'99'
အပိုင်း ( ၁၉ )
မျက်နှာချင်းဆိုင်ရှိနေကြသော်လည်း မျက်နှာလွှဲထားကြသည့်သီဟနှင့်မြတ်မင်းကို သူတို့လေးယောက် အရိပ်အကဲကြည့်နေရသည်။ ပြည့်လျှံက ခပ်ပြုံးပြုံးဖြစ်နေပြီး ကြည်သာကတော့ မျက်နှာပိုးမသတ်နိုင်စွာ ပြုံးစိစိ။ Kris တစ်ယောက်သာ လက်ပိုက်လျက်သားဖြင့် ဆိုဖာကိုခပ်မတ်မတ်မှီထိုင်ပြီး ရုပ်တည်နေနိုင်ခြင်းဖြစ်၏။
မျက်နှာချင်းဆိုင်မရသည့်ထိုနှစ်ယောက် မျက်နှာချင်းဆိုင်မိမှာကို သူတို့လေးယောက်ကြောက်ခဲ့ရပြီး ယခုအခါ မဖြစ်မနေမျက်နှာချင်းဆိုင်ရတော့မည်။ အဲဒါကလည်း နှစ်ပတ်လောက်အထိ။
သီဟအမေ အန်တီစုကောင်းမှုအကြောင်းပြု၍ မြတ်မင်းပါ သူတို့နှင့်အတူ သည်အိမ်တွင်လာရောက်နေထိုင်မည့်အကြောင်းကြားသိရတော့ ကြည်သာဆိုတာ မှိုင်ကျသွားသည့်မင်းသီဟမျက်နှာကိုကြည့်ပြီး ရယ်လိုက်သည့်ဖြစ်ခြင်း။ သီဟက မြတ်မင်း၏ချေမိုးမှု၊ ဥပေက္ခာပြုနိုင်မှုတွေအပေါ် ဘယ်လောက်အထိ ကလိကလိဖြစ်နေခဲ့ရသလဲဆိုတာ အသေအချာသိထားသည်ဖြစ်၍ အမှန်အတိုင်းပြောရပါလျှင် ရှိုင်းထက် စိုးတော့စိုးရိမ်သည် ။
မြတ်မင်းခံ့က အနေတည်ပြီး ပြတ်သားသည်။ ဘယ်သူနှင့်မှ မရောနှောသလို ကင်းကင်းရှင်းရှင်းနေတတ်၏။ မျက်နှာတည်ပြီး မာနကြီးသူပီပီ တည်ကြည်သည့်ပုံစံကလည်း အများက မြတ်မင်းခံ့အပေါ်ရှိန်စေသည့်အချက်ပင်။
အမှန်တကယ်က သူတို့ငါးယောက်လုံးထက် မြတ်မင်းက လူကောင်ပိုသေးသည်ဟုပြော၍ရသည်။ အရပ်ရှည်သော်လည်း ခန္ဓာကိုယ်သွယ်သည့်မြတ်မင်းက သူတို့ငါးယောက်နှင့်စာလျှင် လူကောင်ညှက်သွားသလိုရှိသည့်တိုင် သူတို့ငါးယောက်လုံးမှာ မြတ်မင်းခံ့ကိုမရှိန်သူမရှိ။ တစ်ချက်လောက်စေ့စေ့စိုက်ကြည့်လာရုံနှင့် အလိုလိုအကြည့်လွှဲချင်ကြတာဖြစ်သည် ။
မြတ်မင်းခံ့က စိတ်သဘောမဆိုးပါဘူးဟု ပြည့်လျှံပြောဖူးသလို သူတို့ကိုယ်တိုင်ကလည်း စိတ်သဘောမဆိုးမှန်းသိသိကြီးနှင့် မြတ်မင်းခံ့၏တည်ငြိမ်ပြတ်သားမှုတွေအပေါ် ရှိန်ရခြင်းဖြစ်၏။
