HER NAME IS MY EX'S NAME

Part 5

NAKASALUBONG NAMAN NI RAFF ang general manager ng resort na si Jex. Pamangkin ito ng bagong asawa ng dad niya na may-ari ng resort. At naging ka-close niya ito noon pa man na unang nagbakasyon siya doon. "Oh, ba't parang badtrip ka, dude?"

"Badtrip talaga ako, dude, hindi lang parang," tuloy-tuloy ang malalaki niyang hakbang na sagot. Nag-init talaga ang bunbunan niya sa nalamang Jaz ang pangalan ng babaeng muntik na niyang ipagtanggol.

"Huh?! What happened?!" habol sa kaniya ni Jex.

Tumigil siya at itinuro ang kinatatayuan nina Misis Santos at ng babaeng kinamumuhian na rin niya ngayon. "You see that girl? Alam mo bang... Uh, damn that name!"

"Huh? Bakit ano'ng problema kay Jaz?"

"Aahh!" Wari ba'y nasaktan ang pandinig ni Raff nang banggitin ni Jex ang pangalan ng dalaga. Napatakip pa siya sa tainga habang ngiwing-ngiwi.

"Ayos ka lang ba, dude?"

Inayos ni Raff ang sarili. Bumuntong-hininga. "Dude, I want you to fire that woman ASAP! I don't want to see her face here again. Ayokong nandito siya at pakalat-kalat dito sa resort habang nandito ako."

"What? Bakit naman? May ginawa ba siya?"

"Just do it!"

Pati tuloy si Jex ay naiwanan sa kinatatayuan ay nakanganga na rin katulad nina Jaz at Misis Santos.

"ANO BA KASI'NG NANGYARI? Ba't biglaan na tinanggal ka? Ano'ng ginawa mo?" Hinahagud-hagod ni Cleo ang likod ni Jaz nang nasa housekeeping locker room na sila na magkaibigan.

"Wala naman akong ginawa, eh. Sinuot ko lang 'yung binili kong damit tapos inirampa ko lang tapos nag-posing-posing lang ako tapos ayun na 'I'm fired' na raw agad sabi ni Sir Raff," paliwanag ni Jaz na ngumangawa. Halos 'di na maintindihan ang sinasabi niya dahil sinasabay niya iyon sa pag-iyak.

"Pero wala ka ba talaga sa oras ng trabaho?"

"Wala pa nga. Kaya nga rumarampa pa ako, eh."

Tumabingi ang mukha ni Cleo. Nagtaka na rin kung bakit gano'n.

"Tulungan mo ako, Besh. Ayokong mawalan ng trabaho." Hinawakan niya sa braso ang kaibigan.

"Heh!" Pero pinalis iyon ni Cleo. "Tumahimik ka nga! Kagagahan mo rin kasi minsan, eh!"

"Malay ko ba kasing bawal na pala ngayong mag-posing-posing. Wala naman akong natanggap na memo," katwiran pa rin niya.

Inirapan siya ni Cleo. Pero ito man ay naniniwala rin namang wala sa katwiran ang biglang pagtanggal kay Jaz. Ngunit dahil utos ng anak ng may-ari ng resort ay wala itong masuhistyon o magawa.

"Jaz!" saglit ay bungad ni Misis Santos.

Napatayo nang maayos ang magkaibigan. Ayaw pa sana ni Jaz pero kasi ay kinurot siya sa pwetan ni Cleo at binulungan na umayos. Sisinghot-singhot tuloy siya na humarap kay Misis Santos.

"Huwag ka nang umiyak. Hindi tuloy ang pagsisante sa 'yo ni Sir Raff," buti na lamang at good news na sabi ng ginang.

Unti-unting nagliwanag ang mukha nilang magkaibigan. Lalo na si Jaz na nanlaki talaga ang mga mata.

"T-talaga po?!"

Tumango si Misis Santos. "Kaya umayos ka na. Ayusin mo 'yang sarili mo."

"Opo. Salamat po. Salamat po talaga, Misis Santos." Hindi mailarawan ang sayang naramdaman niya. Salamat sa Diyos at may trabaho pa rin siya.

"H'wag ka sa 'kin magpasalamat. Kay Sir Jex ka magpasalamat kasi siya ang nakipag-usap kay Sir Raff na huwag kang tanggalin."

Sunod-sunod ang naging tango ni Jaz. "Opo, sige po. Magpapasalamat din po ako kay Sir Jex."

"Oh, siya back to work na. Sige na." Iiwanan na dapat sila ni Misis Santos nang muling lumingon ito sa kaniya nang may maalala. "Jaz, sabi nga pala ni Sir Jex ay iwasan mo raw si Sir Raff. Hangga't maaari daw ay huwag kang magpapakita sa kaniya. Iwasan mo siya nang maigi dahil kahit isang hibla man ng buhok mo ay ayaw na ayaw raw niyang makita. Oras na makita ka raw ulit ni Sir Raff ay hindi na siya magdadalawang isip na tanggalin ka sa trabaho. Naiintindihan mo ba?"

"Po?" N gitla na naman si Jaz.

"Bakit parang ang harsh naman po yata ni Sir Raff kay Jaz, Misis Santos? Parang ang OA sa naging desisyon niya?" hindi nakatiis na tanong ni Cleo.

"Aba'y hindi ko alam. Siguro naalibadbaran sa pagmumukha ni Jaz. Ang panget niya kasi," taas noong sagot ni Misis Santos at umalis na. Ganoon talaga ito, minsan mabait, minsan maldita. Hindi maintindihan ang ugali. Palibhasa ay malapit na yatang mag-menopause.

Muling nagkatinginan sina Jaz at Cleo.

"Bakit nga kaya gano'n sa akin si Sir Raff?" Pagpapatuloy na iyak na naman ni Jaz kalaunan. "Wala naman akong ginagawang masama sa kaniya, ah. Crush ko pa nga siya. Gusto ko nga, eh, paglingkuran sana siya. Pero ba't siya ganoon sa 'kin na parang kinasusuklaman na niya ako agad?"

"Wala nga ba? Baka naman may nagawa kang hindi maganda sa kan'ya na ikina-turn-off niya talaga sa 'yo o ikinainis?"

Tumigil sa pag-iyak si Jaz pero natulala naman siya nang inisip niya kung wala nga o meron siyang nagawa na masama kay Raff.