كل شيء تم زي ما معمر وامه خططو لي حاجات رحمة نقولها اوضة معمر البقت اوضة عرسان جد جد خالتي آمنة حرصت تشرف على تجديدها بنفسها وجابت ليها تسريحة ملتها ليها بعطور العروس والكريمات كأنها لقت فرصة عشان تنفس عن رغبتها الحقيقية فانها تعمل ليها الحاجة دي من زمان كمان طلبت من معمر يسوقها ويمشو السوق يشتري ليها ملابس جديدة خايلة على عروس و بالرغم من انه رحمة رفضت واتحججت بانها عندها هدوم كتيرة من شيلتها حقت عرسها الأول حتمشي تجيبهم من بيتهم لكن خالتي آمنة اصرت
:حتعملي القلته ليك يا رحمة انا تعبت منكم انتو الاتنين بالعافية اقنعته هو الآخر حيمر عليك بعد يخلص شغله في الورشة خليك جاهزة عشان معمر ما عنده صبر وما بحب الزول يتأخر في اللبس للطلعة ممكن يلغي المشوار كلو
بالمسا كانت خلصت وقاعدة تلبس في نقابها لمن سمعت صوت دق في باب اوضتها :زفته انجزي ما انتهيتي لهسه؟
طلعت بخوف لبست جونتياتها قدامه: لا لا خلاص انتهيت
عاين ليها باستغراب:انتي حتطلعي معاي بمنظرك ده؟
حتى عيونك ما ظاهرين شكلك عامل زي ال...
قاطعته: النينجا سمعتها كتير تشبيه وهمي كان عايز يرد عليها بسخرية زي عادته لكن كملت:وايوة انا منقبة وبقول وهمي وبتاع وبتكلم بلغة الشباب عادي لانها ما حرام على حد علمي فلو انتهيت من ملاحظاتك وتشبيهاتك الوهمية زيك دي ممكن نطلع؟ كتم الضحك من كلامها كان مصدوم من شخصيتها المرحة او الجانب التاني الشبابي منها اشر ليها بيده على الباب عشان تطلع قدامه بطريقة درامية بعداك اتذكر انها ما بتشوف قاليها:اتفضلي يلا قدامي كلمة زيادة
و حنتشاكل والغي المشوار ما تستغلي تساهلي معاك
اول ما طلعو من باب البيت للشارع مشت خطوتين ووقفت مترددة لحد ما اتجاوزها اتلفت عليها لمن حس بيها وقفت:
خير في شنو مالك تاني؟
اتذكر ظرفها الخاص واعتذر بخجل من غبائه وسخافته :
معليش لسه ما اتاقلمت على الوضع بتمنى ما يكون عندك مانع قالها بلطف وقرب منها اتأبط يدها تحت دراعه وبقى يمشي براحة براحة عشان تقدر تجاريه حس بشعور تملك انه في زول بعتمد عليه بالكامل وبمشي وراه بثقة عمياء حرفيا اما رحمة حست بشعور غريب لأنه نادرا ما يكون هادي ولطيف معاها حست بيه وقف وفتح ليها باب العربية
:يلا اركبي براحة يا رحمة ساعدها تركب بعداك قفل بابها ومشى بجهة السواق لقاها بتتنفس بصوت عالي وانفاسها مضطربة معمر:في حاجة يا رحمة؟
رحمة:انا بس بخاف من العربات الخاصة انت الحتسوق؟
معمر استغرب منها :اي انا السايق وين المشكلة؟
:لا لا بس يعني انت ما صغير على السواقة عندك رخصة؟
معمر ضحك:صغير كيف انا عمري 26 وبعدين ياستي اطمني انا عندي رخصة من عمري 19سنة طلعها لي مبشر اخوي
