شجن

1

#شجن1
Shahd Alsalman

كل يوم اشوفها واباوعلها من بعيد هادئة ومتحجي هواية وتشتغل من كل كلبها وما عدها علاقة بأي احد استغرب على وحدة مثلها مو هلكد اجتماعية لان وجهها يكول غير شي
بس عموما الظاهر مو دائما يدل على داخل الانسان او على شخصيتة

اراقبها دائما من اول ما تفوت لحد ما تطلع اكو هواية ناس يسموها بهواي اسماء والقاب
كئيبة ، معقدة ، الحزينة ، مرات المغرورة اوووو كومة القاب وكومة حجي بعد حجي الناس ميخلص
هي صارلها سنة او اكثر تشتغل بالمعمل ويانة و مرة قريت السي في مالتها من الفضول رحت انطيت فلوس للحارس ودخلني غرفة البيانات والسجلات الخاصة بالموظفين كتلة محتاج شي من الفايل مالتي وقريتلة غزالة ودخلني وقبل واني هم صارلي هواية اشتغل هنا يعني يعرفني بس يخاف لان مسؤولية

دورت بفايلات البنات ولكيت فايلها واخيرا
اسمها " شجن "بس بالمعمل يسموها داليا عود ليش ؟
عمرها هسة 18 سنة يعني صغيرة
التحصيل الدراسي ثالث متوسط
الظاهر ظروفهم صعبة
بس لحظة هي مواليد بغداد
والعنوان المكتوب هنا سليمانية
يعنب منتقلين لهنا بالجديد

صورت الفايل كلة حتى تبقى معلوماتها عندي
ما ادري اساسا ليش دا الاحكها بس حبيت اعرف عنها كل شي يجوز انجذاب يجوز هدوئها يثير الفضول مثل ما كل الموظفين والعمال اللي ويانا هيج يريدون يعرفون كل شي يخصها لان جد هي غامضة..

دائما لبسها بسيط تيشرت و جينز وخلص ماكو شي مثير بمظهرها بس عيونها حلوة لونهم اخضر زيتوني على عسلي ورموشها طوال ولو هي ما تنزع الكلاو اللي براسها بس شعرها مبين بني فاتح من كذلتها متخلي مكياج و حنطية يعني حلوة هي بس ممهتمة بنفسها ولا بارزة جمالها مثل البنات بمكياج او سشوار او لبس معين مستورة و ما تحب المظاهر برغم هالشي هي تجذب المقابل

من يصير وكت الاستراحة تكعد لوحدها تاكل شوية وتلف الباقي ما اعرف اذا جانت تاخذة وياها او تنطي لاحد

اما بالشغل فكلش تذب نفسها وتشتغل بلا ما تتعب صادفت مرة صار عدنا لود شغل مو طبيعي بالمعمل كملت كل شغلها على حسب الاصول بدون ما تشتكي مثل بقية العمال وتكول منريد اوفر تايم حتى قسم منهم طلعو وبقينا قليلين اني وهي وكم واحد من تعبنا غفينا الا هي بقت كاعدة وكملت الشغل وسلمتة بس ما حسبولها مكافأة ومع هذا هم ما اشتكت ولا حجت شي حتى اجازة متاخذ يجوز حالتهم تعبانة كلش ولازم تجيب فلوس لاهلها

قررت بيني وبين نفسي الحكها بالليل من نكمل شغل ونطلع واشوف وين تروح او اندل بيتها ..