خبز و ماء

𝑃𝐴𝑅𝑇❀14

🌸خُبْـــــــــــــزٌ و مَــــــــــــــاءْ🌸

♡الفصـــــــــل الثاني:لِقـــــــاءٌ قد تَأخـَــــــــر♡ 

✎𝑆ℎ𝑒 𝑊𝑜𝑙𝑓

𝑃𝐴𝑅𝑇❀14

سيف كي حس بالنفس ديالو غادي تقطع و هو كي شوف مرتو بين أحضان واحد آخر و الزوينة هي فاش نادر باس جبينها،أما قمر مع زرب عليها ما فهمات والو،يالاه هزات يديها باش تدفعو من عليها،حتى كاتشوفو طاح للأرض و سيف جلس عليه بالبونيات،قمر رجليها فشلو مع الخلعة و الصدمة،و سيف فقد تماما أعصابو لدرجة كي ضرب فيه بجوج يدين.

ضحى هي لي مشات شدات ليه يديه ساعة دفعها حتى جات طايحة، نادر مع غفلو ما قدرش عليه و زائد سيف جالس عليه ما قدر حتى يحرك يديه،كان غادي يق*تلو كون ماشي شي رجال لي شدو سيف،تحاماو عليه كاملين باش قدرو ينوضوه من عليه.
سيف وقف و كي نهج، عينيه حمرين و عروق يديو قربو يتفرگعو،شاف فقمر لقاها جامدة فبلاصتها و كاترعد،دفع دوك الرجال و شدها من شعرها غادي بيها للطوموبيل غير وصل، ضرب ليها راسها مع الزاجة حتى تجر*حات من جبينها.

شدات جبهتها و شافت يديها لقات الد*م،غير شافتو بدات كاتبكي،سيف واخا شافها تجرحات ما حرك فيه والو،بالعكس رجع شدها من شعرها و دخلها للطوموبيل،مشا لبلاصتو و ديمارا،الطريق كاملة و هو كي غوت و فينما كاتبغي تدوي كي جمع ليها وجهها بتصرفيقة ما خلاها حتى تشرح ليه أش واقع و هذا أكبر خطأ دار سيف.

وصلو للدار، غير وقف الطوموبيل هبطات بالجرى هربانة منو، دخلات و مشات النيشان تخبات ورا ثورية.

قمر(كاتبكي و وجهها عامر د*مايات):خالتي عتقيني عفاك

ثورية و البنات ملي شافو حالتها شهقو فالأول، ثورية يالاه بغات تسولها حتى كي دخل من الباب كيف العجاجة،غير شافها و تم غادي لعندها،هز كرسي جا فطريقو و طلعو حتى لفوق معول يهبط بيه عليها،حتى كاتوقف عليه ثورية.

ثورية(كاترعد بالخوف حيت حالتو كاتخلع):ولدي ها السخط ها الرضى لا ما حط داكشي لي فيدك و خلينا نهدرو بالهداوة.

سيف من كثرت الأعصاب دفعها من قدامو شوية ما طيح، قمر شافتو جاي لعندها و هي تهرب ورا منى،بعدا سلمى و إكرام تخباو ورا حليمة مخلوعات، كي بان ليهم فهاد اللحظة بحال الوحش.

سيف تبعها لفين مشات،منى غير بان ليها السيد فقد السيطرة جمعات قبضة يديها و عطاتها ليه،مع عطاتها ليه مع حبس و لاح داك الكرسي،وقف كي نهج و عينيه مدمعين و لونهم ولى بحال العافية،شد قلبو و طاح على ركابيه كي تنفس بالجهد.