South Boys #6: Bad Lover

Chapter 7

"ANO, GUSTO MO BA?"

Napakurap ang nanlalaking mga mata ko habang nakatingala kay Miko. Nakangisi siya sa akin subalit seryoso ang mga mata niya habang nakayuko sa akin at pisil-pisil ng dalawa sa mahahaba niyang daliri ang kaliwang pisngi ko.

"'Di ba ayaw mong mapunta si Arkanghel sa iba? Kaysa sa iba, ipatira na lang natin—"

Parang may sariling buhay ang isang kamay ko. Sinapak ko siya.

"Aray, pota!" Napabitiw siya sa akin at napausod habang hawak-hawak ang kanyang panga.

"Ikaw!" Nanginginig na dinuro ko siya. "Wala na ba talagang matinong lalabas diyan sa bunganga mo, ha?! Bakit mo iyon gagawin kay Arkanghel?! Di ba kaibigan mo siya?! Bakit ka nag-iisip ng ganyan sa kaibigan mo?!"

Siya naman ang napakurap habang hawak pa rin ang kanyang panga nang mapatitig sa mga mata ko na pinangingiliran na pala ng luha. "H-hoy, naiyak ka?"

Hindi ko pinansin ang tanong niya. "Hindi mo dapat iyon gawin sa kaibigan mo!" galit pa rin at nanginginig na sabi ko. "Kahit joke lang! Hindi dapat!"

"Hindi naman iyon joke lang—"

"Shut up! Stop! Umayos ka!" gigil na sigaw ko.

Napaayos naman siya sa pagkakatayo, tapos ay napakurap nang ma-realize na sinunod niya ako.

Galit na galit pa rin naman ako nang duruhin siya. "Ulitin mo pa iyang sinabi mo, ikaw ang ipapatira ko!"

Ang pagkabigla sa mukha ni Miko ay naglaho, bumalik na ang kakaibang pagkaaliw sa kanyang mga mata. "At kanino mo naman ako ipapatira niyan?"

Natigilan naman ako. Wala akong kilala. "Uhm..." Kanino nga ba? Napaisip ako. "Uhm, kay ano, kay Isaiah!"

Ang pagkaaliw sa mga mata ni Miko ay dumoble pa yata. "Alam mo bang nagsuntukan kami ni Isaiah sa Memorial noong elementary kami, dahil nag-agawan kami sa pantasa? Talo ko siya. Umuwi lang naman siya sa kanila na putok nguso niya."

"Dati iyon! Malakas na ngayon si Isaiah! O kaya si Asher! Kay Asher na lang kita ipapatira!"

Natawa siya. "Kay Asher? E sa daycare pa lang, wala na iyong palag sa akin. Saka maangas lang iyon, pero iyakin pa rin iyon hanggang ngayon. Iyong isa sa kuya niya ang laging rumeresbak para sa kanya. Pero graduate na ngayon ang kuya niya."

Napikon na ako. "Bakit ka ganyan?! Mga kaibigan mo sila, di ba?!"

Tamad na nagtutule siya ng kaliwang tainga gamit ang hinliliit na daliri.

"Basta, wag mong pakikialaman si Arki ko! Siya ang magiging future boyfriend ko! Siya ang magigiging asawa ko pagka-graduate namin! Kaya wag na wag mo siyang pakikialaman dahil ako ang makakalaban mo! Naiintindihan mo?!"

Ngumiti na siya. "Okay."

"Good! At least, we are clear now!"

Paalis na ako nang magsalita siya ulit. "Ganyan din ba ang nasa isip ni Arkanghel? Na magiging kayo at magiging mag-asawa kayo pagka-graduate niyo?"

Gigil akong napabalik ng harap sa kanya. "Hindi pa siguro ngayon. Hindi niya pa nare-realize na love niya ako, dahil gusto niya munang makatapos. Gusto niya munang makatulong sa parents niya. Pero M.U. na kaming dalawa!"

"Okay, okay." Humakbang siya paabante sa akin. Napapitlag ako nang hawakan ng kaliwang malaking kamay niya ang ulo ko. "'Wag ka nang highblood. Wala naman na akong gagawin sa Arkanghel mo... sa ngayon."