شجن

2

#شجن2
Shahd Alsalman
رجعت للبيت اتلكتني امي مثل كل يوم مسوية عشا ومنتظرتني
ما عدنا احد اخويا متزوج ومسافر واني كاعد ويا امي
ابوية مستشهد بالحرب الايرانية جان ضابط بالجيش 
امي بقت تربينا اني واخوية وتلح علية بموضوع الزواج بس ما اريد اريد احب وحدة واقتنع بيها واتزوج واعيش مرتاح
كلشي احجي لامي تقريبا هي اكدر اكول عنها صديقتي وحبيبتي مو بس امي
حجيتلها عن داليا او شجن اسمها الثاني وعن اللي شفتة بفايلها

- يمة خاف وراها شي او مصيبة اسم الله
- لا يمة هي كلش فقيرة ومبينة على كد حالها
- ميخالف يمة متدري الناس والبيوت اسرار
- صحيح امي
- انت عاجبتك البنية يعني ؟
- مو قصة اعجاب بس هيج فضول وحاب اعرف كل شي عنها
- زين ممكتوب بالفايل عنوان يوصل لبيتها
- اي اكو وراح الحكها ورة منطلع من الدوام باجر او عكبة ع التساهيل يعني
- الله يبعد  عنك ولد الحرام يمة
- امين ويخليج الي يا روحي
- حبيبي انت يلة كوم نام ارتاح
- ان شاء الله تصبحين على خير
- وانت من اهل الخير بعد كلبي

رحت لفراشي واني احاول ارتب افكاري شلون اوصللها وشلون اكدر احجي وياها بدون ما ازعجها او اجيبلها حجاية لان الموظفين العدنا غضب اذا ما لكو احد يحجون علي يحجون على روحهم

كعدت ثاني يوم الصبح وتريكت ويا امي وبستها وطلعت رجعتلها دا اوصيها تتعشى ما تنتظرني
وصلت للدوام وعيني كل الوكت عليها انتظرت شوكت نخلص
مر اليوم وخلص ومن طلعنا لحكتها ممنتبهة لوجودي تمشي وهي صافنة
بس مشت هواية تكسرت رجليا والله هاي شلون كل يوم هيج ممعقولة خاف رايحة لغير مكان لان مو هو نفسة العنوان المكتوب

تفاجئت انه طبت بمكان يشبه الكرفان وقديم وحتى ماكو يمها اي جيران او احد يعني كاعدة لوحدها
زين معقولة تكون متواعدة ويا احد بس ما طلعت تلفونها ولا حتى كتبت او اتصلت على احد
هاي اذا من الاصل عدها تلفون
ظليت ساعتين برة انتظر بس ماكو ولا نفر طلع وما اجة احد

طلعت هي وشايلة بيدها نفس اللفة اللي تلفها بعد ما تكمل اكلها بالاستراحة وتصيح بش بش بش التمو عليها 4 بزونات وهي تقسملهم وتوكلهم
واني عبالي تجيبها لاهلها او تبقيها الهم

كعدت على الدرج وتباوع للسما ما اعرف تحجي ويا احد او تدعي او شنو ببالها ما اعرف
دخلت هي للكرفان وطفة من عدها الضوة اكيد نامت اني هم تعبت ورجعت بس اخذت تكسي لان مستحيل ارجع امشي تكسرت