South Boys #6: Bad Lover

Chapter 8

ANO SA TINGIN MO ANG GINAGAWA MO?

Nanigas ang aking leeg nang marinig ang malamig at buong boses sa likod ko. Ang daliri ko ay nagkandarapa sa pagta-tap. Sa wakas, kahit nanginginig ay nahagip ko na rin ang back nang mariin. Bumalik na sa wallpaper ang screen.

Pasalampak na tumabi sa akin sa stage si Miko. "Hoy, bakit nasa 'yo cell phone ko?"

Napalunok ako nang mapatingin sa kanya. Naka-T-shirt lang siya at ang kanyang polo ay nakasampay sa kanyang balikat. Magulo ang buhok niya, pawisan ang makinis na leeg niya na ngayo'y pinupunasan niya ng panyo. Pero kahit mukha siyang pagod, mukha pa rin siyang mabango. Ah, hindi lang mukha, kundi mabango pa rin talaga.

Ikiniling niya ang ulo dahil sa pagtataka sa pagkakatulala ko. "Hoy? Ice ka lang?"

Napaurong naman ako, dahilan upang bumaba lang ang paningin ko sa leeg niya. Napunasan niya na iyon ng pawis, kaya doon na ako sa nakabukol niyang Adam's apple napatitig. Sa lalamunan niyang naaalala kong ilang ulit umalon habang nakakagat labi siya roon sa video clip!

"Hoy?" tawag niya na nagpabalik ng paningin ko sa kanyang mukha. "Bakit nga ganyan ka? Para kang nakakita ng guwapo, ah. Pero satrue lang."

Chill lang. Chill lang siya habang ako rito ay nagririgodon ang dibdib sa kaba. Hindi puwedeng ganito. Si Miko ito, si Miko lang. Guwapo lang ito, pero abnoy ito! Hindi porke't nakita ko na iyon ay dapat mag-iba na ang aking tingin sa kanya!

"A-ano, tumunog kasi ang alarm ng phone mo kanina." Inabot ko sa kanya ang phone niya na tinanggap niya naman. "A-ayaw tumigil sa pagtunog kaya napilitan akong kunin sa bag mo para i-off ang alarm."

"Ahhh..."

Kumuyom ang mga kamao ko sa pagsambit niya. Bakit kailangang ganoon? Naalala ko na naman tuloy iyong pag-ungol niya sa video sa phone!

"'Tagal ko ba?" tanong niya. "Nasaan na pala sila? Umuwi na?"

Sa dami ng tanong niya ay wala man lang akong nasagot, kaya sinilip niya na naman ang mukha ko. Napaiwas naman ako ng mga mata. Hindi nga lang sapat na umiwas lang, kaya nagmamadali na akong tumayo mula sa pagkakaupo sa harapan ng stage.

"Oy, alis ka na?" Napatayo na rin siya pero walang pagmamadali. Nagpagpag siya ng school pants habang sa akin nakatingin.

"Yup, uuwi na ako." Tinalikuran ko na siya at tinungo ang hagdan pababa sa stage. 

Ang bilis ng mga hakbang ko pero nakahabol pa rin siya. Sumabay siya sa akin sa paglalakad. Ang kanyang bag ay nakasuot na sa kanya habang ang hinubad na polo ay hawak-hawak niya. Sa pagkakataranta ko sa paghakbang ay muntik pang tumama ang aking mukha sa balikat niya.

Takang-taka naman si Miko sa ikinikilos ko. Tatanungin niya sana ako, mabuti na lang dahil may babaeng palapit sa amin. Tinatawag siya nito. "Nhie!"

"GF ko," sabi niya sa akin kahit hindi ko itinatanong.

Iyong babae ay huminto sa harapan namin. Maganda. "Nhie, bakit ang tagal mo?" Malambing ang boses, malambing din pati ang titig kay Miko. Pero lahat iyon ay naglaho nang mapatingin ito sa gawi ko.

Hinawakan naman ako ni Miko sa ulo. "Pinsan ko."

Doon lang ulit nagbalik ang ngiti ng babae. Tumingin sa akin at mahinhin na kumaway. "Hi po!"

"Hi." Sinagot ko naman. Tama rin ang sinabi ni Miko na pinsan niya ako. Pinsan para iwas issue.

Niyuko ako ni Miko habang hawak pa rin ako sa ulo. "Una ka na?"