مر اسبوع على الحصل وللان ما رجع يتكلم ولا ياكل معاها حتى اكله بترسله ليه مع سرا عضت على شفايفها ياريت نسيبتها كانت عايشة هي الوحيدة الكانت حتقدر تساعدها وتوريها تصرف كيف مع ولدها ده استغفرت واترحمت عليها جاتها فكرة قررت تنفذها فورا ع الاقل عشان تكسر الحاجز الاتبنى بينهم شالت تلفونها اتصلت على عبير مرت اخوه:
اهلين بعروستنا الحلوة كيف حالك وكيف معتز معاك؟
طمنتها عليهم-الحمدلله انكم كويسين اتصلت عليك عشان نعزمكم على الغدا بكرة - لا لا ما بنقبل اي اعذار معتز عريس ولازم يتعزم ويتكرم ليه في بيت امه ده غير انه معمر اشتاق ليه وانا كمان فقدتك حنكون في انتظاركم بكرة بالعصر
قفلت الخط بسرعة عشان ما تقدر تعتذر او تحجج بحاجة تانية راجعت خطتها ف راسها حتستناه يرجع متاخر زي كل يوم يسلم عليها ببرود وبعد يتغدا يفرش فرشته ويرقد في الواطة يخلي ليها السرير بتاعهم بارد وموحش يذكرها بليلتهم الأولى لكن ما حتخليها تكون الأخيرة لو كانت الليلة ديك ما بتمثل ليه الا فشل واهانة لرجولته قدامها وانكسار لكرامته فهي بالنسبة ليها كانت نصر وفتح عظيم لانه وصل ليها وحارب مخاوفه عشانها حاول يهزم هواجسه النفسية ويقرب منها دفعه لكل ده غيرته عليها وحبه ليها حتى لو ما اعترف ليها بكده هي عارفة معمر كان عامل زي مراهق بقاتل عشان يثبت لحبيبته انه راجل بالجد وبستحقها كيف عايزها تنسى الحصل بينهم ده؟ كيف تتجاهل الاحساسيس الحستها معاه وفجرها جواها بعد السنين دي كلها اتنهدت وقالت في نفسها:مشتاقة ليه شديد البارد الغياظ ده
وقفت على حيلها لمن سمعت صوت باب الشارع فتح بعداك سمعت صوته بسلم عليها ببرود زي عادته ودخل اوضتهم طوالي مشت وراه ما حتخليه الليلة في حالو كفاية عليه اسبوع بحاله بعيد عنها عشان يتغلب على مشاعره السلبية بعد الحصل هي مرته في النهاية ما اي زول عشان يسفهها كده دخلت وراه متحفزة لشكله زي اي ست بيت سودانية اصيلة:انا عزمت معتز وعبير يجو يتغدو معانا بكرة
معمر باستنكار :واستشرتي منو عشان تعملي كده؟
اتخصرت ووقت قصاده بتحدي:استشرت ام روحتي دي بما انها الوحيدة البتتكلم معاي الايام الفاتت دي كلها ووافقتني لأنها ما شايفة مشكلة انها تعزم اخو راجلها و عروسته لبيت امو انت اعتراضك على شنو بالضبط؟
قرب منها ومسكها من حنكها:انتي عايزة تفتعلي مشكلة معاي
مش؟ شاف عيونها دمعت فك حنكها وزح منها كمل ببرود:
لكن انا ما حاديك الانتي عايزة عموما اهلا بيهم البيت بيتهم يجونا في اي وقت شوفي نفسك محتاجة لشنو ارسله ليك بكرة مع صبي من العمال وبخلي ليك قروش زيادة فالبيت تمام؟هزت راسها:ممكن امشي انوم ولا عندك دراما تانية؟
