شـــــلة بنــــاات الشـــــرقيــــة

42

  " ليان كانت طالعه من بيت إبراهيم و دق جوالها كان المتصل إلهام .."
ليان : اوه إلهام اليوم صباحية زواجك اش عندك داقه ..؟
إلهام : هذا بدال ما ترحبين فيني تقولين لي هالكلام ..
ليان : لا بس مستغربه ..!!
إلهام : و لا تستغربين و لا شي .. يكفيك الكلام اللي سمعته اياه خليته يهز بدنه ..
ليان : لااا مو من جدك .. من بدايتها هواش و نجره ..
إلهام : اش فيك انتي تتكلمين و كأني قايله اني رح اعيش معه بسبات و نبات ..؟!
ليان : ههههه والله انتي لازم تسوينها و تعيشين على قولتك بسبات و نبات ..
إلهام : على جثتي .. انتي شفتي ابراهيم ؟
ليان : ليه تسألين انتي متزوجه أللحين ..
إلهام : ليون لا تنرفزيني تراني ما لي خلق اللي فيني مكفيني .. جاوبيني بسرعه ..
ليان : بجاوبك بس ما يصلح بالتلفون ..
إلهام : اجل تعالي البيت ..
ليان : هههههههههههه ضحكتيني انتي مو في بيت اهلك عشان اجيك بعدين اشلون اجيك اصلاً و زوجك عندك ..
إلهام : اذا ما جيتي انا بجي ..
ليان : وين تجين ؟
إلهام : بيتكم ولا نروح أي مكان .. المهم ابي اشوفك ..
ليان : مشكلتي اعرفك زين و ادري انك عنيده .. بس انا مستحيل اجيك تبين اهل زوجك يقولون هذي ما تستحي جايه بأول يوم زواج لخويتها ..
إلهام : اوكي لا ترجينا انا جايتلك اللحين .. انتي وين ؟
ليان : انا اللحين بالسياره ..
إلهام : اجل حولي ع البحر .. نص ساعه بالكثير و اكون عندك ان شاء الله ..
ليان : طيب .. اجل اشوفك ..
إلهام : يلااا جايه ..
" الا يدخل سعود .."
سعود : وين رايحه ؟
إلهام : بروح حق ليان ..
سعود : ليه ان شاء الله ..؟
إلهام : وشو اللي ليه ؟ ابيها بسالفه و ابي اروح لها ..
سعود : ما رح اسمح لك تروحين ..
إلهام : ليش انا سألتك اذا تسمح و لا لا ؟ .. انا رايحه غصب عنك رضيت و لا انرضيت ..رايحه رايحه ..
" يروح سعود يقفل باب الغرفه و يقعد ع السرير و يطالع إلهام و يقول لها .."
سعود : يلا علميني اشلون بتروحين ..؟
إلهام : يعني منت مخليني اروح ؟
سعود : لأ ما رح اخليك تروحين ..
إلهام : زين ..
" تروح و تضرب الباب بقوه و تصارخ .. يقوم سعود و يمسكها و يرميها ع السرير و يسكتها .. و اكيد هي تصارخ و دموعها بدون ارادتها تنزل تحس ان حريتها مسلوبه ما تعودت ان احد يعاملها كذا .. لما سعود شافها تبكي ما هانت عليه راح قعد جنبها و قام يمسح على شعرها بس هي فزت و ابتعدت عنه و قعدت ع الكنبه .."
سعود : إلهام حبيبتي والله ما قصدت اخليك تبكين .. انا احبك و ما ابي أي شي يزعلك ( يروح يفتح الباب ) خلاص تبين تروحين روحي بس تكفين لا تزعلين مني .. دموعك غاليه علي .. بعدين ترى حتى انا مفروض اكون زعلان منك انتي من امس تحقريني و قاعده تغلطين علي منتي بحاسبتني زوجك ..
" إلهام لبست عباتها و طلعت و لا ردت عليه .. "
سعود : ياااااا ربي انا اش سويت عشان هذي البنت تعاملني كذا ..
------------------------------------------------------------------------
" هذي المره رح ندخل شوي بأجواء عائلة سمر زوجة رائد اخو إلهام .. رح نروح لبيت امها و نشوف مين اللي كان عندها و اش قصته .."
ام سمر : هلاا بك يا ولدي فهد ( فهد ولد اخت ام سمر .. يعني يصير ولد خالة سمر) ..
فهد : هلااا بك خالتي ..
ام سمر : اش اخبارك و اش اخبار امك ..؟
فهد : كلهم زينين و يسلمون عليك ..
ام سمر : الله يسلمك ..
فهد : خالتي ؟!
ام سمر : هلااا ..
فهد : سمر من تزوجت ؟
ام سمر : اش لك فيها ليش تسأل ؟ البنت شافت نصيبها و انت لازم تشوف نصيبك ..
فهد : يا خالتي اشلون تزوجت هذا الشخص و هي ما تحبه ؟
ام سمر : من قال لك انها ما تحبه .. حتى لو كانت ما تحبه رح تحبه مع الوقت ..
فهد : اشك بهالشي ..
ام سمر : والله انك قوي عين انت اللي تاركها و جاي تسأل ..
فهد : خالتي انتو اللي عقدتو السالفه .. لو انها ما راحت تدرس بكندا لكان اللحين احنا متزوجين و عايشين بخير و نعمه ..
ام سمر : والله هذا مستقبلها و حبت تكمل دراستها و فرصه جت لي عندها ما تستغلها ليه ؟ تضيع مستقبلها ليه ؟
فهد : كان المفروض تضحي عشاني ..
ام سمر : انت اناني و هذا اللي حرمك من سمر ..
فهد : يا خالتي حتى لو انا وافقت ابوي ما كان راضي ان زوجتي تكون دارسه برى ..
ام سمر : اجل معناته سكر الموضوع ما لكم نصيب ..
فهد : بس انا ابي اعرف من زوجها يعني بتخبونه عني مثلاً ؟ ..
ام سمر : لا ليش نخبيه .. زوجها رجال كفو و من عيال النعمه .. هو مدير شركه و اخلاقه عاليه و اكيد سمر رح تكون مرتاحه معه ..
فهد : طيب اش اسمه ؟
ام سمر : اسمه رائد ..
فهد : ابي اشوفه و اتعرف عليه و نصير اصحاب ..
ام سمر : زين بس لا تسوي مشاكل ماني ناقصه ..
فهد : لأ مشاكل ليه و عشان مين ..
ام سمر : اجل عن قريب رح نعزمهم ببيتنا و ان شاء الله نعزمك انت و اختي تشرفونا ..
فهد : ان شاء الله .. اجل يلا انا استأذن رايح ..
" بعد ما راح دخلت نور مستغربه اش جايبه هذا فهد .."
نور : يما اش يبي فهد ؟
ام سمر : يبي يتعرف على زوج اختك ..
نور : اييييش ؟! و انتي اش قلتي له ؟
ام سمر : قلت له بنعزمهم قريب و هو رح يحضر مع امه و يتعرف عليه يومها ..
نور : لا يما مو من جدك .. ما تخافين يسوي مشاكل ..؟
ام سمر : لاا ما هو ببزر فهد كبير و عاقل ..
نور : يماااا الحب ما يعرف كبير و لا صغير او عاقل و مجنون ..
ام سمر : اقول اسكتي و عن الفلسفه اللي ما لها داعي ..
------------------------------------------------------------------------
" إلهام وصلت البحر و كانت ليان تستناها .. المفاجأه ان إلهام كانت عيونها حمرا من كثر البكي .."
ليان : ول بسم الله اش فيك ليه وجهك كذا ؟
إلهام ( تنهدت بأعلى صوتها ) : قولي اش ما فيني .. تخيلي كنت بطلع منعني و قفل علي الباب .. بس بعدين تركني لما شافني قمت ابكي ..
" تروح ليان و تضم إلهام بقوه .."
ليان : حبيبتي بلييييز لا تسوين بنفسك كذا .. انتي لازم تعيشين معه و تتقبلين هالشي هذا نصيبك و قدرك ..
" إلهام توخر عنها بعصبيه .."
إلهام : ليوون اذا بتقولين لي هالكلام .. رجاءاً لا تكلميني انتي ما جربتي اشلون تعيشين مع انسان ما تحبينه ..
ليان : انا آسفه لا تعصبين مني .. يلا احكي لي اش صار و كيف يعاملك ..
إلهام : ما صار شي و معاملته ما تهم انا اقعد انرفزه يمكن يكرهني و يطلقني .. أنا حتى ما سمحت له يلمسني ..
ليان : جد والله ..؟
إلهام : أي ورح اسوي اكثر من كذا بعد ..
ليان : تدرين لو غيره و شاف جمالك ما كان رح يتردد لحظه وحده .. بس شكل اسعود جد ما يبي يزعلك ..
إلهام : هو يظن انه بيكسبني كذا .. بس صدقيني اذا كرهتي انسان مستحيل تحبينه ..
ليان : طيب انتي اش هدفك من هذا كله تبين تتطلقين و ترجعين حق إبراهيم يعني ؟..
إلهام : أي ابي اكون لـ إبراهيم .. ابراهيم و بس ..
ليان : بسسس !
إلهام : بس ايش ؟
ليان : ابراهيم رح يخطب الهنوف ..
" الخبر كان صدمه قووويه لـ إلهام .. حتى قامت تتصرف بشكل هيستسري من قوة الصدمه .."
إلهام : ههههههههه (ضحك هستيري ) لااا انتي تمزحين معي .. الهنوف هو قال ما يحبها اشلون رح يتزوجها و يكمل حياته معها ..
ليان : ارجووك لا تسوين بنفسك كذا لا تخليني اندم لاني قلت لك ..
إلهام ( وهي بكيانه ) : لا اا قولي يعني ابراهيم ما كان يحبني و لا عمره حبني ؟ طيب ليش ما قال لي .. ليشي سوى كذا ..
ليان : عشان كذا اقولك انسيه و عيشي حياتك مع سعود ..
إلهام ( و هي تبكي ) : سعود لأ .. انا خلاص ما عدت ابغا شي من الدنيا احس و كأن إبراهيم طعني بظهري طعنه قويه .. كأنه انتهز الفرصه ما صار لي يومين متزوجه الا هو يروح يخطب .. كانه يبيها من الله .. طيب ليش ؟ أنا وش فيني ؟ ليه ما يبيني ؟ لييييه سوى معي كذا لما قلت له تعال اخطبني و نطرني و انا كنت مستعده انتظره لآخر العمر .. ( ويزيد بكي إلهام و تضرب على رجولها كان شكلها مره يكسر الخاطر ) ليييوووون قولي لي ليه يسوي فيني كذا ؟
ليان : لهو ياااا عمري تكفين لا تسوين بنفسك كذا .. خلاص اللي صار صار .. بعدين مو انتي اللي قلتي له يتزوج و يشوف نصيبه ..؟
إلهام ( بصوت مبحوح من كثر الحزن و البكي ) : قلت له و يا ليتني ما قلت له ما توقعت يسويها كذا بسرعه توقعت ينتظرني اقل شي سنه و بعدها يفقد الامل و يروح يتزوج .. خلا ص ما رح اسامحه ابدا .. قويه هذي توقعته بيكون حزين لاني تزوجت .. اثره ضاربني بالطوفه و لا مهتم ..
ليان : إلهاام والله قطعتي قلبي .. ارجااااااااك لا تبكين كذا ما احد يستاهل تنزلين دموعك عشانه ..
إلهام : تدرين هذي غلطتي انا و استاهل اللي صار لي .. انا اللي رميت نفسي عليه و اجبرته يحبني .. و الادهى من كذا اوهمت نفسي اني ميته عليه و اعشقه من الصميم .. لكن في الاخير طلع كله كذب في كذب ..
ليان : يعني انتي ما تحبي ابراهيم ..؟
إلهام : ان قلت لأ كذبت و ان قلت أي بعد كذبت .. ما ادري والله ما ادري .. احس في شي ناقص .. في شي بالنص بس ماني عارفه ايش ..
ليان : خلاص يا روحي سكري ع الموضوع و انسي ابراهيم و انسي الماضي كله و ألتفتي لبيتك و زوجك ..
إلهام : اسعود لأ كم مره اقول لك لأ .. مااااااا ابيييييييه ..
ليان : والله ماني عارفه اش اقولك ..
إلهام : لا تقولي و لا شي مصيره رح يطلقني و اوعدك بهالشي .. زي ما قلت لكم قبل رح اخليه يعيش معاي بجحيم و لا ما اكون انا إلهام بنت فيصل العمر .. اذا هو مفكر ان ما احد يقدر يقول له لأ فأنا بعد مثله ما احد يقدر يقول لي لأ .. الدم يغلي في عروقي و احس اني حدي معصبه و لو رحت له البيت اللحين يمكن ارتكب فيه جريمه .. والله قلبي محرووووق ..
ليان : يا سااااتر اش هالكلام الغريب اول مره اسمعه منك ..
إلهام : من اللي فيني ..
ليان : لا ما يصير اهدي و خذي نفس و تأملي البحر و استرخي شوي ..
إلهام : ههه ( ضحكة استهزاء ) استرخي ؟! كيف استرخي و انا عايشه مع النحيس سعود ..
" قعدت إلهام اكثر من ساعتين مع ليان بالبحر بعدين رجعت ع البيت و هي ما لها خلق تدخله .. و كان الاخ سعود زوجها ينتظرها .. "
سعود : يا الله تحيهم .. شكلك ناسيه انه في احد بالبيت يستناك ..
إلهام : اسمع .. تراني حدي متضايقه و واصله معي ..
سعود : واصله معك و لا لا مو مشكلتي .. وين كنتي الى اللحين ؟
إلهام : تصدق .. انا .. بحياتي ما رح اقدر اعيش معك لو مهما صار انت لو عندك كرامه كان طلقتني من امس ..
سعود : اييييش ؟! اطلقك ؟! انتي مجنونه شي ؟ .. تونا ما صار لنا يوم متزوجين تبين اطلقك .. هههه قولي غير هالكلام ..
إلهام : ابعد من طريقي بروح الحمام ..
" إلهام تمر من جنبه و هي مو طايقته و تروح الحمام تاخذ شاور هي ما تبي تنفرد معه حتى ما يصير شي .."
" سعود يقعد ع السرير و يحط ايدينه على راسه و يسأل نفسه : يا ربي اش اسوي معها عشان ترضى علي و تحبني .. كان مبين ان اسعود باله طويل و يتحمل و مبين حبه لها لكن النفس اذا عافت شخص عافته خلاص ما تقدر تحبه .."
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــ