شـــــلة بنــــاات الشـــــرقيــــة

23

" رجعت إلهام للبنات ليان ما انتبهت انها كانت مع راكان اما شهد فانتبهت .."
ليان : وين كنتي ؟ تأخرتي ..
إلهام : تمشيت عالبحر ..
شهد : كنتي لحالك ؟
إلهام : ايه من بيكون معي مثلاً ؟
شهد : لااا بس أقول .. يلا استأذنكم لازم ارجع البيت ..
إلهام : تو الناس ..
شهد : لا احس اني تعبانه و لازم اروح البيت ابي انام ..
ليان : اوك براحتك أنا و إلهام بنظل صح إلهام ؟ بتقعدين معي ؟
إلهام : طبعاً ..
شهد : يلا تصبحون على خير ..
إلهام و ليان : و انتي من اهله ..
" شهد اركبت السيارة مع راكان و قالت له ....."
شهد : يلا خلينا نمشي ..
راكان : مو بدري ..؟
شهد : راكان أنا عارفه انك وافقت تقعد عشان إلهام لا ورحت تسولف معها بعد و بكل وقاحه الهام تقول انها كانت لحالها ..
راكان : احترمي نفسك يا شهد اشلون تقولين عن خويتك كذا ؟
شهد : لانها تحب شخص ثاني و تمشي معك كأنها تبي الكل يحبها ..
راكان : ادري انها تحب شخص ثاني و انا اللي طلبت إني اسولف معها هي كانت رافضه بس انا قلت لها ان الموضوع يخص ابراهيم فجت ..
شهد : ما ادري اشلون انا قلت عن الهام كذا طلعتوني عن طوري ..
راكان : خلاص انسي الموضوع لا تجيبين طاري حق أي احد ..
شهد : ما رح اجيب هالطاري و لاهو بشي ينقال اصلاً .. بس انت اش عرفك بقصتها مع ابراهيم ؟
"حكى لشهد كل شي بالطريق و لما وصلوا البيت و راح راكان حق اخوه وليد و كان طاير من الوناسه .. و حكى له كل شي صار معه .."
راكان : ما ادري اش قول لك بس انا مرة مبسوط لانها قدرت تفتح لي قلبها ..
وليد : اصحى .. انت قاعد تحلم ..
راكان : لا تكفى خلني حتى لو كنت احلم انا عايش اللحظه و احس انه قريب رح تكون لي ..
وليد : والله أنا خايف عليك لا تنصدم بعدين لما ما تصير لك ..
راكان : لأ وليد من اليوم و كل يوم رح ادعي ربي انها تصير لي ..
وليد : اش الشي المميز فيها اللي اخذ عقلك و تفكيرك ؟
راكان : فيها اشياء واجد ما تحصلها بالبنات الثانيات هي تفكر بقلبها قبل لا تفكر بعقلها ياخي انا يوم تكلمت معها حسيت بحنانها اخ ما اقدر اوصف لك الشعور لانه صعب ينقال بالحكي ..
وليد : المشكلة انها اعترفت لك بلسانها انها تحب شخص ثاني و انت على امل انها تحبك ..
راكان : صحيح هي تحب شخص ثاني و انا اعرفه بعد بس شكله ما يحبها و اخاف انه يلعب عليها مع ان اخلاقه ما تبين انه كذا ..
وليد (بحيره) : امم اللي ابي افهمه انت من يوم رجعنا من لندن قررت تنساها ليه رجعت لها مره ثانيه ..؟
راكان : يا اخوي حاولت و حاولت كل ما ابي انساها تطلع فجأه قدامي .. يا الله يا رب انها تكون من نصيبي ..
وليد : ما اقول غير آمين و الله يعينك بس على ما بلاك ..
------------------------------------------------------------------------
" ظلت إلهام مع ليان بالبحر و اخذتهم السوالف .. "
ليان : يا الله رح اشتاق للبحر باقي 3 ايام و تفتح الجامعات ابوابها و ما رح افضا اجي البحر بعدين ..
إلهام : إلاا يوم الخميس و الجمعه بعدين احنا مو كل يوم نروح الجامعه ..
ليان : معك حق بس ما احس بحلاوة الطلعه زي ايام الاجازة ..
إلهام : اش نسوي هذا مستقبلنا ..
ليان : معك حق .. ( بعد دقيقة صمت ) .. قولي لي اش اخبارك مع ابراهيم ؟
إلهام : لا تسأليني ..
ليان : ليه في شي ما تبيني اعرفه ..؟
إلهام : بقولها لك و باختصار ابراهيم ما يحبني اعترف لي بهالشي و انا ذليت نفسي له بما فيه الكفايه و خلاص عافته نفسي ..
ليان : اف اف اف لهالدرجه .. قولي لي اش صار بالتفصيل..
إلهام : ما لي خلق احكي ..
ليان : خلاص اجل انا بسأل ابراهيم و بشوف ..
إلهام : لا .. لا .. لا تسألينه و لا تتعبين عمرك الموضوع انتهى بالنسبه لي ..
ليان : انتي اش قاعده تقولين بهالبساطه و السهوله ؟ هذا اذا دل على شي فهو يدل على انك ما كنتي تحبينه اساساً ..
إلهام : انتي اكثر وحده تعرفين انا اش قد كنت احبه ..
ليان : كنتي ؟!..
إلهام : أي كنت لاني اللحين ما عدت احبه ..( و بسرعه كذا غيرت إلهام رايها ) .. ياربي اضحك على مين أنا .. والله اني اعشقه و اموت فيه و احبه اكثر من عمري حتى و اشتقت له موت و ودي اشوفه قدامي على طول و لا يفارقني احبه والله احبه ( و طاحت دموعها ) ..
ليان : بسم الله الرحمن الرحيم .. خلاص هدي ليه البكا ؟
إلهام : لاني احبه و هو لأ ..
ليان : وين كلامك اللي بالبدايه انه كل شي انتهى ..
إلهام : حاولت اكابر و انساه بس ما قدرت .. ليون قولي لي هو ليش ما يبيني ؟ طيب ليش ذاك اليوم اعترف لي بحبه ؟ أنا غلطت عليه بدون قصد ؟ أو هو شاف فيني شي ما يعجبه ؟
ليان : يا حبيبتي يا إلهام مليون شخص يتمناك و انتي ما فيك أي شي من اللي قلتيه .. هدي هدي و ان شاء الله خير ..
" رجعت إلهام عالبيت و كانت مو طايقه احد راحت غرفتها على طول .. بعدين حست بالعطش فراحت المطبخ و الصدفه ان سعود كان هناك و الهام على المشاكل اللي صارت لها نست انه عمها و اهله عندهم بالبيت .."
إلهام : بسم الله خوفتني ..
سعود : اوه هلا الهام ..
إلهام : يا الله نسيت انكم ببيتنا خل اروح احط شي على راسي ..
سعود ( يا الله طلعت البنت شقرا ) : لا الهام تعالي انا ولد عمك عادي .. بعدين خلاص شفتك ..
إلهام : وش تقول انت وش تهذر ؟ انت ما عندك غيره على اختك عادي لو احد من اخواني شافها و هي مو حاطه شي على راسها؟ ..
سعود : عندي عادي هاذيل عيال عمها ما هم بغريبين ..
" جت الهام بتروح ما عاد تبي ماي من يوم شافت هالخشه .. ناداها .."
سعود : إلهااام لحظه .. تراني قررت اخطبك ..
" كان هذا الشيء كصاعقه جت على راس الهام .. لفت عليه لا اراديا و كانت حدها معصبه .. كافيها هم .. "
إلهام : شوف انتبه و اقولها لك مره ثانيه انتبه تفكر مجرد تفكير اني رح اكون شريكة حياتك في يوم من الايام .. و ما رح يصير هالشي ..
سعود : ليه انا احبك و كله افكر فيك من يوم شفتك اول يوم جينا فيه هنا .. كنت ادري ان لي بنت عم بس ما توقعتك بهالجمال ..
إلهام : هههه ( ضحكة سخريه ) متى امداك تحبني هااا ؟ و بعدين انت مقياسك للحب هو الجمال لآخر مره اقولك أنا ما احبك و لا ابيك و لا جيت ببالي اصلاً .. و مستحيل نكون لبعض لو ايش ما يصير ..
سعود : تتحديني يعني ..
إلهام : يا عمي سمها زي ما تبي تسميها بس أنا و انت ( تأشر على نفسها و عليه ) مستحيل نكون لبعض ..
سعود : اوك أنا من اللحين اقولك حطيتك براسي و انتي رح تصيرين لي رضيتي و لا لأ رح تصيرين لي ..
إلهام : بينت على حقيقتك اللحين .. و كأني بخاف منك ..
سعود : انتي ليش مو راضيه تفهمين قلت لك احبك هاوشتيني و صارختي علي حديتيني اقولك هالشي ..
إلهام : لا تحلم واجد .. ههه كنت جايه ابي ماي بس سدت نفسي كرهت الماي و اهله ..
" لفت و طلعت .. لكن سعود ما رح يسكت .."
سعود ( بخاطره ) : معليه رح تكونين لي يعني لي و انا حطيتك براسي .. و نشوف من اللي بيضحك بالاخير ..
------------------------------------------------------------------------
" ليان وصلها السايق عالبيت انزلت من السيارة و السايق راح يوقف السيارة بالكراج إلا يطلع لها عامر من ورى جدار بيتهم و يحط ايده على فمها بقوة حتى لا تصارخ .."
عامر : أنتي ليش مو راضيه تسمعيني او حتى تفهمين انا اش قاعد اقول .. قلت لك اني احبك و اعجبتيني تروحين تكلمين واحد عشان يجي لي ..
ليان : اتركني يالواطي يا عديم الاصل و التربية ما بقى الا احب اشكالك ..
عامر : اسكتي ما ابي اسمع هالكلام تدرين اني اقدر اخطفك اللحين لكني ما رح اسويها انا جيت بس اعلمك اني احبك بهدوء لكن ما تدرين المره الجايه اش ممكن اسوي ..
ليان : يالخسيس انا سكت لك واجد لا تفكرني بسكت هالمرة ..
" السواق سمع ضجه فجا يشوف اش السالفه .. و على طول تركها عامر لما شاف السواق و راح ركض على سيارته و مشى و ترك وراه بنت مرعوبه بغت تموت من الخوف دخلت و هي تبكي ما تدري من هذا و ليش هي بالذات .. دقت على شهد على طول .."
شهد : اهدي شوي ليش تبكين .. ؟ خوفتيني عليك .. اهدي و علميني اش صار ..
ليان : هذاك .. هذاك الواطي اللي يلاحقني ..
شهد : اش فيه سوا لك شي ؟ رجع يلاحقك مرة ثانيه ..؟
ليان : مسكني و هددني كنت خايفه .. أنا لازم اعلم ابوي او نواف ما رح اسكت له هالمرة .. صرت اخاف اطلع لحالي ..
شهد : اهدي و لا تعلمين احد خلاص انا رح اقول لراكان لانه صار عنده علم بالموضوع ما نبي السالفه تكبر اخاف اذا علمتي ابوك او اخوك رح يفهمون غلط او يمكن حتى يمنعونك من الطلعه ..
ليان : صح معك حق بس تكفين قولي لراكان يتصرف .. و لا ترى رح اعلم ابوي و اخوي و اللي فيها فيها ..
شهد : خلاص خلاص رح اتصرف انتي اللحين روحي اخذي حمام هادي و انسي اللي صار بعدين حطي راسك و نامي و لا تفكرين بشي خلي كل شي علي ..
ليان : طيب .. اش رح تسوين ؟
شهد : انتي ما عليك سوي اللي قلت لك عليه و اتركي الباقي علي ..
" كان كلام شهد شوي مطمئن لكن مع ذلك ليان ما ارتاحت سوت زي ما قالت لها شهد و حطت راسها عالمخدة لكن جافاها النوم من الرعبه اللي اكلتها .. و اخيرا جاها النوم يوم قرب الصبح نامت و نومتها كانت كلها كوابيس .. "
" شهد بدورها راحت حق اخوها راكان و قالت له اللي صار مع ليان .. و بدون ما يحسون وليد سمع كل شي .."
وليد : اوف اش هذا اللي تقولينه يا شهد ؟
شهد : وليد ؟! انت من متى هنا ..؟
وليد : سمعت كل شي صار .. بس اش دخل راكان تقولين له ..؟
شهد : لانه كان معنا اول مره دقت ليان علي يوم كانت رايحه البحر و قالت لي انه في شخص يلاحقها فأخذت راكان و رحنا .. يوم جا راكان بيروح لذاك الشخص انحاش ..
وليد : اهاا .. طيب ليان هذي ما عندها اخوان ..؟
شهد : إلا عندها اخوها نواف اللي معكم بالشركة .. بس بما انه راكان دخل بالموضوع قلنا نكمل الموضوع ما نبي السالفه تكبر ..
وليد : و الله سالفه .. و ما عرفتوا من هذاك الشخص او كيف عرف ليان ..
شهد : لا والله ما عرفنا .. هاا راكان بتكمل و لا لا ؟
راكان : افا عليك اكيد و بعد اللي قلتيه انا مصر امسك الزفت الواطي هذا و اعلمه قدره ..
وليد : و الله الود ودي ما تدخلون بالسالفه ..
راكان: ما احنا دخلنا و خلصنا ..
وليد : اجل انتبهوا على انفسكم و علموني باللي يصير معكم اول باول ..
شهد و راكان : اوك اكييييد ..
راكان : ما قلتي لي اش بنسوي اللحين ..؟
شهد : والله ما ادري بس تدري لازم ليان تكلمه بحضورنا طبعاً .. لازم نعرف عنه كل شي ..
راكان : فكرة حلوة بس تعتقدين ان ليان ممكن تكلمه ..
شهد : رح اشوف رح اسألها بكرة ا ن شاء الله ..
------------------------------------------------------------------------
" في اليوم الثاني قرر سعود يكلم ابوه بموضوع زواجه من الهام كان سعود مره جاد بالسالفه .. "
سعود : يبا انا قررت و ابي اتزوج ..
ابو سعود : صدق والله هذا احلى خبر سمعته اليوم .. و العروسه علي ..
سعود : هااا ( ما كان حاسب حساب ان ابوه حاط فباله عروسه له ) : لا انا اخترت البنت اللي ابيها تشاركني حياتي ..
ابو سعود : لأ مو على كيفك .. شوف انت ما رح تاخذ غير بنت عمك ..
سعود ( قام يضحك ضحك هستيري ) : ههههههههههههههههههه ..
ابو سعود : ليش الضحك اللحين ؟
سعود : لانها هذي البنت اللي فبالي ..
ابو سعود : ههههههههههه والله زين لاني تكلمت مع عمك بهالموضوع .. بس كنت شايل همك انت خفت انك ترفض ..
سعود : لا ما رح ارفضها ابد بالعكس انا ابيها و احبها .. طيب اش قال عمي عن الموضوع ..؟
ابو سعود : هو ما عنده مانع .. بس باقي راي البنت ..
سعود : هذي المشكلة يبا ..
ابو سعود : ليش ؟ ..
سعود : البنت ما تبيني .. سألتها امس و قلت لها اني ابي اتزوجها رفضتني بقوة و قالت ما تبيني ..
ابو سعود : المهم انت تبيها ؟
سعود : أي اكيد ابيها ..
ابو سعود : خلاص معناته ما في أي مشكله البنت ما لها راي و اخوي يعرف هالشي و انا اقدر اقنعه ..
سعود ( بفرح ) : ان شاء الله يا رب تكون من نصيبي ..
ابو سعود : رح تكون ان شاء الله رح تكون ..