည့်အသံက မိမိကိုယ်တိုင်တောင် အသဲယားသွားစေသည်မို့ Taehyungမှာ တစ်ရှူးစတွေကို ဆက်တိုက်ဆိုသလိုဆွဲထုတ်မိသွား၍ သူ့အနားတွင် တစ်ရှူးစတွေမှာ ပလူပျံနေသည်။