HER NAME IS MY EX'S NAME

Part 4

KINABUKASAN, FRESH NA FRESH ngang pumasok si Jaz sa trabaho. Gandang-ganda siya sarili dahil suot na niya ang damit na kaniyang binili sa mall kahapon. Pak na pak ang kaniyang OOTD. Pang-rich. Sosyalin. Kung hindi nga lang siya kilala sa resort ay tiyak na pagkakamalan siyang guest o customer.

"Ang ganda mo ngayon, Jaz," papuri sa kaniya ng isang katrabahong lalaki.

"Jaz, para kang anghel ngayon," sabi naman ng isa na alam niyang may gusto sa kaniya pero dinededma niya.

"Para kang artista ngayon, ah?" sabi pa ng iba. Which was ikinatuwa naman niya dahil napatunayan niyang maganda nga siya ngayong araw. Hindi nga nagsisinungaling ang salamin niya kanina.

"Salamat," kinikilig na pasalamat naman niya bago niya sila lampasan.

At dahil maaga pa para pumasok ay sinamantala niya ang oras na naglibot-libot muna sa resort. Isang paraan na naisip niya para makita siya o makita niya si Raff Fontanilla. Umaasa siya na makasalubong niya ito ngayon at makikilala.

Ginaya niya ang mga napoponood niya sa TV na paglalakad ng mga mayayamang babae. Kunwari abala siya sa pagtingin-tingin. Kunwari ay gandang-ganda siya sa dagat at ngayon lang siya nakapunta roon.

Ang hindi alam ni Jaz ay nagtagumpay agad siya sa plano niya dahil kanina pa siya pinagmamasdan ng lalaking puntirya niyang paibigin. Saktong paglabas ni Raff sa resort ay napatingin ito sa gawi ni Jaz at agad itong humanga sa ganda ng dalaga. Nagising ang diwa niyang aantok-antok pa kanina.

Umihip ang hangin kaya nilipad ng hangin ang buhok ni Jaz, lalong nagpaganda iyon sa paningin ng binata. At sa paglinga ni Jaz ay nakita na rin niya si Raff na nakatingin sa kaniya.

Awtomatiko ang pagsirko ng puso ni Jaz. Kinilig siya nang husto. Sabi na nga ba niya at mabibighani agad ang prince charming niya sa kaniyang kakaibang ganda.

Ngumiti sa kaniya si Raff na syempre ay nginitian din niya nang pagkatamis-tamis. Sa totoo lang ay parang hihimatayin siya sa sobrang kilig.

"Grabe ang guwapo niya sa personal," naibulong niya. Bigla ay nanigas siya nang makita niyang kumilos na si Raff. Papalapit na sa kaniya ang binata.

"Juskolord, ito na 'yong moment na pinapangarap at napapanaginipan ko. Sana kayanin ko ang kilig, Lord," pasimpleng dasal niya nang ibaling niya ang tingin sa dagat.

Malapit na malapit na sa kaniya si Raff, subalit sa kamalasan, bigla ay may asungot na dumating at sumigaw.

"Hoy, babae ka! Ano'ng ginagawa mo d'yan?!" si Misis Santos siya. Ang kanilang manager sa housekeeping team na istrikta pa sa istrikta pero mabait naman.

"Paktay!" Napangiwi siyang lumingon at nang tingnan niya si Raff ay kunot na kunot na ito.

"Malapit na ang oras ng trabaho prenteng-prente ka pa rito! Ano ka senyorita?!" Patungo na sa kaniya si Misis Santos, pero saglit itong tumigil nang makita nito si Raff. Nagbigay pugay muna ito sa anak ng may-ari ng resort. "Ay, kayo pala 'yan, Sir. Dumating na po pala kayo. Good morning po."

Simpleng tango lamang ang ginawa ni Raff bilang tugon kay Misis Santos, pagkatapos ay muling tumingin ito kay Jaz. Hindi na lang ito nakakunot ng noo, madilim na talaga ang mukha nito.

Napayuko naman ng ulo si Jaz. 'Yung yuko na abot sa kaniyang dibdib ang baba niya. Hindi na siya makatingin kay Raff dahil nahiya na siya. Sigurado siya na gets na nito na isa lamang siyang tauhan sa resort kaya kung tawagin siya ni Misis Santos ay gano'n na lang. At malamang nadismaya na ito sa kaniya kaya ganoon na lang ang kunot na ng noo nito habang tinitingnan siya.

"Excuse me, Sir," magalang na paalam ni Misis Santos sa binata. Galit na itinuloy ang paglapit sa kaniya. "Nababaliw ka na naman bang babae ka? Ano'ng nakain mo at rumarampa ka rito, ah?! Hindi ka ba nahihiya sa balat mo?! Tingnan mo nga ang sarili mo, mukha kang ewan! Nandiyan pa naman na si Sir Raff!"