ﺟﻤﺎﻝ ﻃﻠﻊ ﻃﻮﺍﻟﻲ ﻭﻻﺷﺎﻑ ﺩﻣﻮﻉ ﻋﻤﻮ .. ﻭﻛﺎﻥ ﻣﻨﺰﻋﺞ ﻣﻦ ﺣﻜﺎﻳﺔ ﺑﻴﻊ ﺍﻟﻮﺍﻃﺔ .. ﻻﻧﻮ ﻋﺎﺭﻑ ﺍﻧﻬﺎ ﺩﻱ ﺭﺍﺱ
ﻣﺎﻝ ﻋﻤﻮ ﺍﻟﻮﺣﻴﺪ .. ﻭﻫﻲ ﻣﺼﺪﺭ ﻋﺰﺗﻮ ﺑﻴﻦ ﺍﻟﻨﺎﺱ .. ﻟﻮ ﺑﺎﻋﻬﺎ ﺍﻟﻮﻃﺔ .. ﻭﺑﻘﻰ ﻋﺪﻳﻢ .. ﺍﻟﻨﺎﺱ ﺫﺍﺗﻬﺎ ﺗﺎﻧﻲ
ﻣﺎﺑﺘﺤﺘﺮﻣﻮ ﻭﻻﺑﺘﺨﺖ ﻟﻴﻬﻮ ﻗﻴﻤﺔ ..
ﻭﻟﻼﺳﻒ ﻧﺤﻦ ﻓﻲ ﻣﺠﺘﻤﻊ ﻳﻘﻴﻢ ﺍﻟﻨﺎﺱ ﺑﺎﻟﻤﺎﺩﺓ .. ﺍﻟﺰﻭﻝ ﺍﻟﺠﺎﻫﻞ ﺍﻟﻤﻐﻔﻞ .. ﻛﺎﻥ ﻋﻨﺪﻭ ﻗﺮﻭﺵ .. ﺍﻟﻨﺎﺱ
ﺗﺤﺘﺮﻣﻮ ﻭﺗﺴﻤﻊ ﺭﺍﻳﻮ .. ﻭﺍﻟﺰﻭﻝ ﺍﻟﻤﻔﻠﺲ .. ﻛﺎﻥ ﺑﻘﻰ ﻋﻼﻣﺔ . ﻭﻋﺒﻘﺮﻱ ﻓﻲ ﺍﻟﺬﻛﺎﺀ .. ﺍﻟﻨﺎﺱ ﻳﻘﻮﻟﻮ ﻟﻴﻚ
ﻳﺎﺧﻲ ﺑﺎﻟﻠﻪ ﻫﻪ .. ﺍﻧﺴﺎﻧﺎ ﻣﻨﻮ ﺍﻟﻤﻘﻄﻊ ﺩﻩ ..
ﺑﺎﻛﺮ ﺻﺒﺤﺖ ﻭﺍﻃﺎﺕ ﺍﻟﻠﻪ .. ﻭﺟﻤﺎﻝ ﺟﺎﺀ ﺑﺪﺭﻱ ﺷﺮﺏ ﺍﻟﺸﺎﻱ ﻣﻊ ﻧﺎﺱ ﻋﻤﻮ ..
ﻭﺑﻌﺪ ﺍﻟﻔﻄﻮﺭ ﺑﺸﻮﻳﺔ ﺟﺎﺀ ﺟﻌﻔﺮ ﻭﻣﻌﺎﻫﻮ ﻭﺩ ﺍﺏ ﻗﺮﻥ . ﺭﺍﻛﺐ ﺑﻮﻛﺴﻲ ﻣﻮﺩﻳﻞ ﺍﻟﺴﻨﺔ .. ﻳﻠﻤﻊ ﺯﻱ ﺻﺤﻦ
ﺍﻟﺼﻴﻨﻲ .. ﻭﻻﺑﺲ ﺟﻼﺑﻴﻪ ﺟﻨﺎﺡ ﺍﻡ ﺟﻜﻮ .. ﺍﻟﻜﻢ ﺑﺘﺎﻋﻬﺎ ﻳﻠﺒﺲ ﻟﻴﻬﻮ ﺷﺎﻓﻊ ﻓﻲ ﺳﻨﺔ ﺳﺎﺩﺱ .. ﻭﻻﺑﺲ ﻟﻴﻬﻮ
ﻋﻤﺔ ﻛﺪﺍ ﻣﻨﻔﻮﺷﺔ ﻓﻮﻕ ﺭﺍﺳﻮ .. ﻭﻗﺼﻴﺮ ﻭﻟﻴﻬﻮ ﻛﺮﻳﺸﺔ . ﺟﻤﺎﻝ ﻋﺎﻳﻦ ﻟﻴﻬﻮ ﻛﺪﺍ ﻣﻦ ﺟﻮﺓ ﺍﻟﺒﻴﺖ .. ﻭﻣﺮﻕ
ﻟﻴﻬﻢ ﺑﺮﺓ .. ﺭﺣﺐ ﺑﻴﻬﻢ .. ﻭﻳﺎﺳﻴﻦ ﻣﻌﺎﻫﻮ .. ﻭﺍﻟﻌﺒﻴﺪ ﺭﺍﻗﺪ ﺟﻮﺓ ﻓﻲ ﺍﻟﺪﻳﻮﺍﻥ ..
ﺳﻼﻡ ﻣﺮﺣﺐ ﻭﻛﺪﺍ ..
ﺟﻤﺎﻝ ﻗﺎﻝ ﻟﻲ ﻳﺎﺳﻴﻦ . ﻳﺎﺳﻴﻦ ﺍﺗﻨﺎﻭﻝ ﺍﻟﻔﻄﻮﺭ .. ﻭﺩ ﺍﺏ ﻗﺮﻥ ﻗﺎﻝ ﻭﺍﻟﻠﻪ ﺳﺒﻘﻨﺎﻛﻢ .. ﻧﺤﻦ ﻓﻄﺮﻧﺎ ﻓﻲ
ﺷﻨﺪﻱ .. ﻛﻨﺎ ﺟﻴﻌﺎﻧﻴﻦ ﻭﺿﺮﺑﻨﺎ ﺳﻤﻚ ﺟﺪ .. ﺍﻧﺎ ﻭﺟﻌﻔﺮ ﻭﺭﻛﺒﻨﺎ ﺟﻴﻨﺎ ..
ﺍﻟﻌﺒﻴﺪ ﻗﺎﻝ ﻟﻲ ﻳﺎﺳﻴﻦ ﺍﻣﺸﻲ ﻳﺎ ﻳﺎﺳﻴﻦ ﻣﻌﺎﻫﻮ .. ﻭﺭﻳﻬﻮ ﺍﻟﻮﺍﻃﺔ ﻭﺗﻌﺎﻟﻮ ..
ﻭﻃﻠﻌﻮ ﺍﻟﺘﻼﺗﺔ ﻣﻌﺎﻫﻢ ﺟﻌﻔﺮ .. ﻭﺟﻤﺎﻝ ﻗﺎﻋﺪ ﻣﻊ ﻋﻤﻮ .. ﺷﻮﻳﺔ ﻛﺪﺍ ﺷﺎﻓﻮﻫﺎ ﻭﺟﻮ .
ﻭﺩ ﺍﺏ ﻗﺮﻥ .. ﻗﺎﻝ ﻟﻴﻬﻮ ﻳﺎ ﺣﺎﺝ ﺍﻟﻌﺒﻴﺪ ﺍﻟﻮﺍﻃﺔ ﺩﻱ ﻓﻲ ﺳﺖ ﻣﻠﻴﻮﻥ .. ﻣﺎ ﺃﻛﺘﺮ ﻣﻦ ﻛﺪﻱ ..
ﺟﻤﺎﻝ ﻗﺎﻝ ﻟﻴﻬﻮ ﻟﻮ ﺳﻤﺤﺖ ﻳﺎﻋﻤﻲ ﺧﻠﻴﻨﻲ ﺍﺗﻜﻠﻢ .. ﺍﺳﻤﻊ ﻳﺎ ﻭﺩ ﺍﺏ ﻗﺮﻥ .. ﻧﺤﻦ ﻋﺸﺎﻥ ﻧﺒﻘﻰ ﻧﺎﺱ
ﻋﻤﻠﻴﻴﻦ .. ﺍﻟﻮﺍﻃﺔ ﺩﻱ ﺑﻲ ﺗﺴﻌﺔ .. ﻭﻣﺎ ﺑﺘﻨﻘﺺ ﻗﺮﺵ ﻟﻮ ﻧﻘﺼﺖ ﻣﺎ ﺩﺍﻳﺮﻳﻦ ﻧﺒﻴﻊ .. ﻭﺍﻟﻠﻪ ﻳﺎ ﻭﺩ ﺍﻟﻌﻢ
ﻣﺎﻋﻨﺪﻧﺎ ﻭﻛﺖ ﻟﻲ ﺣﻜﺎﻳﺔ ﺟﺮﺟﺮﺓ ﻭﻧﻘﻴﺺ ﻭﺯﻳﺎﺩﺓ ﺑﺲ ﺩﻩ ﺍﻟﺴﻌﺮ ..
ﺟﻔﻌﺮ ﻗﺎﻝ ﻟﻲ ﺟﻤﺎﻝ . ﻋﻤﻚ ﺍﻟﺒﺎﺭﺡ ﻗﺎﻝ ﺗﻤﺎﻧﻴﺔ ﻭﻧﺺ ..
