عجاج المسك

الجزء 10

ﺟﻤﺎﻝ ﺍﺗﻤﻀﻤﺾ ﺳﺮﻳﻊ ﻭﺟﺎ ﺭﺍﺟﻊ ﻗﻌﺪ .. ﻭﻋﻤﻚ ﺍﻟﻌﺒﻴﺪ ﻋﺎﻣﻞ ﻓﻴﻬﺎ ﻣﺎﺷﺎﻳﻒ ﺍﻟﺤﺎﺻﻞ ﻋﻠﻰ ﺟﻤﺎﻝ ..

ﻭﻭﺍﺻﻞ ﻟﻴﻬﻮ ﻃﻮﺍﻟﻲ ﻗﺎﻝ ﻟﻴﻬﻮ .. ﺍﺑﻮﻙ ﻳﺎﺟﻤﺎﻝ .. ﻛﺎﻥ ﺑﻘﺺ ﻟﻲ ﻓﻲ ﺍﻟﻘﺼﺔ ﻭﻫﻮ ﻫﺎﺩﻱ ﻭ .. ﻣﺮﺗﺎﺡ

ﻭﻣﺎﻋﻠﻴﻬﻮ ﺍﻱ ﺍﻧﺰﻋﺎﺝ .. ﻛﻤﺎﻥ ﺍﻱ ﻭﺍﻟﻠﻪ ﻛﺎﻥ ﺑﺘﺒﺴﻢ .. ﻭﺍﻧﺎ ﺑﺴﻤﻊ ﻓﻴﻬﻮ ﻭﺣﻴﻠﻲ ﻣﺒﺘﻮﺕ .. ‏( ﻣﻨﻬﺎﺭ ‏) .

ﺍﻫﺎ ﻭﺍﺻﻞ ﻭ ﻗﺎﻝ ﻟﻲ ﻋﺎﺭﻑ ﻳﺎ ﺍﻟﻌﺒﻴﺪ ﺍﺧﻮﻱ ..

ﺍﻧﺎ ﻭﺻﺎﺣﺒﻲ ﻭﺩ ﺍﻟﺪﻣﺒﻮ ﻭﺻﻠﻨﺎ ﺑﻮﺭ ﺳﻮﺩﺍﻥ ﺍﻟﺴﺎﻋﺔ 11 ﺻﺒﺎﺡ ﺗﺎﻧﻲ ﻳﻮﻡ ﻣﻦ ﺭﺍﻓﻘﻨﺎ ﺍﻟﻮﻟﻴﺪ ..

ﻭﺩ ﺍﻟﺪﻣﺒﻮ ﻗﺎﻝ ﻟﻲ ﺑﺲ ﺍﺻﺒﺮ ﻳﺎﻣﺤﻤﺪ .. ﺧﻠﻴﻨﻲ ﺍﻧﺰﻝ ﺍﻟﺒﻄﺎﻃﺲ ﺩﻱ ﻓﻲ ﺍﻟﺴﻮﻕ .. ﻭﺍﻧﺎ ﻋﻨﺪﻱ ﻟﻴﻚ

ﺗﺪﺑﻴﺮ ﺗﺘﻜﻴﻒ ﻣﻨﻮ .. ﻣﺸﻴﺖ ﻣﻌﺎﻫﻮ ﻭﺍﻧﺎ ﺷﺎﻳﻞ ﻭﻟﻴﺪﻱ .. ﻭﺭﺍﻛﺐ ﻓﻲ ﺍﻟﻠﻮﺭﻱ ﻗﺪﺍﻡ .. ﻭﻛﻞ ﻣﺎ ﺍﺣﺲ

ﺑﺎﻟﺸﺎﻓﻊ ﺟﺎﻉ ﺑﺮﺿﻌﻮ ﻣﻦ ﺍﻟﺒﺘﺎﻋﺔ ﺣﻘﺘﻮ ﺩﻱ ...

ﻭﻣﺤﺎﻓﻆ ﻋﻠﻴﻬﺎ ﺷﺪﻳﺪ ﻭﻗﺎﻓﻼ ﺑﻲ ﺍﻟﻐﻄﺎﻳﺔ .. ﻭﺑﻌﻤﻞ ﻟﻴﻬﻮ ﺍﻟﻌﺼﻴﺮ ﺑﻲ ﻧﻔﺴﻲ

ﻋﺸﺎﻥ ﺍﺗﺄﻛﺪ ﺍﻧﻮ ﻛﻞ ﺣﺎﺟﺔ ﻧﻀﻴﻔﺔ ..

ﻟﻐﺎﻳﺔ ﻣﺎﺧﻠﺺ ﻭﺩ ﺍﻟﺪﻣﺒﻮ ﻣﻦ ﺍﻟﺸﺤﻨﺔ ﻭﻧﺰﻟﻬﺎ ﻛﻠﻬﺎ . ﻭﻗﺎﻝ ﻟﻲ ﻳﻼ ﻳﺎﻣﻌﻠﻢ ﻧﺤﻦ ﻣﺎﺷﻴﻦ ﻋﻠﻰ ﺍﻟﻤﻜﺎﻥ

ﺍﻟﻘﻠﺘﻮ ﻟﻴﻚ ..

ﺍﻧﺎ ﻗﻠﺖ ﻟﻴﻬﻮ ﻳﺎﻭﺩ ﺍﻟﺪﻣﺒﻮ ﺍﻧﺖ ﻋﻠﻲ ﺍﻻﻗﻞ ﻭﺭﻳﻨﻲ ﻭﻣﻮﺩﻳﻨﻲ ﻭﻳﻦ ..

ﻗﺎﻝ ﻟﻲ ﻋﺎﺭﻑ ﻳﺎﻣﺤﻤﺪ .. ﺍﻧﺎ ﺑﺠﻲ ﺑﻮﺭﺳﻮﺩﺍﻥ ﻣﻦ ﻗﺒﻞ ﻋﺸﺮﺓ ﺳﻨﻴﻦ .. ﻓﻲ ﻣﺮﺍﺓ ﻣﻦ ﺍﻟﻨﺴﻮﺍﻥ ﺍﻟﺒﺴﻮﻥ

ﺍﻻﻛﻞ ﻓﻲ ﺍﻻﺳﻮﻕ .. ﺍﻧﺎ ﻃﻮﺍﻟﻲ ﺑﺠﻲ ﺑﺎﻛﻞ ﻋﻨﺪﻫﺎ ﻫﻲ ﺑﺎﻟﺬﺍﺕ .. ﻭﻣﺎﺑﺎﻛﻞ ﻓﻲ ﺍﻱ ﻣﻜﺎﻥ ﻏﻴﺮﻫﺎ ...

ﻳﻮﻡ ﻣﻦ ﺍﻻﻳﺎﻡ ﺟﻴﺖ ﺍﻟﺴﻮﻕ ﻭﻟﻘﻴﺘﻬﺎ ﻣﺎﻓﻲ .. ﻗﺎﻟﻮ ﻋﻴﺎﻧﺔ ﻓﻲ ﺍﻟﻤﺴﺘﺸﻔﻰ . ﻣﺸﻴﺖ ﻟﻴﻬﺎ ﻟﻘﻴﺘﻬﺎ ﺗﻌﺒﺎﻧﺔ

ﻋﻠﻰ ﻭﺷﻚ ﺍﻟﻤﻮﺕ .. ﻭﻏﻴﺒﻮﺑﺘﻬﺎ ﺗﺮﻭﺡ ﻭﺗﺠﻲ .. ﻣﺤﺘﺎﺟﺔ ﻟﻲ ﺩﻡ ﻋﺎﺟﻞ .. ﻭﺍﻟﺪﻛﺘﻮﺭ ﻗﺎﻝ ﻓﺼﻴﻠﺘﻬﺎ

ﻧﺎﺩﺭﺓ .. ﻭﻣﺎﻓﻲ ﺯﻭﻝ ﺑﻮﺍﻓﻖ ﺩﻣﻬﺎ

.. ﺍﻧﺎ ﻗﻠﺖ ﺷﻮﻓﻮ ﺩﻣﻲ ﻳﻤﻜﻦ ﻳﻮﺍﻓﻖ ﻣﻌﺎﻫﺎ .. ﻭﻓﻌﻼ ﻗﺪ ﻛﺎﻥ .. ﺩﻣﻲ ﻣﻮﺍﻓﻖ ﻟﻲ ﺩﻣﻬﺎ ..

ﺑﺲ ﺍﻟﺪﻛﺘﻮﺭ ﻗﺎﻝ ﻟﻲ ﻳﺎﺯﻭﻝ ﺩﻣﻚ ﺩﻩ ﺿﻌﻴﻒ ﺷﻮﻳﺔ .. ﺑﺲ ﻣﻮ ﻟﻲ ﺩﺭﺟﺔ ﺍﻟﻤﺮﺍﺓ . ﻗﻠﺖ ﻟﻴﻬﻮ ﻳﺎﺯﻭﻝ ﺟﺮ

ﺳﺎﻱ .. ﺍﻧﺎ ﻣﺎﻋﻨﺪﻱ ﻣﺴﺆﻭﻟﻴﺔ .. ﺍﻟﻤﺮﺍﺓ ﺩﻱ ﻋﻨﺪﻫﺎ ﺗﻼﺗﺔ ﺑﻨﺎﺕ ﺑﺘﺮﺑﻲ ﻓﻴﻬﻦ .