شجن

10

#شجن10
Shahd Alsalman

فتنا للبيت والكل يباوعلي بنظرات غريبة خاصة سالي ما اعرف شبيها كلش ضاجت من شافتني اعتقد هي اكبر مني والبقية وحدة بعمري وحدة اصغر
توقعاتي طلعت صحيحة بس طول الكعدة احس سالي كالبة وجهها علية وضايجة وتحجي بس ويا وائل و كوة لازمة نفسها يمكن تحبة وغيرانة هيج حللت الموقف لان خواتها مو هيج وكلش حبابات وطبيعيات سالوني ليش اجيت لهنا وكتلهم ما كدرت اعيش هناك مجتمعهم صعب و هنا احسن

سالي استهزأت بية وكالت انت ما عندج عقل اكو واحد يعوف امريكا ويجي لهناك كتلها تكدرين تطلعين وتعيشين هناك يعني مو مجبورة تبقين بمكان محابتة كل واحد بينا يرتاح لمكان معين واني هنا راحتي انحرجت من جوابي وكامت من الاكل

وراها غسلنا المواعين اني و طيبة هي كلش تدخل الكلب ورأسا تسولف واجتماعية سولفت وياها وحجتلي عن مدرستها وعن صديقاتها يعني حبيتها وحبتني
دعاء واكفة يمنا هم تتشاقى و تضحك ودتسوي بالجاي طلعنا واخذت الشكر وياية ودعاء جابت الجاي
لكيت سالي ووائل بالحديقة وهي لازكة يمة وتحجي وتضحك هو مو يمة بس هي ما اعرف شبيها وخالة وامها وحدة كاعدة يم اللوخ ويسولفون كعدنا ودنحجي بمواضيع عامة

بس الصراحة تضايقت من سالي لان قريبة من وائل ما ادري يمكن غرت منها او ضجت من اسلوبها
ترخصت منهم ورحت لغرفتي صدك احس بخنكة ما اعرف شبية بعدين كلت ويا نفسي اني ليش عفتة لوائل وياها ودخلت باوعت لنفسي بالمراية
شبيج داليا اصحي شنو معقولة حبيتي لا تنسين نفسج ما تكدرين لا تحبين ولا ترتبطين و لا حتى من حقج تفكرين بأحد كعدت على الميز دا ارسم من اضوج احب اشخبط وارسم و رسمي قوي يعني محترف ودا افكر واشخبط من خلصت انتبهت اني راسمة وائل بلا ما احس هاي شديصير وياية ضميت الرسمة بسرعة جوة الدفتر لان وائل دك الباب
- شو كاعدة وحدج تعالي ويانة
- لا اريد انام وارتاح اخذو راحتكم
- بس عبالي نسهر باجر ما ورانة دوام
- ميخالف ما اكدر اكعد وياكم ويسالوني وانحرج لان دا اجذب خليني هنا احسن
- داليا انت ضايجة من شي ؟
- لا بالعكس ماكو شي
- خوش اعوفج على راحتج
-شكرا

سالي تحبني وتريد تتقرب الي بس احسها اختي ما اتخيلها ممكن تكون مرتي هي ما اعترفت بهذا الشي بس امي اكثر من مرة لمحتلي عليها وافتهمت انه خالتي دازتها تجس نبض لكن ما اريدها احبها صح بس حب اخوي مو اكثر من هيج

من دخلنا اني وداليا لحد ما داليا كامت هي ثغثها بالحجي وتضوجها وداليا تجاوبها بكل هدوء بس اعرف بيها ضايجة منها
سالي هواية تضوج وتغار علية برغم اكثر من مرة كتلها وسمعتهت انه انت اختي و ما اشوفج اكثر من اختي

دخلت لداليا بالغرفة شكلها جانت ترسم شي وضمت الرسمة كلت من تكون ماكو او نايمة ادخل اشوف شرسمت
مقبلت تطلع وياية وتحججت انه متريد احد يسالها شي فخليتها على راحتها واصلا هي تعبت اليوم بالشغل
طلعت ولكيت سالي قريبة من الغرفة تضحك وتجرجر بية عود تعال دنسولف ونحجي كتلها نعسان  واريد انام كلش تعبان ضاجت هي بس ميهمني ورحت نمت ...