كانت حاسه بحرقه في قلبها الفراش لسه ما اترفع فقدت امها زي ما فقدت ابوها وراجلها قبلها الدنيا ضاقت بيها لو ما اليد الحنينة البتهدهد فيها وتواسيها على فقدها كانت يد خالتي آمنة جارتهم:قولي الحمدلله واستغفري وادعي ليها كتير ده قدر ربنا نسوي شنو يابتي ما في يدنا شيء غير نرضى بيه
مسكت يدها البتربت بيها فوق كتفها :راضية وصابرة ياخالتي
ما عارفة كنت حتصبر كيف بدونك انتي و اولادك لو ما انتو ما كنت حاقدر افرشها ذاته واخد عزاها كتر خيركم تعبتكم
خالتي آمنة :انا زي امك الله يرحمها تاني ما اسمعك تقولي كدة انتو ما جيرانا بس انتو عشرة عمر واولادي زي اخوانك وانتي بتي وبت الغالية هيبات جارتي وحبيبتي وعشرتي
:بارك الله فيك يا خالتي ما عارفة كنت حمشي وين بدونكم
آمنة :تمشي معاي هسي بيتنا وما توجعي قلبي اكتر من كده
رحمة:لكن يا خالتي...
آمنة :عليك الله يا رحمة ما تتعبني انا ما حأقدر اخليك هنا تقعدي براك تجتري في الذكريات و تبكي على اقدار ربنا
رحمة ما حبت تناقشها كفاية اتحملتها فالاسابيع المارضت فيها امها كانت بتساسك بين البيتين غير انهم اتحملو كل تكاليف العزا والدفن وقامو بالواجب بالزيادة هي حتى ما غسلت جنازتها عشان حالتها الصعبة وهسي بقت اصعب بعد موت امها بقت فرع مقطوع من شجرة ابوها مات من هي عمرها 11 سنة امها بقت ليها الام والابو ربتها بمعاش ابوها
و بيع الايسكريم كبرتها وعرست ليها واحتوتها بعد رجعت
رحمة :حاضر يا خالتي امنة خليني بس البس توبي واجي لفحت توبها حق الهزاز ولتمت وشها بعداك اتذكرت تلفونها خلته فالاوضة:دقايق يا خالتي اجيب تلفوني عشان اتصل على مجيد عمي ما عزاني في امي لهسي احتمال ما سمعو
امنة في نفسها حليلك يالنايمة على حيلك ياتو عم يا مسكينة عمك الطماع الأول ما سمع بمرض امك ما سئل عنها ولا عنك بس سئل عن رقم الحساب البنزل فيه معاش ابوك في البنك و طلب انها تعمل ليها توكيل لوصاية بتها عديمة الفايدة على قولتو لأنها حتكون عالة عليه ما بتجي من وراها اي فايدة
لو في شيء خايفة عليها منو ياهو عمها ده الأول ما يسمع بموت امها حيجي جرى عشان يستولى علي البيت وكل شيء
رفعت عينها ليها ودعت في سرها ربنا يحفظها ويبعدهم عنها
اتنهدت ومسكت يدها عشان تسوقها معاها بيتهم مما رحلت هنا واتعرفت على هيبات وبتها صاحبتها وبقو زي الاخوات لقت فيها الاخت الفارقتها و في بتها البت الاتحرمت منها وزادت علاقتهم مع مرور الأيام لكن رغم علاقتهم القوية رحمة ما حصل عتبت باب بيتهم لأنها ما بتطلع من البيت كتير ودايما منعزلة في اوضتها لكن كانت بتحب خالتي امنة وقعدات الحبنة بتاعتها بتطلع تتونس معاها وزادت علاقتها بيها في مرض امها فضلت 3اسابيع معاهم تمشي تطل بيتها وتجي بس عشان تشوف ولدها وتطمن عليه
