(......) : أمش جيب المويـة يا خالد وكلم عمك حمد بتاع التلج عليك الله لوحين تلج سررريع و وري اخوك يجيب عيش استعجل بالله
خالـد : حاضر يا عمي
وقااطع صمت الناس
(........) : الفاتحه
وكل العزاء شال مع عمنا إبراهيـم الفاتحه
عمنا إبراهيـم والد خالد (خالد إبراهيم الفكي) اتوفى عمو اخو ابوه طوالي الليلة, مع الصباحيات كدا
اليوم يوم جمعة عمو
عندو قلب وتعبان ليو فترة طووويلة وربنا رفعو
دفنوهو بعد الصبـح و العزاء عندهم في البيـت
عمهم كان ساكن معاهم عندو غرفة برا كدا قاعد فيها براو
ما متزوج ولا عندو اولاد وحيد وكان محبوب ومُقرب شديد لخالد
(طالب في جامعه (#) العريقة, السنة التالته بقرا هندسة , 21 سنة) ساكنيـن الخرطوم حي الديـم واحد من الأحياء العريقة في البلد
خالد مُتفاني في الخدمة وشغال بإخلاص شديد في العزاء المويـة والشاي والتوزيـع وشغال المراسيل الشغل كلو فوق رااسو
الناس كلها لسانا فوق خالد بس ,(والله ماشاءالله ود ممتاز ـ ديل الاولاد ولا بلاش ـ الله يحفظو ليك يا عم إبراهيم - احسن شيء ولدك دا اخير مما يطلع ليك زي اولاد الزمن ديل) ومدح تقـيل فوقو
الما عارفينو إنو عم خالد اللهو عمنا إسحق الفكي, زول مرررطب ومليااان قروش عندو شركات واستثمارات لا تعد ولا تُحصى وثروة كبيـرة وعندو أراضي في البلد
يعني من الااخر غنيان شديد قروشو كلها في البنوك.
طبعاً النااس برضو ماا بتريح (شفتو خدمة خالد دي كلها عشان داير قروش عمو,- اااي اي اصلو اولاد الزمن ديل طماعين ـ يا حليل ايام ناس الطيبه والقلب النضيف - شوف بالله الود الخسيس دا شغال الشغل دا كلو عشان قروش عمو ـ ووو)
لكن صاحبنا ما شغال بيـهم مواصل في شغلو رغم التعليقات البسمعها, همو بس الشغل دا, وشغال يستغفر ويدعو لعمو الميـت
وبعد لحظات يجي طفل صغير لخالد
الطفل : خالد يا خالد
خالد : اي يا حمودي داير حاجه!
الطفل : خالتو فتحيه بتناديك
خالد : امي!
الطفل : اي
ويتوجه طواالي على امو جنب باب بيتم
##################
وعلى صعيد اخر
كانت (سماح) بتستعد لأسعد يووم في حياتها ,
الليلة ح تلاقي زميلها في الجامعه (أحمد) ,عازمها حفلة عيد ميلادو في بيتم , في العمارات
(سماح طالبـة في جامعة (#) دفعة خالد, السنة التالتة هندسة, عمرها 20سنة , ساكنة مع ناس بيتها ,المنشيـة)
سماح معجبـة بأحمد شديد, شايفه فيو صفات فارس الأحلام الح يركب الحصان الأبيض الفيو جنحين ويجي يطير بيها للسعادة والفرح بس ما معروف الأيام داسه ليها شنو!
زميلها في الجامعه برضــو, بس بقرا تخصص غير تخصصها نفس الدفعة
الحفلـة الساعة 9:00م في بيت احمد وعاازم كل الدفعة , ( أحمد جمال موسى 23 سنة ساكن العمارات مع ابوهو وزوجة ابوهو - امو اتوفت ليها 6 سنيـن) عاايش حياتو وابوهو مريحو ومديو كل شيء يعني بإختصار مدلع , شخصيتو في الجامعة غير اي شخصية شاايف نفسو وحاسي بروحو ويا دنيا ما فيك إلا أنــا وعربية اخر موديـل و لعب وضحك ودي حيااتو
المهم النااس دي كلها عااجبها موضوع الحفلة وخصوصاً إنها في بيت أحمد, يعني ااخر فرح وح تكون حفلة كاربه ولمه والشلة كلها ح تجي
أحمد : الو ....
سماح : ايوا معاك
احمد : الليله جاية صح!
سماح : اكيد معقوله افوت حفلتك!
احمد :تمام بس اهم شيء تجي بدري
سماح: حااضر اول الحاضرين يلا باي
احمد : تمام
أحمد اتصل علي شلتو كلها عشان يعرف الجاي من الما جاي منو ,الناس دي ولا مُصدقة زااتو كلهم قالوا جاييـن ناس بُساط الاعتذروا
أحمد : الو, ياا عمك جهزت الحاجات?
(.....) : كل شيء جااهز يا معلم بس إنت ريحني وانا بديك المطلوب
أحمد : راحتك عندي بس خليك اول الحاضريـن في الحفلة عندي ليك بضااعة ما بتتفوت
(.....) : الشغل أصلي?
أحمد: وانا قاعد اجيب تقليد? شغلي كلو اصلي بس انت جهز لي حاجاتي
(.....) :سااعة زمن واكون معاك
أحمد : لا لا ساعة شنو! انت تعال لي زي الساعة 7 كدا الشغل كلو بجي زي الوقت دا
(.....) : ياا زول خييير سلام
أحمد شكلهم مُحضر ليهم مفأجاة بس شكلها كدا من نوع تااني, ح نعرفها غاايتو
###################
خالد : اي يا أمي كنت بتناديني!
الام : اي ياا ولدي في وحده هنا اتصلت في تلفوني و اتكلمت معاي انا ما فهمت منها اي حاجه مع جوطة النسوان جوا, العرفتو انها قالت بتعرف عمك الله يرحمو
خالد : بتعرف عمي! !!
الام: اي وقالت لي اديني ولدك خالد انا زاتي لمن اتهجمت
خالد : كدي خلاص اديني التلفون وانتي خشي جوا اقعدي مع الضيوف وانا بتصل ليها بشوفها دايرا شنو
الام : حاضر يا ولدي اهو اخر رقم ضرب الزين دا
خالد : ابشري يا امي
الام خشت جوا وخالد فتح سجل المكالمات عشان يشوف الرقم الغريب الإتصـل على امو دا ويرجع ليـو
وإتصـل📞
خالد :ألو السلام عليـكم
(.....) : وعليـكم السلام معاي منو!
خالد : انتي اتصلتي هنا قبل شوية وكان اتكلمتي مع امي وقلتي دايراني!
(.....) : إنت خاالد
خالد : اي نعم
(......) : أنا اسرار
خالد : أسرار? اسرار منو!
(......) : أسرار زوجة إسحق المرحوم .....
يتبــع,,,
