#الضياع ١٧
#قصة سماره@
..
بعد ما خلصت الاجازة المرضيه
رجعت للدوام ..
تفاجأت كل الطلاب ينظرون عليه نظره غريبه وخاصة بعد ماصرت سبب بنقل ميشال !
عدنه بالفصل طلاب من كل الجنسيات بس اني وسمير عراقيين ومكان عندي اختلاط بأي أحد
وخاصه البنات حسب ما اشوفهم يضوجون مني كثير ..
ظليت اعاين لمكان ميشال فاضي ويألمني اللي صار له بسببي
وسمعت البنات يتهامسون عليه
بأن اني السبب وغدرت بي ووكعته بمشكله ..
فعلا حاسه بندم لأن كان صديق ورفيق اللي على مدى ثلاث سنوات ماشفت منه غلط ولا تجاوز وياي
ماتمنيت تنتهي علاقتنه بهالطريقه ..
سمير يتهرب مني كل ما جيت يمه يتحجج ويدير وجهه
واجهته وصارحته بان اني ماتحمل تصرفاته واذا يظل هيج يفتن اشكي لخالتو
بس هو غاضب مني واعتقد عرف بتدبير ماما وخاله حتى يجمعونه سوة
كلي اني احبج بس مثل اختي زينه
وما فكر بشئ تجاهج
وفعلا صدمني وضجت منه
بس هذا الواقع
ولازم اتعود عليه
مرت الايام وبسام معرفت عنه اي شي ولاسألت ..
قربت الامتحانات النهائية
بين واجبات المدرسة ومضايقات عمو عماد اللي بالبيت وتعليمات ماما الصارمة وياي حتى لا اكرر غلطة ميشال وظلت على طول تلمحلي بسالفه خطوبتي من سمير
بالبداية كابرت ورفضت بس بعدين شفتها فرصة اظل قريبه يمهم وانتقم من بسام وفرصة ثانية اخلص من عمو عماد السكير واستقر ببيت خالتو افضل الي
قبل الامتحانات النهائية بشهر عدنه فرصه مراجعه للكتب اخذت غراضي وكتبي ورحت لبيت خالتو ندرس اني وسمير وكنت اشطر منه تقنت اللغة الفرنسية والأجنبية وعندي واهس بالرياضيات أحل اي مسألة بسرعة
ولهذا كانت ماما وخاله مرتاحين لمشاركتي لسمير بالدراسة..
أما ميشال معرفت عنه اي شي بعد ماانتقل لمدرسه ثانيه ..
ظلت ماما تخابرني تتطمن عليه ومرات تزورني وتطبخلي اكلات احبها وتخبزلي كعك بالفرن ..
دارتني كثير بهالفترة
حتى اتفوق وانجح
وخاله هم خطيه دارتني مكانت تسمحلي اسوي اي شي بالمطبخ لو اساعدها تكلي درسي واهتمي بالامتحانات
وبالإجازة الكبيرة عوضيني ..
فد يوم عطشت وخلص المي نزلت للمطبخ عادي اني بغرفه زينه مستقرة دائما
سمعت صوت بسام دا يخابر بالصاله بالتلفون !!
كان يهمس ويضحك
ارتبكت وظليت بالدرج
لا اني الصاعده ولا اني النازله
كمل مخابرة تقريبا نص ساعة يسولف
ولاانتبه لوكفتي ودخل بغرفته ..!
كلش تألمت ..
معقولة راح يبقى هيج متجاهلني !
نزلت ركض اخذت المي واخذت كم شغله من الثلاجه وببالي افكر شوكت رجع وليش هيج ميسأل عني وليش نساني فد مرة !!
دا اطلع من المطبخ صار ببوجهي !!
بيدي حاضنه صمون وبطل مي وعصير ومربى
جمدت بمكاني !
رفع حواجبه كأنما متفاجأ لشوفتي !
دنكت وكملت طريقي من يمه بكل هدوء ..
وصعدت الدرج ..
تمنيت يصيح وراي ويجرني من ايدي يسوي أي شيء
لكن فشلني ..
دخلت للغرفه وشمرت الغراض بالسرير
وكتبي مطشرة انسدت نفسي حتى ميّ مشربت
ظليت ساعات انتظر بلكي يصعد وخاصة عفت الباب مردود ..
لحد ما أيست منه ونمت وبعد محسيت الا والصبح طلع وكنه بالنهار ندرس بالتراس اللي بالسطح اني وسمير
وبعد ماشفته لبسام
وتفكيري مشوش كل شويه اتخيله يراقبني من مكان لو يفكر يجي يمي
لو يسأل عني على الاقل
لحد ما بنهايه الاسبوع اجت ماما مستعجله من وكت متسوگه وجايبتلي ثوب احمر مقدف قصير بي دكم كبار سود من كدام على طوله وطلبت مني اسبح وابدل ولبستني ذهب تراجي وسورات وكلاده
ماسألتها ..
مومهم عندي اهم شيء ترضى عني
خلتلي مكياج
بس زينه اجت للغرفة كالت لها اني اكمل مكياجها خاله روحي
ماما نزلت وظلت زينه تمكيجني وكانت بطنها جبيرة حامل مااعرف بأي شهر
سولفنه وعلمتني شلون اتعامل ويه سمير حتى يحبني ..
كنت بس اهز براسي
ومااعرف شحيصير بعدين
كانت العائله مجتمعه لإعلان خبر خطوبتي على اساس من سمير بس اللي عرفته بعدين صدمني وصابني بجنون .
الكل مجتمع
عشة مميز على الطاوله
الميز طويل والكراسي تتضاعف من يحضر الضيوف
رغم شكلي شكد حلو ومرتبه وكاشخه والمكياج والعطر بس محسيت بأهتمام من بسام اللي كان أكثر واحد أناقة وكشخه وطالع ملك الأمسية كلها
والغريب البنيه اللي جايبها !
عرّفنه عليها بنيه لبنانيه عايشه بأمريكا اسمها لارا !!
الكل فرحان بيها وزينه وخاله حنان مفاركوهة ومرحبين بيها وعمو سعدون طاير من الفرحه لأن حسب مفتهمت ابوها مسؤؤل بالسفارة اللبنانيه
وعدهة الجنسيه الأمريكية
اني كاعدة بصف سمير اللي كان متوتر وخايف ومنطق بكلمه لابس قميص ابيض وسترة سودة وربطه عنق ام الشدة وممشط شعره بزيت صاير يلمع مثل الأفلام كارتون
مانتبهت لعمو عماد اللي اكلني بعيونه واني عيوني على بسام اللي شغل كل تفكيري وشلّ حركتي
تعمدت ارفع رجليه واخلي رجل فوك رجل ورجليه كانت ناعمه وملسه وثوبي كلش حلو ملفت للنظر
واقارن بيني وبين هاي لارا صاحبته
كانت ضعيفة وشعرها قصير واصفر وبشرتها برونزيه وجسمها يابس وصدرها طالع نصه مليان نمش ولابسه قميص ابيض ردن وتنوره طويله سودة للقدم بس بيها فتحه من كدام لآخر الفخذ لفوگ
وتتميع وتحجي بلهجه لبنانية مايعة
واني دمي محترگ
اللي قاهرني اكثر ذكرياتي ويه بسام وكلامه عن شعري وجسمي شنو اللي عاجبه بهاي !!
وشنو اللي خلاه يرتبط بيها !!
تعبت من الحقد والقهر اللي بداخلي كملنه العشه
كامت ماما وخالتو علنن خطوبتنه اني وسمير وتبادلنه حلقات ذهب بيدينه
بسام يباوع بس بطرف عينه وهاي لارا حاضنه متنه وتشاوره كل شويه
ويبتسم بالكذب ويتصنع بالضحك
منتبهت بعد لأحد من الموجودين حتى أيمن زوج زينه موجود بس مهمني احد اتسحبت من الجلسه كلها وكانو مشغولين بين سوالف وتيفي وضحك دخلت للمطبخ ادور على ورقة اي شي اكتب بي
لكيت ورقة كتبت بيها
"أنتظرك بالتراس فوك ضروري"
لفيتها ورجعت اقتربت من لارا سويت نفسي اسلم عليها
لان ملزكه لبسام مااكدر احصله وخليت الورقه بيد بسام
وتسحبت صعدت فوك قبل لحد ينتبه
رحت لغرفه زينه اول مرة خليت حمرة غامقة عمدا وعدلت نفسي ونزعت حذاءي وصعدت حافيه وفتحت دكم الثوب من كدام وكفت بمكان ظل عكس ظوة القمر سمعت حركه
مديت راسي شفته لبسام اشرلته
اجه ينافت وعصبي زمخ عليه
شتريدين !!
سحبته من قميصه وحضنته حيل تعمدت الوخ قميصه حمره من شفايفي
ظل مرتبك
.. حسيته عرك وتوتر قربت شفايفي من شفايفه واسحب بياخت قميصه بيديه اثنينهن اريده يبوسني ..
متت على بوسه منه رغبت بي كلش ماتحملت
نزل ايدي ودفعني
كلي بهمس وشوگ واضح عليه ..
كافي ..
كافي سماره عقلي
حتفضحينه ارجوج ..
راد يروح لزمت ايده خليتها على صدري
وحركتها حتى اثيره
وجنه نحجي بهمس اثنيننه
بسام اني حبيبتك
حبيبتك سماره ..
موكنت قبل دكولي انتي شكولاته وانتي كريمه وانتي اشهى بنيه بالدنيا
وين كلامك !
ومنو هاي اليابسه اللي جايبها وتفضلها عليه !!
من كل عقلك رغبت بوحده مثل هاي !!
تحسر ..
سمر انتي كلشي متعرفين
كلشي متفتهمين عوفيني ..
رجعت شبكته حييل اريده يبوسني
بسام عدك علاقه وياهة ؟
نمت وياهة !!
جاوبني
رجعت ابوس بي واشمه واتحسر
جرني من شعري ودفعني للحايط وراي مسافه وصرخ ببوجهي
دااكولج كافي سمر كافي
صرخت حييل
تشنجنت لان تسريحه مسويه وأذاني من شدني
فجاءة حسينه بحركه
التفتنه لكينه الكل واكف ورانه وصافن علينه !!
يمكن بسام تفشل وانفضح بس اني لا
حسيت بنصر
حسيت برغبه اضحك واركص لان اكيد الكل عرف بعلاقتنه
بسام دنگ وارتبك
انسحب ونزل صارت لارا ببوجهة ! وتاشرله على قميصه اللي تعمدت ادمره حمره
وعيونها دم من الصدمه !
أما البقيه نضرولي بأحتقار وحقد وراحوا نزلو ومعجبهم الموضوع
عمو عماد كان بس يضحك ومستهزء
بقت ماما حليمه جامده بمكانها
وسمير عيونه بيها حزن وهو الوحيد اللي قهرني لان هو الضحيه الثانيه وماله ذنب بحبي لبسام وانتقامي منه
اني معرفت شسوي بعد كعدت على كرسي وماما اقتربت مني كعدت كبالي بكرسي ثاني
تباوعلي بغضب بس اني بقيت مدنگة
كلش خجلانه منها
توقعت حتعاقبني وتضربني
بس كانت متألمه أكثر بقت مصدومه وساكته ...
يتبع..
...#قصه سماره @
بارت ١٧
أنت تقرأ
#الضياع 🔞
Romantikقصة سماره بنت عراقيه بريئه تلاطمت بها الآثام والشهوات في مجتمع متعدد الأديان والأفكار
