صحت على صوت نسيبتها بتنادي فيها زي عادتها من شهر
خالتي آمنة :يلا حبيبتي الشاي جاهز عشان تشربي معانا
ما كانت بتتنازل من انهم يشربو الشاي وياكلو وجباتهم كلها سوا بالرغم من انه رحمة كانت بتحس كل مرة انو معمر عاوز يخنقها لأنه لحدي الآن ما قدر يتجاوز انه أمه اجبرته عليها وانها فضلت مصلحة الغريبة على رغبة ولدها كل يوم بعد الشاي بتتنفس براحة لمن تسمعه ببوس راس امه معناها خلاص طالع لشغله: "محتاجين حاجة يا امي؟ انا ماشي الورشة لو اتذكرتو شيء اتصلي علي او رسلي لي اي شافع يجيني هناك في الورشة" عرفت من نسيبتها انهاستلم شغل الورشة حقتهم دي بعد وفاة اخوه الكبير مبشر الله يرحمه الاستلم شغلها من ابوه كان شغال صيانة في جهة حكومية ولمن اتحصل على راس المال والخبرة الكافية فتح ورشته الخاصة بي في حلتهم قبل سنين بعيدة ومن وقتها اولاده بتوارثو في تشغيلها ما عدا معتز القرا هندسة مدنية عشان كدة معمر استلم الورشة بعد اخوه الكبير الربى وكان ليه زي ابوه والمعلم بتاعه العلمه صنعته معمر اختار يقرى صناعي واخد دبلوم المعهد الحرفي ومسك مصاريف البيت من عمر صغير عشان كدة كبر قبل اوانه بالرغم من انه عمره 26 سنة بس شخصيته شخصية راجل كبير مع انه لسه عنده شوية تصرفات صبيانية انتشلها من افكرها صوت نسيبتها :
يلا يا بتي شاييك برد
نفضت افكارها من راسها بسرعة:حاضر يا امي انا جاية
مشت سرعة سرعة وكانت في طريقها للبرندة لمن اتصدمت بحيطة في طريقها غريبة ما متذكرة انه في حيطة هنا كانت حفظت طريقها كويس في بيت نسابتها وبقت قادرة تمشي وتجي وتتحرك فيه براحتها لكن متاكدة ما كان في حيطة هنا رفعت يدها تتحسها فجأة اكتشفت انها ما حيطة او حيطة بشرية اتخلعت وحست بي نفوره منها لمن لزى يدها بعنف
معمر:ما مشكلة حصل خير اعملي حسابك المرة الجاية
ما عارفة جاتها الشجاعة من وين لكن سمعت نفسها بتقوليه:
لو في زول فينا مفترض يعمل حسابه فهو انت لأني زي ما عارف لسوء حظي ما بشوف وانت لحسن حظك بتشوف يبقى منو فينا المفروض يعمل حسابه ويشوف قدامه؟
شافها متخصرة وواقفة ترد عليه بكل برود كان عاوز يخنقها
ويرتاح منها معمر بغضب :شنوووو ما سامعك؟
رحمة خافت من صوته و فورته فيها رجعت لورى ولعنت نفسها ولسانها المتبري منها ده:مع.. ليش.. ما.. قص.. دي
نسيبتها جات شافتهم واقفين قصاد بعض والاجواء متوترة
آمنة:مالكم واقفين في باب البرندة كدة؟ وانت يا عمر مالك سالي سكينتك على البت كأنك عايز تقتلها زح من سكتها
اول ما زح وجهت كلامها لمرت ولدها:يلا ادخلي حبيبتي زح من الباب خلاص ما تخافي منو هو بطل يعمل مشاكل زي زمان حسب البعرفه طول ما خنق لي زول بيده
