#الضياع 🔞

قصه سماره /٣٦

#الضياع ٣٦
#قصه سماره@
...
تقدمت تجاهه
وجريت ايده د ابوسها
كتله احلفك بستر امك وعباتها استر عليه وطلعني منا
رجعني للبنان
تفاجأ ..!
سحب ايده ماقبل ابوسها كلي العفو أختي
وهدأني
حسيته مقهور عليه
كلي استريحي ارتاحي وفهميني انتي شنو سالفتج حتى اكدر اساعدج
رجعت كعدت كدامه مسافه وجان د يباوعلي باحترام ويدنگ مرات من گد الغيرة والشهامة العدّة
استغليت هالجوانب كلها  وظليت اتوسل بي واقنعه يوصلني للمطار ويرجعلي اوراقي وجوازي
كتله سيدي فدوة اروحلك اني كلشي ممسويه صدكني
اشرلي اكعد واحجي ووعدني محد يأذيني
سيدي اني طالعه من العراق بال ٨٤
وكونت نفسي واشتغلت وراجعه اساعد اهلي بالكوت وانطيهم فلوس
حتى الفلوس اخذوهة مني بمركز الكوت
وعاملوني معامله سيئه
وهذا عمر خالد عنده ثأر شخصي وياي ودا ينتقم مني
كلي ملازم عمر شنو يصير منج ومنين تعرفي !
احتاريت شكله
اكله هذا من طفولته حاقد عليه ومزگ قراءتي هو واخو وابوهم يكرهوني و يضربوني
وصاروا سبب بموت امها لماما حليمه
وطلعنه من العراق بسببهم
منين ابدي بالسالفه
شكد مااوضحله واشرحله مراح يفهم ..
..
سكتت و مرديت
فتح اوراق كدامه بملف
وجان من يحجي بهدوء وبأدب ومانظرلي بسوء
...الأوراق اللي كدامي تكول انتي مطلوبة باكثر من جريمه انتي والمدعو عماد لفته ..
واحنا مكلفين نسلمكم للسلطة لهناك
واكو مكافأة مالية للي يبلغ عنكم
..
بعد كلامه هذا مكدرت انكر
واستسلمت
تأكدت وعرفت السافل عمر طامع بالمكافأة لذلك كان مهتم ومبلغ عني
اخذت نفس وكتله ..
سيدي اني جوعانه وتعبانه واريد جنطتي ابدل ملابسي
واذا السالفه هيج ودوني للسلطات اللبنانية ارحم من اللي شفته هنا مااكدر ابقى اكثر بعد مااتحمل
كام وكلي هسه اجيبلج مي واكل
لا .. سيدي ماريد
رفع حواجبه مستغرب  !
العفو سيدي ماحبه للمي مالكم سوى عدي مغص ومعدتي تعبانه من اكلكم
ابتسم وطلع
تجيت بالقنفه وشلت راسي ادعو ربي يفرجها عليه على يد هذا الرجل الغيور
مااكدر بعد ماتحمل
و ماريد ابقى تعبت هلكت مابيه اتحمل خاف يرجعوني لهذيج الغرفه المقرفه
دقايق وفتح الباب نزّيت
شايل بيده بطل زجاجي عصير وبسكت
خلاهم كدامي وكعد بس بعيد مو قريب
عجبني تصرفه شكد محترم وشهم
فتحت الباكيت واكلت وشربت العصير شفته ظل يعاينني
خجلت لفيت الباكيت وبطلت اكل
ابتسم
كلي كملي اخذي راحتج
بلعت ريكي ..سيدي ...
وين زميلي عبد الغني !
جان كاعد كام وكلي لا تخافين عليه رجعوا لبلده ماعدنه مشكله وياه
بس انتي مطلوبه عدنا مسجله بالاسم  باكثر من جريمه لذلك بقوج يمنه
..
زين شوكت تسلموني الهم !
مااعرف يمكن كم يوم
ارجوك سيدي الله يوفقك لاترجعني لنفس الغرفه أبوس ايدك
مايصير ..
.. ممنوع وتجيبيلي عقوبه
من كال هيج لطمت على وجهي وبجيت
كلي اشش شنو هاي زغيرونه انتي !
تحملي كم يوم ويجون ياخذوج
مكملت العصير ولا البسكت اتسدت نفسي مابيه بعد انهد حيلي ويأست
توسلتله بكل مقدساته وديانته يغير مكاني وميرجعني لذيج الغرفه
بقيت بهاي الغرفة يمه أكثر من ساعة وماشفت منه غير كل معامله طيبه واحترام
انقهر عليه وكلي صدكيني اتمنى اساعدج لو اهربج بس موبيدي مااكدر
..
زين اني مااعرف رقم احد هنا
جان يتصل بي هو ويجي يخلصني
ولا اكو اتصال دولي عدهم جان اتصلت بـبابا غسان
بعدين من ظليت اسأله عرفت منه اني هنا بهالمكان صارلي ثلاث ايام
ويومين من جيت لبغداد والكوت يعني كلهن خمس ايام
.. عشتهم خمس سنين مذلة وعذاب ومهانة
حتى وجهي بالمرايه ماشفته واكيد ذبلت وكبرت خمس سنين لكدام
..
النقيب حسين عافني كلي ارتاحي شويه وارجعلج 
ومن طلع قفل الباب
اكو شباك  مديت راسي شفت السمه
الله شكد نحرمت من ضواك ربي رحمتك بيه ولطفك
الشكر الك لأن سخرلتي هالرجل الطيب اللي طمنني وخلى عندي أمل بعد العذاب واليأس
اثاري الدنيا بعدها بخير
انتبهت للوقت مبين الظهر
بس المكان صنطه بس صوت العصافير والحمام الفخات اللي يدوي ويسوي نغمه مزعجه
مهما يكون هنا ارحم من هذيج الغرفه الكريهه
بلكي مايطولون ويجون ياخذوني للمطار واكيد الأب غسان حيخلصني ميعوفني
وارجع أدعّي على عمر وعماد السكير شكد سفّلة طلعوا
بسببهم اني هنا ..
صارت من سخريه القدر أن يكون مصيري بيدهم وبسببهم عشت أسوأ ايام حياتي
بين تفكيري ودعاءي وامنياتي بالخلاص  تعبت غفيت على القنفه الجلد
ماادري شكد
ساعه ولا اكثر
سمعت صوت توقعت دا احلم
ركزت اكثر صوت جدال وهوسه برة مبين أكثر من رجال قريب على الباب !!
خفت اكثر وصارت عدي لويه ببطني انرعبت ورجفّت ..
تيقنت اجاني موعد الحساب والعقاب
كلت وصلوا الجماعه وحياخذوني
كوة كمت وكفت عدلت نفسي
انفتحت الباب
دخل النقيب حسين و جماعته حراس هواي ووياهم عمو سعدون وبسام ..!!!
...
يتبع..
#قصه سماره@
بارت ٣٦