شجن

8

#شجن8
Shahd Alsalman
كعدت بالليل عطشانة رحت للمطبخ اشرب مي
كعدت ع الكرسي الموجود وبديت افكر شنو اسوي ووين اروح وارجع للكرفان او لا
هم صحيح عرفتهم بس ما اعرف حيلاحكوني بعد ميلاحكوني
بعدين لازم اروح منا مترهم ابقى يمهم ناس لا اعرفهم ولا يعرفوني وهمين زحمة اذا اجاهم احد شيكلولة منو اني
ويا مدا افكر شفت وائل واكف بباب المطبخ متجتف و يباوعلي
- شعندج كاعدة ؟
- عطشت وكمت اشرب
- بس انت صارلج فوك الربع ساعة كاعدة وتفكرين
- دا افكر لوين اروح
- متروحين لمكان ابقي هنا ماكو احد هنا وبس امي وحاجيلها عنج
- حاجيلها ؟
- اي كل شي تعرف هي صديقتي
- الله يخليها الك
- داليا منو ذولة الي جنتي يمهم ؟
- مراح تعوف هالسؤال
- لا ولازم اعرف
- جماعة اتفقت وياهم حتى اطلع تهريب لاوربا
- تهريب !
- اي اريد اسافر وما عندي غير هالحل
- بس حسب ما شفت عندج فلوس يعني تكدرين تطلعين بطريقة شرعية وماكو داعي تعرضين نفسج للخطر انت رايحة ببحر مو لعب
- اعرف اسبح واعرف مخاطر الطريق بس هيج احسن وما اتكلف هواية
- وين اهلج ؟
- مو هنا
- لا تجاوبيني هيج احجيلي بالتفصيل
- وائل مالك علاقة بية باجر راح اطلع منا وادبر نفسي
جانت تريد ترجع للغرفة لزمتها من ايدها وعصرتها صدك عصبتني من طريقة كلامها
- اسمعي لج ترة تحملتج هواية احجي شنو ضامة لا اسوي شي ميعجبج لا تخليني افقد اعصابي اكثر
- اييييي وخر عني كتلك لا تدخل بحياتي مالك علاقة بية
- لا تعلين صوتج واحجي
- ما احجي وخر ايدك عني
- تعالي وين رايحة
- هسة راح اطلع منا ومتشوف وجهي
- داليا
- خلص اترجاك كافي لهنا ومقصرت انت
طبت بدلت واخذت جنطتها ورادت تطلع مخليتها كوة قنعتها تبقى بس لباجر
من جنت احجي وياها انتبهت على اثر بركبتها يمكن حرك او جرح ما انتبهت الضوة خافت جان ..
بقيت كاعد للصبح خفت لا تطلع وتغافلني رحت اكعدها لكيتها كاعدة وعلى تبديلتها
- يلة تعالي نتريك
- ما اتريك
- ليش هذا تكملة مال عناد البارحة
- ما اكل الصبح شي هيج متعودة
- على راحتج بس اتحضري حتى نطلع للشغل
- اكيد مراح نطلع سوة ما اريد احد يشوفني وياك
- اي ماشي عود امشي ورايا بس هسة تعالي ناكل شي من البارحة انت مماكلة
- اوكي
كعدت وياه بس ما اكلت شي بس صافنة
- يلة كومي نروح
- يلة
- هاي شنو ليش الجنطة وياج
- لعد وين اخليها
- خليها هنا شون تاخذيها وياج لهناك
- بس
- خلص يكفي عناد داليا يلة كومي اتاخرنا
طلعنا هي ورايا تمشي ووصلنا لمكان شغلنا
نشتغل وتتلاكة عيونا ونظراتنا تبقى نظرتها متوترة وبيها شراسة وتحدي
خلصنا شغل ورجعنا للبيت
- تعالي نتعشى سوة
- اني ما اتعشى
- بس انت اكلج قليل كلش
- احسن ما اريد اكل هيج مرتاحة
- براحتج
ورة الاكل كعدنا بالحديقة مخليتها تنام
سولفتلها عني وعن اهلي كمت استدرجها بالحجي حتى لو اعرف معلومات عنها
- اني خريج ادارة واقتصاد
- حلو
- وانت شمخلصة
- ثالث متوسط
- شكد عمرج
- 18
- يعني اني اكبر منج ب 8 سنوات اني 26
- صحيح
- ليش مكملتي
- ظروف
- انت من بغداد صح
- اي
- يعني اهلج هناك
- اي هناك
- ما عندج اخوة اني عندي اخ واحد متزوج ومسافر ومستقر هناك كل فترة يجونا
- عندي اخ واحد
- ووينة
- ما اعرف انفقد بانفجار وملكيناه بعد
- واهلج اقصد والدتج ووالدج
- منفصلين
- اني والدي مستشهد بحرب ايران من جنت صغير يعني
- الله يرحمة
- ليش والدج او ووالدتج مو وياج شعجب وحدج يعني
- والدي مسافر ما اعرف شي عنة
-ووالدتج
- اني نعست اريد انام تعبت اليوم
- ليش تكرهيها ؟
- للمرة المليون حكلك لا تتدخل بحياتي
- داليا انت هنا لوحدج وصغيرة خليني اساعدج
- محد يساعد احد بهاي الدنيا كل واحد يدور مصلحتة وكل واحد يريد شي معين واللي تريدة مني ما اعرف شنو هو
- ليش اني طلبت منج شي ؟ ساومتج على شي
- لا
- بعد ليش هذا كلامج اصابعج مو سوة وكل انسان يسوي بأصلة اذا صادفوج هيج ناس اكو هواية بالمقابل زينين
- هذولة قليلين واني ما اريد اتصادم باحد ولا اعرف احد ولا احد يعرفني
- داليا افهميني اني اريد اساعدج بدون مقابل لا تخافين مني واوثقي بية
- هههههه
ما عندي ثقة بأحد
- اوعدج ما اخذلج اوثقي بية وهذا وعد بركبتي
ظلت ساكتة وصافنة بس تباوعلي
- لا تفكرين هواية صدكيني اذا وجودي اعرف بي يأذيج راح ابتعد عنج وما اخلي احد يمسج
- وائل البية مكفيني لا تصير انت هم علية ما اريد اشيل هم احد ولا انخذل اكثر اريد اطلع من هنا
كل دقيقة هنا زيادة خطر علية اتحملت كل شي بس في سبيل اخلص واطلع
- تعالي اكعدي هنا واحجيلي شنو الي هيج مضوجج ومخليج تريدين تروحين منا
سكتت ومحجيت شي مدا اكدر احجي او اوثق بي بس هو مبين كد الثقة كل شي سوة حتى اكون بامان وهو ميعرف شي عني من كدما انغدرت كمت اعرف المقابل شنو ومع هذا ما امنت
- مو كتلج لا تفكرين
- ما اريد احد يلكاني اقصد اهلي
- ليش
- مهزومة من قضية
- قضية !!
- اي
- كملي شنو هالقضية
- ما اكدر احجيلك اكثر اني ممرتاحة
- كملي داليا اني اساعدج والله بس احجي
- قتلت واحد
- شنووو
- قتلتة وخلصت منة
- يعني مات انت قاتلة؟؟
- اي قاتلة و ما اعرف فطس او لا يطبة جهنم
- انت شدتحجين وتكوليها بكل برود هيج
- يستاهل لو اكو اكثر من الموت جان سويتة بي
- داليا
- يستاهل والله العظيم
- بس انت قتلتي انسان
- مو انسان لا تكول عنة انسان هذا حيوان وحش
- اهدي خلص
من حجت هيج وتوترت كامت تكح بقوة واختنكت تذكرت مالتها البخاخ ركضت جبتة الها واستعملتة
- شلونج هسة
- زينة
- خلص كافي اهدي انسي الصار اني متاكد انت ممسوية شي غلط

كامت لغرفتها وراحت تنام واني هم رحت لغرفتي بس كل الليل اتكلب وما غمضلي جفن يعني هي قاتلة من نبرة صوتها و تعابير وجهها بين كره امها وبين انه هي قاتلة لسبب قوي

ثاني يوم جانت عطلة خليتها تنام على راحتها
رحت احضر ريوك واجتي امي ونبهت عليها انه ما تضوجها و تتحملها شوية وبعدين راح افتهم منها كل شي وافهمها وامي مكالت شي يمكن كيفت انه اكو احد وياها بالبيت هي تحب البنات وتحب يكون البيت مليان مرات يجون بنات خالتي يمها تطير من الفرح