معتز: :في حاجة عايزك تعرفها بلع ريقه وكمل:العروسة هي عبير الجاتنا هنا يومتها اخت عادل راجل مرتك المرحوم
معمر ببرود:وانا دخلي شنو يعني؟بعدين رحمة ذاتها ما اظن يفرق معاها لانها ما عندها مشكلة مع البت على حسب علمي
الصباح وهم بشربو في الشاي خالتي آمنة قالت خبر الخطوبة بتاعت معتز لرحمة :
احنا ماشين نخطب لمعتز يوم الخميس الجاي ان شاء الله
رحمة باركت ليه بفرحة وحماس حقيقي:الف مبروك يا معتز اكيد عروستك سمحة ورايقة زيك انت بتستاهل كل خير
معمر عاين ليها بامتعاض وسكت ما علق اما معتز قاليها:
الله يبارك فيكي بالمناسبة انتي السبب في الخطوبة دي
رحمه اتحيرت:كيف انا السبب؟
معمر عاين ليها بتركيز عشان يشوف ردة فعلها وقال:
معتز حيخطب عبير اخت عادل شافها لمن جاتك هنا
سكتت مسافة حاولت تتمالك نفسها وردت بفتور:
اتوفقت فاختيارك عبير ما بس سمحة ورايقة لا هي سمحة خلقة وأخلاق واهلها ناس كويسين ربنا يتمم ليكم على خير
آمنة اتحمست:لازم نجهز روحنا من هسي حأنقي اللبس الحنلبسه انا و رحمة.... حنمشي ليهم الساعة كم يا معتز؟
معتز:زي الساعة 6 مسا كدة يا امي معمر انت حاول ترجع بدري من الورشة عشان نقدر نوصل هناك في زمن مناسب
معمر:اكيد حاحاول اجي قبلها بساعتين على الأقل عشان امك تقدر تنقد وتعدل في لبسي وشكلي كويس ده يومها
رحمة بهدوء :معليش ياريت تقبل اعتذاري يا معتز انا ما حاقدر امشي معاكم بلغو عبير اعتذاري ومباركتي ليها كمان
امنة:ليه حبيبتي؟ انتي شكلك بتحيبها ومعتز اكد لي انك استقبلتيها كويس يوم جاتنا هنا في شيء نحنا ما عارفنه؟
رحمة:لا لا يا امي عبير بت ممتازة والله وانا بحبها من قبل ما اعرفها حتى بحكايات عادل عنها اطمني الموضوع ما بخصها
كملت بخجل من نظراتهم المتسائلة:انا بس....ما فارقتهم بلطف ابوها لسه بحملني ذنب موت ولده وقلبه واجعه عليه
ياريت تعفوني من المشية دي عشان الجو ما يكهرب فالقعدة
خالتي آمنة اتفهمت موقفها قلبها وجعها عليها ومعتز اتقبل الموضوع بسهولة لكن معمر اضايق ملامحه اتبدلت وقام خلى الاكل كلهم استغربو حتى هو ما كان عارف اضايق ليه
****
يوم الخميس :
الخطوبة كانت عبارة عن كارثة اول ما معمر ظهر ورى معتز وخالتي امنة طوالي حاج عثمان استلمه ليك واعتبره غريم لولده المرحوم عشان اخد مكانه وعرس مرته بعد موته صافحه ببرود عكس استقباله لمعتز وخالتي امنة الحاولت تلطف الجو شوية لكن ابو البت مصر يتمسك بموقفه العدائي
