ضحك فارس : بس هم صرفوك
نواف : حتى انت صرفوك
ضحكت مريم : والله بثلاثتكم صرفوكم وانحاشو
فلاح : لا يا عمه انحم قالو انتم رجال البيت اجلسو واحرصو الحريم
ضحك نواف :والله تصريفه محترمه
فارس :اعقب ما احد صرفنا
ضحكت مريم : دامكم رجال البيت ف ترف الملاهي و ودي احد ياخذه
نواف لف شاف العيال ساكتين : انا باخذها ياعمه نادي ريم
ضحكت مريم : ريم تتجهز مو فاضيه لك
نواف ضحك :اووه نسيت طيب نادي فرح قولي لها تلبس عبايتها و تطلع انا انتظرها
مريم :ابشر
طلعت مريم شوي ورجعت شافت نواف وهو يجمع اغراضه :نواف
لف لها نواف : هلا يا عمه
مريم : لا تزعل من ترف ترا هي عنيده و تحب ترادد
نواف عقد حواجبه بستغراب : كيف ياعمه
مريم : شفت الجوال الجديد و سالتها وقالت لي والله اني هاوشتها بس انه عنيده ماتفهم
نواف :يا عمه ما صار شي وحلينا المشكله مابينا وانا كنت غلطان و اعتذرت عن غلطي
مريم : والله شوف انت معك حق بس ترف عنيده و انا اتمنى ذليوم ما تعصب وتهاوشها
ضحك نواف :ماني فاضي لها والله ولاني رايق
مريم : عشان كذا احذرك ودي تمشي معك ريم لكن ريم مشغوله ف ذلحين احذرك لانك عصبي و هي عنيده ودلوعه
نواف : وش رايش تمشين انتي وتشوفين بنفسش مين يبدا بالهواش
مريم : تمام بروح البس عبايتي
راحت ولف فلاح : يا حمار تاخذ عمتي وتتعبها معك
نواف : لو بتجلس بتدقق في وجيهكم يا هبلان و تدقق في انهم تاخرو وينشغل بالها وتعرف انه مريم دلوعة ابوها ولا ما تعرف مستحيل ترتاح الا قد شافت ابوها
فارس :صادق والله وفكرتك حلوه فكرنا في كل شي الا في ذي
نواف : انا ماشي مع السلامه
مشى نواف و جته مريم وركبت و شافت اغلب سيارات العيال في المواقف مريم :وي بسم الله وين راحو كيف مشو كلهم
نواف : عادي العيال انقسمو في سيارتين عشان الوناسه والشيبان في سياره تعرفين قليلين الشيبان
مريم :اي والله صادق
مشى نواف ولف على عمته : دقي على ترف و خليها تنتظرنا برا
مريم :ابشر
اخذت جوالها مريم و دقت على ترف : مامي ترف انتظرينا برا انحم جايين
ترف : تمام ماما لا تتاخرون لانه مليت و جوالي بيخلص شحن
مريم :معلاش انحم في الطريق
قفلت مريم ولفت له : جالسه تنتظر
نواف :زين
مشى نواف و وقف عند الملاهي و ناظر الساعه اللي تشير لي ١١ و لف لي عمته : ما دقيتي عليها
مريم :ادق بس ما ترد مدري وين راحت
نزل نواف من السياره :بروح اشوفها وين
مريم : تمام ياولدي بس كيف تعرفها
نواف : كيف شكل شنطتها
مريم : شنطه صغيره تنلبس على الظهر لونها اسود و فيها دبدوب ابيض صغير
نواف : تمام اي وحدها لون شنطتها كذا و وصفها كذا بمسكها بشعرها واجيبها
مريم : لا ياولدي ليه ليه كل ذا العصبيه
نواف : لا ولا شي بس ما احد قال لها تحمل جوال و لا ترد عليه ولا ما احد قال لها انه تنتظر برا
نزل نواف و هو شياطين الجن تلعب فوق راسه دخل الملاهي ولف المكان كله شوي و شاف وحده متكيه هناك و تدخن نطق بينه وبين نفسه اعوذ بالله الله لا يبلانا شوي ولف و شاف نفس الشنطه الي عمته وصفتها راح عندها و اول ما شافته رمت بالسيجاره و دعستها
نواف : انتي ترف
ترف و هي تلعثم : ايه وش دخلك
نواف : قدامي قدامي عند امش وبعدين وش ذا اللي شايفنه هاه ما تستحين على وجهك
ترف : نواف انا في وجهك انك تستر علي استر على بنت عمتك انا اخطيت والله اخطيت بس والله ودي اجربه
نواف : من وين لش اساسا
ترف : انا شريته
نواف :اني داري انهم صديقاتش مخربينش ولا تربية عمتي و عمي مافيها غلط
ترف :والله ماهم صديقاتي و صديقاتي حلفو لو يشوفوني ادخن بيقاطعوني اساسا زعلو مني يوم شافوني
نواف :طيب من متى وانتي تدخنين
ترف :والله ذي ثاني سيجاره الاول قفطتني صديقتي و ما خلتني اجربها والثانيه انت خربته علي
نواف مد يده : اعطيني الكرتون جيبيه
ترف : لا بتعلم امي وابوي امانه يا نواف ما تعلم علي نواف ابي امان
نواف : لا ما بعلم احد جيبي والله انه انتي في حماية الله و امانه ثم في حمايتي واماني
ترف :والله ما اعطيك
نواف : بنت والله وامان الله انش بحمايتي وانه مايوصلش شي بس اعطيني
ترف : لا خايفه ابي منك امان انا ضايعه و ماعرف شي تكفى
نواف تكلم بصوت هادي : لا تخافين وانا واقف معش والله ما اسمح لي شي يضرش وانتي في امان الله و في وجهي و شنبي
سحبت ترف شنطتها واخرجت البكت و فتحه و شاف انه صادقه ماهو ناقص الا ثنتين
شوي و فجأه من دون مقدمات و نواف يقلب البكت في يده جت مريم :بسم الله وين تاخرتو
نواف خبى البكت في جيبه ولف لها : هلا ياعمه
مريم : وش خبيته
نواف :ولا شي
ترف و هي ترجف خايفه يفضحها
مريم :نواف ما عهدتك تكذب ترا شايفتك خبيته حاجه
نواف دخل يده في جيبه واخرج جوال ترف القديم : ولا شي ياعمه بس انا قلت لش في البيت انه انا اخطيت و انا بحاول اصلح خطأي
مريم :مافهمت كيف تصلح خطاك
نواف :ولا شي بس صلح جوالها القديم واعطيتها بس رفضت تاخذه
مريم :طيب انا ما سالتك عن الجوال سالتك عن اللي دخلته في جيبك
