حبيتها المجرمة

علاقة غريبة

تطلع فيه ادم بصدمة.. بينما اتنفس سيف بعصبية وقال : ما توقعت منك يا اخوي تقول هل حكي.. انا وانت منعرف منيح انو هو مو مجرم بلعكس كان لازم يتكرم بدل ما ينسجن..بتعرف شو لازم تعمل؟؟ لازم تروح وتدلع مرتك وتقول قدام كل الدنيا انك تزوجت... وبدون ما تخجل..واللي فيه خير يفتح تمه بحرف..
ابتسم ادم وفرح.. ورجعتلو الثقة من كلام اخوه.. ورجع لعندها عل الملحق.. بس انصدم..
اما عند فرح سمعت كل لكلام اللي دار بين لاخوين.. ورجعت عل الغرفة وصارت تبكي وتبكي.. وتبكي.. واجت مريم اللي انصدمت من منظر اختها.. وصارت تطبطب عليها..
مريم : اشبك ليش عم تبكي؟؟.. مو انتي اللي قلتيلو يتزوجك..؟
فرح : اي ماشي.. بس ليش بيعيرني بابوي.. ؟؟ وابوي مو مجرم بس هو مصر انو هو مجرم... والله انا ما بتحمل اسمع هل كلام عن ايوي.. واسكت.. وقلي ابوكي بلسجن وانتي تزوجتي الضابط.. انا بوي رجال شريف.
زعلت مريم عليها.. وحطت دقنها علراس اختها اللي عم تبكي عل صدرها.. دخل ادم وكانت نظرة الدهشة واضحة عل وجهو...اول مرة بيشوفها عم تبكي بهي الطريقة كانو دموعها ما عم يوقفو كل ما تمسحهم يرجعو ينزلو.. احترق قلبو عل شكلها... انتبهتلو مريم وقامت من جنب اختها وطلعت.. اما ادم اللي خجل بحالو قال : انا براضيها..
مريم هزت راسها بابتسامة.. وطلعت.. سكر ادم الباب وقرب منها وقعد امامها..وقال : فرح.. ؟؟
رفعت راسها.. وهي تلقائيا.. اخدت شالها وحطتو عل راسها بس هو اخد الشال.. ورماه بعيد وقال : خلص انتي هلق مرتي.. تركيه..
فرح: ادم طلع برا انا ما بدي اشوفك..
ادم : طيب اهدي من شان نعرف نتفاهم..
فرح: نتفاهم عل ايش.. ؟؟عل الحكي اللي حكيتو عن ابوي..؟؟ وانت بتعرف انو هو رجال شريف..
ادم بتنهيدة.. : والله بعرف وانا اسف.. والله بيشهد انو انا بحب ابوكي.. لانو شخص شريف واللي صارلو ظلم.. بس اللي قلتو كان بلحظة غريبة بلحظة عدم استيعاب.. سامحيني
فرح بانفعال : شلون بدك اني اسامحك واللي حكيت عنو ابوي.. ؟؟
ادم بحركة جريئة مسك ايدها وباسها: بعرف واسف والله اسف.. خلص بقا والله ندمان لاني هيك حكيت..
فرح دارت وجهها وقالت: لولا الله ثم هداك الشب اللي دافع عني.. كان ما قلت هل كلام.. وبعدين مين هداك.. ؟؟
ادم : اخوي وابوي سيف..
فرح: الله يسلم ايديه..
ادم : نعم.. عم تشمتي بزوجك..
سحبت ايدها ووقفت وكانت بدها تدخل علحمام.. بس هو شد ايدها وخلاها تقعد وابتسم وقال.. : بتصدقي اني فرحان.؟.
تطلعت فيه من بين دموعها وقالت : فرحان؟؟
ادم : والله فرحاان. .يعني الصراحة انتي عجبتيني من اول ما شفتك.. وكنت بدي اخطبك بس كنت عم بنتظر ليطلع ابوكي.. بس شفتي النصيب سبحان مقسم الارزاق مين كان يتوقع.. انو انا وانتي نتزوج..
فرح ابتسمت : غريبة انا كنت عاجبتك..؟
ادم : اي ليش مالك واثقة من حالك.. ؟
فرح: لا مو هيك بس انا بعمري.. ما فكرت فيك.. بقا استغربت..
ادم تضايق : ابدا.. ؟؟
هزت راسها.. وقال : المفروض اصدق؟
ابتمست: اي..
ادم ابتسم عل ابتسامتها: اي ها.. هيك بتسمي نجوم السما ضحكت..
فرح ما ردت..
تنهد وقال : شايفة عل هل جازة.. اول يوم لالنا كزوجين وانا بلبس الشغل. وانتي بلبيجاما..
فرح انتبهت: اي يلا روح..
ادم كشر : شبك شبك هلق كنا قاعدين ومبسوطين وما في احلا مننا.. وبعدين انتي هلق مرتي وبيحقلي اقعد معك قد ما بدي..
فرح: اي مو. هلق بعدين.. بعدين انت عندك مشكلة مسبقا.. انت متزوج واهلك لهلق ما بيعرفو..
ادم وقف وقال بابتسامة: اي معلش ما في مشكلة انا حر نفسي.. وقفت فرح كمان : يلا روح..
قرب ليبوس خدها بس دفشتو عنها: انت جنيت.. ؟؟
ضحك ادم وطلع.. وابتسمت فرح بخجل.. دخلت مريم.. وهي مصدومة وبعد ما راح ادم : ويييين الدموع؟؟.. وييين كان عيونك ما عم يوقف بكا.. شو صار. ؟؟
فرح بخجل : اي ما بعرف عندو اسلوب لطيف..
مريم بنص عين : لك والله والله انا بعرفك.. وبعرف انو عاجبك يا حقيرة وانتي عاملة فيها الثقيلة.
ضحكت فرح : لاااا مو لهل درجة..
مريم : لا لهي الدرجة واكتر..
فرح شردت بابتسامة...