ضد الرجال

الفصل السادس عشر

أينما كنت، وأينما وصلت، سأظل أنا حلمك الذي لم يكتمل، وحورية عقلك المستحوذة على كل أحلامك، وحتى خيالاتك، لست تلك الأنثى القابلة للنسيان.

                      *************

_انا متخيلتش أنك تعمل كل ده علشاني، رغم أن قلبي كان بيقولي أنك مستحيل تتخلى عني، أنا مش مصدقة يا رامي إني المفروض أنزل أختار فستان خطوبتنا وهعيش كل المراحل دي معاك انت.

مال برأسه يحتضن ما بجانبه، يجيبها بهيام.

_انا مستحيل أتخلى عنك ابدًا، دانا من يوم ما قلبي دق وعرف يعني إيه حب، دق ليكي، ولسه يحياتي كل اللي جاي بينا هيكون خير وبس، أنا بحبك يا شهيرة، ومش عايز من الدنيا دي كلها غيرك أنتي وبس.

ورغم صمتها الذي دام للحظات، كان يسمع هسيس أنفاسها، ويستشعر خجلها في كل مرة يبوح لها بمشاعره الصادقة التي لم يصطنعها يومًا.

حاولت التهرب منه وقلبها يخفق بشدة وهي تحتضن أميرة بحنان قائلة.
_طب أنا هكلم رنا علشان تنزل معايا اليومين دول ونجيب كل حاجة للفرح سوا.

تدلل عليها بصوت هامس قائلًا.
_عايزاني اسيب أختي تروح معاكي كده ببلاش، سوري فين الرشوة؟

كانت تفهم ما يلمح عنه، واجابته بخجل.
_رامي متهزرش بقا.

تصنع الحزن أكثر وهو يداعب خصلات شعره.
_مليش دعوة، مانا لو يوسف الشريف كنتي قولتيلي بحبك من غير ما اتحايل عليكي.

ضحكت بصوت مسموع جعلته يهيم بها عشقًا أكثر قائلًا.
_كروااااان، أنا بحب كرواااااان ينااااااس، يلا بقا قوليلي بحبك يا رمومي خليكي شطورة.

لم يتحمل ذلك الجالس بجانبه علاقته اللوحة تلك، وصرخ بأذنه.
_يعمممم بحبك، بحبكككك يرمومي، خلصنا ابوس ايدك عايزين نتكلم في الشغل.

انتبه رامي متفاجئًا من صوت غالي المزعج، بينما صُدمت شهيرة عندما سمعته من الجهة الأخرى ومن شدة صدمتها أغلقت الهاتف في وجهه وحمرة الخجل تعتري وجهها.

اعتدل في جلسته يقول بحزن.
_عاجبك كده اهي قفلت في وشي، كنت خلاص قربت وهسمع كلمة عدلة ياخي.

ضحك محمود الذي يشاركهم الجلسة قائلًا.
_والله أنت جبته لنفسك يا غالي، انت اللي خطبتله، اللي زي ده يعيش طول عمره سنجل ولا يجلط البشرية بتلزيقه.

نظر نحوه غالي باستياء.
_وحياتك مش هو بس اللي ملزق، في ناس تانية بيتدلقوا زي الجردل مبنعرفش نسيطر عليهم.

كان يقصد غالي الموقف الذي حدث بين محمود ورنا شقيقة رامي، لكنه لم يريد التوضيح بشكل مباشر كي لا تفتعل المشاكل بين الاثنين، وبسهولة كان قد فهم محمود متنحنحًا.
_احم احم، أنا بقول نتكلم في الشغل على طول.