تاني يوم الصباح سرا جاتهم بدري دقش كانت حتصم اضنين رحمة وهي واقفة جمبها في المطبخ تتابع حركتها وتساعدها
سرا:والله كنت جاياك امبارح يا رحمة لكن مفاصلي كانت واجعاتني قلت لروحي ما تتبعي نفسك الليلة يابت عشان تبقي كويسة اتغطغطت بالبطاطين ورقدت فوق سريري لحدي ما عرقت عرق العافية وصحيت الليلة كويسة
ياهو زي ما شايفة جيتك بدري كيف
رحمة حاولت تقاطعها عشان تسكتها:حمدلله على سلامتك
لكن محاولتها فشلت و سرا زي عادتها نقلتها لموضوع تاني:
امبارح مهاد السوسة دي جاتكم؟ البت دي انا ما قعد ارتاح ليها كلو كلو قلبي اباها وهي كمان شكلها الشعور متبادل عارفة ليه؟ عشان انا كشفتها ع حقيقتها وعرفت هي بتخطط لشنو اما انتي مسكينة يا رحمة الكديسة تاكل عشاكي اسمعي كلامي واقطعي رجلها من البيت النوع ده من البنات...
بحسم:سرا وقفي كلام شوية خلصتي عمل الشاي؟
سرا:اي خلصت امشي انتي صحي راجلك انا اكون انتهيت
طلعت من المطبخ وهي كاتمة ضحكتها البت دي مصيبة حرفيا مع انها عمرها 15سنة بس لكن ما بتلقى متعتها الا في الونسة والشمارات والقيل والقال عن الجيران والكلام عن خطيبها لكن رحمة ارتاحت ليها خصوصا انه معمر شكرها في تربيتها وأهلها لانه ابوها سيد احمد شغال عنده في الورشة وأول ما سمع انه محتاج بت تقعد مع مرته الكفيفة وتساعدها لكن تكون مضمونة و يقدر يثق فيها اقترح عليه بته الكبيرة الخلت المدرسة من المتوسطة وما لاقية شغل هي ما حصل اشتغلت في البيوت لكن ممكن تساعد رحمة فالبيت وتونسها زي خالتي آمنة الله يرحمها مقابل مرتب بسيط اقترحه ابوها لكن معمر ضاعفه ليها لمن دخلت الاوضة لقته جاهز خلاص وقعد يستعد للمرقة سئلها :قعد تفتشي في بندول مش؟ لاني سامع صوت سرا في المطبخ حسها جاي لحدي هنا
رحمة ضحكت:فظيعة يا معمر اصلو ما بتتخيل اول ما تبدا فالكلام تاني ما بتقدر تسكتها او تقاطعها لكن انا قلبي رادها والله انت خلصت؟ مستنياك عشان تسمعك النشرة الصباحية
اول ما طلع البرندة صبح عليها طوالي بدت فالتقرير الاخباري الصباحي وما سكتت تاني الا معمر كورك فيها وقاليها تسكت يا تمشي المطبخ تشوف شغلتها يا تقعد تشرب الشاي معاهم بهدوء مشت وهي بتطنطن لكن ما بتقدر تقول ليه شيء
رحمة سئلته:اتصلت على معتز امبارح؟
رفع حاجبه :لا كنت مشغول ليه بتسئلي عليه؟
اتنهدت:ما بقى عنده غيرنا يا معمر ولا انت عندك غيره بعد امك الله يرحمها كمان هو لمن سافر قالينا العقد بعد شهر بدون حفلة واول امس لمن اتكلمت مع عبير ما حسيتها عارفة ما حبيت اقوليها عشان مااعمل مشاكل بينهم من اولها
