#الضياع 🔞

قصة سماره /٤٧

#الضياع ٤٧
#قصه سماره@
جزء طويل وبالتفصيل
لعيون المتابعين المتفاعلين 👍....
.....
.....
صحيت شفت نفسي بغرفه بالمستشفى !
ماما حليمه عيونها حمر من البجي
لزمت ايدها فرحت
رادت تكوم
كتلها ماما شصار !
هزت برأسها وضحكت ودموعها تجري
وراحت لبرة دخل دكتور ويه ممرضة
فحصني ..
انتبهت ايدي بيها مشدود مغذي !
الممرضه تجتني شويه كعدت
الدكتور كال لماما بس تكمل الفحوصات ونتطمن مافي شي بتطلع بنتك من هون
طلعت ماما ويه الدكتور وبقت الممرضة تزرق ابر بالمغذي
تلمست رأسي يوجعني وكصتي مجروحه
تذكرت كلشي صار
رجعت تحسرت وتألمت
وره دقايق رجعت ماما وحضنتني
سألتها عن بسام مقبلت تجاوب
الدنيا ليل جانت نمت على المهدئات والمسكنات للصبح
اخذوني لغرفه خاصه بيها معدات سوولي فحص للدماغ واشعه وسونارات دوخوني وتعبت بقيت ساعات
... رجعوني للغرفه اللي كنت بيها بالبداية
اجت خالتو جابتلي كباب مشوي
فرحت من شميت ريحته وشكرتها لخاله علمودي صاعده بالتراس بالسطح وشاويته اللي
وكلتني خاله وكلتلي ماما سمر
امج راحت الدوام بس ترجع تجي ببدالي واني ارجع للبيت وان شاء اللة متتاخرين هواي بس ننتظر الفحوصات تكمل ونطلع
جانو خايفين بيه شئ لأن الضربه براسي واغمى عليه
... المستشفى هاي جدا متتطورة وكادرها أكثر الأطباء فرنسيين ومن الخارج
..المهم بعد ما خلصت اكل سألتها عن بسام ظلت تتلعثم
لزمت ايدها خاله فدوه اروحلج بسام ماله علاقه اني تعثرت ووكعت
استغربت !
ماما انتي شنو ؟
شكد تحبي لبسام وتتدافعيله !
خاله بسام حبيبي قبل لايكون زوجي
الله يخليج اريد اشوفه لو اسمع صوته طلعي جهازج النقال واتصلي بي فدوه
ماما هسه هو بالعمل خليها السالفه لان عاقبناه لتصرفه وياج
وبعد ميتجرأ يأذيج بس كدام الشرطه والتحقيق كلنه تزحلكت بالحمام انتي اذا رجع الضابط اكدي كلامنه
هزيت برأسي ماشي خاله بس تأكدي مااقبل تعاقبو لبسام انتو دا تعاقبوني اللي
ضحكت وباستني
ماشي ماما اني اروح اسأل عن نتيجة التحاليل والاشعه انتي ارتاحي
تمددت واحس بنفسي ناقصه
وببالي كلام خالتو شلون عاقبوا لبسام !! يربي اكيد هسه قلق ومشتاقلي مثل ما اني مشتاقتله ..
يربي .. حموت واشوفه هسه
اجت ماما واستلمنه نتيجة التحاليل والدكتور طمننه ماكو شئ بس علاج وابر كتبلنه استمر عليهم وطلب من عدنا ننراجع بعد اسبوع وبلاغ الشرطه أكدّته الهم اني تزحلكت وتعورت ..
ماما وقعت وكملنه الإجراءات وطلعنه
...
اخذنه تكسي للبيت دخلنه
ماما حاضنتني واني عيوني متلهفه تتدور اريد اشوفه لحبيبي يتلكاني بالباب
بالصالة عمو سعدون وبابا غسان تلكوني وبوسوني بسام ماكو !
بابا غسان غاضب مااعرف شمسويله لبسام لو شصاير وراي
گلبي اكلني
حجيت وياهم وطمنتهم
ياجماعه صدكوني مابيه شئ
بابا غسان كلي .. سماره غدا ان شاء اللة تعودين للعمل بالمؤسسة سارسل لكي سياره بالساعه 7 صباحا
كان جديّ بالكلام
رغم ماكنت خايفه من اللي صار وخلاهم يتخذون هذا القرار الحاسم
ماكان كدامي غير  اوافق واتشكر من بابا غسان لأن محتاجه فعلا ارجع للعمل اختنكت وتغيرت حياتي للأسوء بعد الزواج ...
عمري 21 سنه ومرّ على زواجي شهرين
تقريبا ..
عشت ايام صعبه ومفرحت رغم ماتحققت امنيت حياتي بزواجي من اللي احبه وهو كان يحبني ويعشقني بجنون ماكنت اتصور هذا مستقبلي وهذا مصيري بهالشكل
لو راح اواجه مشاكل وعقبات كلت تزوجت من حبيبي وخلاص ..
متوقعت الدنيا تجر عكس وياي وتحاربني وتنتقم مني هالانتقام
لافرحت ولاتهنيت وحب حياتي نقمه عليه صار ..
...
بعد ما راح بابا غسان عمو سعدون وخالتو وماما هددوني اذا اسكت على سوء معاملته لبسام وابقى هيج مطيعه وضعيفه ميساعدوني بعد هالمره
ويضطرون يطردوا لبسام اللي افتهمته من كلامهم ماعدهم إستعداد يتحملون اخطاءه لبسام واعتداءه المتكرر عليه
بقيت اتجادل وياهم
مستحيل هيج تتخذون قرار
انتو مكبرين السالفه
اني ماريد منكم هالدفاع والعدوانيه لبسام اني احبه ومستعده اتحمله
ماما جرتني من زندي استغربت منها وكانت غاضبه ومتعصبه ..!
سمعي سمر لاتصيرين غبيه ومايعه
ويضحك عليج بسام بغراميات وعشق مثل ماكان عماد يضحك عليه ويقشمرني وتاليها خسرت كلشي بسببه !
ضحكت ودفعته لايدها بنتر وحجيت باستهزاء ..
ماما بشرفج من كل عقلج تقارنين السكير عماد ببسام !
شفت ماما ضاجت من ردي وتفشلت
كالت ماما اني اريد مصلحتج وبسام دا يأذيج ومحّول حياتج لجحيم كلنه حاسين بتصرفاته واسلوبه وياج
ماما شنو جحيم !
جحيم بسام جنة بالنسبة الي
ضاجت ماما وكالت ...انتي حرّه سماره  ..وراحت صعدت لغرفتها
عمو سعدون وخالتو بقوا يقرون براسي ولا كأنما بسام ابنهم كأنما اني بنتهم
فعلا هم ربوني واعتبروني جزء من عائلتهم بس مو هيج يتصرفون
ضجت كلش ومنطيت ببسام ابد ومارضيت يحجون عليه
وبالاخير رجعت سألت عنه ياجماعه بسام وينه !
عرفت بي من متجادل ويه عمو سعدون طارده من البيت !
كعدت ابجي ويهدّأون بيه توسلت لعمو سعدون فدوه عمو الله يخليك اتصل بيّ واطلب منه يرجع 
كلي بابا خلي يتعلم الأدب وشلون يحترم الكبار ويحترم رأينه ورغبتنه
عمره 25 سنه بس عقله ماناضج ودائما متسرع جابلنه الامريكيه وجبرنه نوافق عليها تاليها سنه سافر ورجع خسران
وهسه بعد مو على كيفه يتصرف وانتي بنتنه واذيتج تآلمنه يا بابا   ..
ماقنعت ولاهدأت لكلام اي واحد منهم
أريد اشوفه واتتطمن عليه
دخلت لغرفتنا لكيته عايف كلشي
جواله وحاسبته واوراقه فتحت الدولاب ملابسه موجوده مماخذ شئ طالع منا بس ملابسه اللي لابسها
ظليت الوج خاله جابتلي العشه خلته على الميز كمت بست ايدها
خاله حبابه انتي گلبج كبير سامحي لبسام فدوة
لااندل اصدقاءه ولا ماخذ جواله ولاعنده بيت ثاني گلبي ناغزني
وين راح بهالليل خطيه روحي لعمو خلي يدوره ويرجعه
كعدتني وظلت تحجيلي عن اللي صار وراي  ..
من رجعوا من الكنيسه بسام حجالهم شلون تعاركنه ووكعت بقوا يلوموا ودخلوا شافوني مجروحه بكصتني ووجهي اصفر ونايمه
طالعين لبره ومتعاركين وخاصه من كانوا بالكنيسه بابا غسان طالب منهم ارجع الشغل محتاجني وبيننا اتفاق مسبق كان !
بس اني خلفت بي بعد الزواج
بسام كان متعصب بكلامه وميقبل يرجعني
وظل يجادل ويرفع بصوته عليهم ومامحترمهم وتجادل ويه عمو سعدون وعمو ضاربه راشدي وطارده كله من تحسن التصرف والكلام بأدب ترجع لأهلك ولزوجتك ...
قهرتني اكثر من وضحتلي السالفه
بعدين كالت لاتخافين ماما اذا يحبج يتنازل عن كبرياءه واحنا كلنا دا نشوفه من بدايه زواجكم شكد متسلط وياج ومتحكم
ولاتنسين الأب غسان اله فضل بنجاحج بنتي وحافظ عليج سنين وساعدج هواي
وانتي لازم ترجعين للعمل والعقود اللي وياه شلون تنسيها لازم ترجعين تفكرين بمستقبلج
وتكوّنيّن نفسج
اصلا مرتب بسام ميكفيكم عشه اسبوع ..
هسه انتي تعشي خاله حتى تاخذين العلاج ونامي وارتاحي وراج الصبح من وكت عمل والتزام
كلامها لخاله قنعني
تعشيت واخذت علاجي ونمت ...
مكدرت ...حاولت انام ...
كمت لبست قميص نوم احمر
وصعدت لماما لكيتها مطفيه الضوة بس ضوة الحاسبه مشتغل
جانت زعلانه مني مهتمت لي
ماما ...
تسمحيلي انام بحضنج الليله ؟
ابتسمت وفتحت ايديها ركضت وشبكتها وبجيت ..
ماما آسفه ...مو قصدي ..
قطعت كلامي ...اشششش ...
طفت الحاسبه وتمددت ونيمتني على صدرها وظلت تمسد بشعري وتبوس برأسي ...
بجيت ...
مسحت دموعي....
ماما مشتاقه لبسام حبابه اموت بدونه
تحسرت ...
لا ...متموتين صيري قويه ...
وبسام اذا رجع وتجرأ يضربج حيكون آخر يوم بينكم 
كمت من حضنها ومسحت دموعي
ماما شنو هالعدوانيه تدرين بيه 
مااكدر بدونه !
جرتني ..
نامي هسه وبكرا ركزي بشغلج لاتفشلينه ويه الأب غسان وعدناه نرجعج للعمل ونتصرف ويه بسام لاتخافين كلشي حيكون تمام بس صيري قويه ..
آمنت من كلامها ونمت
الصبح وعتني بال 6 من وكت سبحت وبدلت قميص وردي ردن وتنورة طويله سوده واخذت جنطتي ونقالي واطتني نسخه من مفاتيح البيت وطلعت لكيت سياره من المؤسسه تنتظرني صعدت ورحت ملهوفه للعمل ...
....يتبع ..
#قصه سماره@
بارت ٤٧