اتتلفت حواليها تحاول تجمع هي وين لقت ولدها الوسطاني قاعد جمبها ماسك يدها ويدها التانية ماسكها وحدة بتقيس ليها في الضغط قعدت على حيلها بصعوبة :
انا وين؟ معتز انت جيت متين؟
باس يدها:جيت الليلة الصباح حمد لله على سلامتك يا امي طمنيني عليك مالك حاصل عليك شنو؟عشان ضغطك يرتفع كده الدكتور قال انك اكيد اتعرضتي لانفعال شديد
عاينت لولدها الصغير الكان واقف بعيد عنهم شوية ومدنقر
:ماف حاجة حبيبي اطمن ياهو مرض الكبر العمر خلاص كمل
كان حاسي روحه بتتاكل من الخوف والقلق عليها معاين في الارض بخجل ما قادر يرفع عينه في عينها كيف يكورك في امه كده معمر:بعد الشر عليك يا امي ربنا يطول في عمرك
اشرت للمرضة ومعتز يطلعو خلوني مع معمر برانا شوية
اول ما طلعو اشرت ليه يجي يقعد فالكرسي قريب منها كانت حاسه بيه وقارية كل مشاعر الاحساس بالذنب والخوف عليها قررت تستغل الفرصة دي:حمد لله على سلامتك يا ست الكل
عاينت ليه بقعر عينها بعتب:الله يسلمك يا ولدي
عيونه دمعت كان متعلق بيها شديد كيف ما يتعلق بيها وهو آخر العنقود واكتر واحد فيهم عاش معاها ورعاها:
حاعمل الانتي عايزة والله يا امي ما تزعلي مني
آمنة قامت تتسند بانفعال:بالجد يعني حتعرسها؟
سندها بيده:حاعرسها إن شاء الله انتي ارتاحي هسي بس
ابتسمت برضا:ما حتندم صدقني انا امك وعارفة مصلحتك
اتنهد بضيق :انا حاعمل كدة بس عشان ارضيك يا امي لكن...
قاطعته بسرعة قبل يغير رايه:نهاية الاسبوع نعقد ليك عليها إن شاء الله وتجي تعيش وسطنا انا حاقنعها بطريقتي
اتخلع:لكن يا امي انا..
آمنة ختت يدها فوق شفايفه:عاين حبة قلبي و آخرت صبري انا ما عايزاك تحبها او تعرسها عديل زي ما بتخيل ليك انا بس عايزة عقد شرعي يخليها تقدر تعيش وسطنا عشان اهتم بيها واراعيها وعشان عمها المتسلط ده كمان ما يطلعها من تحت عيني لأنها فالنهاية ما عندها غيرنا بعد امها الله يرحمها
معمر: الله يرحمها خير يا امي انا حعمل ليك الانت عايزة لكن ما تجي تطلبي مني اكتر كدة لأنه حيكون فوق استطاعتي
آمنة اتنهدت براحة:وانا ما عايزة منك اكتر من كده ربنا يبرد همك زي مابردت همي ياولدي
****
طلع من عند أمه زي القطر ما وقفه الا صوت اخوه النادى
معتز:معمر استنى مالك الحاصل شنو؟امي حصل ليها حاجة
