شجن

13

#شجن13
Shahd Alsalman
حبيتة ..
واعرف هالشي غلط وبنفس الوقت اعرف مراح يستمر هالحب بكل الاحوال و قصتي صارت معروفة واذا ابقى اكثر راح اخسر حريتي
دا افكر وباوعت من الشباج وائل يحجي ويا سالي
ضجت بس خلص هو يستاهل وحدة مثلها تحبة وتخاف علي مو مثلي
سلمت عليهم وطلعت هي جانت جاية لهذا الغرض وحصلت اللي تريدة

طلعت برة وشفت وائل
- لازم اطلع منا ويمكن عرفو مكاني
- شدتحجين شلون ومنو كالج هالحجي
- عرفت وخلص وائل حياخذوني منا وراح تصيرلكم مشكلة خليني اطلع الله يخليك
- داليا ما اخليج تطلعين اذا هنا خطر عليج اوديج لغير مكان وامن
- لا انت مقصرت يكفي لهنا تعبتك انت وخالة
- ديلة حضري جنطتج وامشي نروح منا
- وائل
- امشي بلا نقاش بسرعة

سلمت على خالة وفهمتها ما تحجي شي لاحد واللي يسال عني تكولة رجعت لاهلي
وائل قدملي على اجازة طويلة وهم وافقو لان من اشتغلت لليوم ما اخذت اجازة وميريدون يستغنون عني واني هم ما اكدر ابطل محتاجة للشغل والفلوس

وداني لمكان معزول وبعيد جابلي كل الاحتاجة وكالي انه هاي شقة ابو القديمة ومحد يعرف بيها ومحد يوصلها
طلع وعافني بس اول مرة احس بخوف هيج يمكن لان احس راح انسجن وخلص

مر كم يوم ما اجاني بس نتخابر دائما وكالي راح اجي امر عليج اليوم
اجة وكعدنا ودنحجي مسمعت الا صوت الباب كأنو ديتكسر واني قافلتة بس وائل باوع من ورة البردة شاف سيارة الشرطة ومعناها سالي سوت اللي براسهة
اخذت جنطتي وطلعنا من باب الطوارىء وركضت اني و هو بس اختنكت ركضنا مسافة كلش طويلة نصيت راسي وبلشت اكح قوي ردت البخاخ ما لكيتة احس روحي راح تطلع ومدا اكدر اتنفس
كعدت بالكاع ووائل يحجي وياية ويعلمني شلون اخذ نفس وشلون اسوي شهيق وزفير بس مدا اكدر مددني ع الكاع وسوالي تنفس اصطناعي بلشت ارجع طبيعية بس صفنت بعيونة وهو هم جانت اول مرة نتقرب بيها من بعض هيج شي مينوصف الاحساس الحسيتة محد خاف علية بكدة ولا حسيت بحب مثل اللي يحسة تجاهي كتلة خلي نروح منا انتبه على روحة ووخر مني وكمنا كملنا مشي تعبنا كعدنا بمكان

- داليا بعد كل شي صار مراح تحجيلي
- وائل خجلانة من هالماضي وخايفة هالشي مو بيدي
- ميخالف واني متقبل كل شي بس كليلي خليني اوكف يمج واساعدج
- جان عمري 13 سنة داخلة ع ال 14 اهلي انفصلو وبابا طلك ماما مجانو متفاهمين عندي اخ اكبر مني وانفقد بانفجار منعرف عايش لو ميت بعد هالحادث اتطلكو عشت ويا بابا فترة وانهزمت منة كل يوم سكر وشرب وسهر واحيانا يجيب وياه نسوان يكول متزوجهم بس ما اعرف صدك لو جذب
رحت لامي مجانت احسن من ابوية تتعرف على ضباط وعلى ناس وسوت بيتها عبارة عن تجمع للاعبين القمار تكول استرزق من هالشغلة وهي حرام بحرام هواية جنت اتعارك وياها على هذا الموضوع بس لا حياة لمن تنادي
- وبعدين كملي
- انخطبت واني صغيرة ومجنت راضية بس امي كالت احسنلج وشفت هالشي احسن الي لا اب ولا ام براسهم خير اتزوج وهاهية ودراستي اكملها
- وتزوجتي؟
- هههههههههه
من سالتها ضحكت والدمع غرك عيونها
- كملي
- ما اتزوجت بالاول اجة وشافني عجبتة وكال اريدها مجنت اعرف هو منو او ابن منو عادي اي واحد وخلص سوينا خطبة بيناتنا اجت امة وخالتة وهو واني وامي لبسنا الحلقات وكطعنا مهر سيد
مر شهر وكال نتزوج
- اي ؟
- خلص عفية تعبت
- داليا فدوة احجي
- كالي تعالي نروح لشقتنا حتى نعرف شناقصها
مقبلت بالاول بس كال علمود نكملها ونستقر بيها
- اي كملي لا تسكتين
- فتنا وجابلي عصير شربت منة جنت عطشانة ما اعرف شصارلي ذبحني النعس
- ليش ؟
- حاطلي منوم بالعصير
- منوم !
- اي حتى يكدر يكمل الخطة الوصخة الي سواها هو وامة
- شون يعني
- وائل كافي خلص
...