"أسبت مكانك يا زول .."
عيسى " انتو منو !!!!!"
واحد منهم طلع مسدس و ضرب عيسى ... عيسى وقع على الارض والدم دا بقا في كل مكان ... عيسى بباقي الروح العندو
عيسى" انتو يا اولاد الـ......"
(......) " بتنبذ كمان? انت باقي فيك روح لمن تنبذ! دي رسالة من السيدة الفاضلة اسرار نتمنى تكون وصلت ..."
عيسى " اسرار? "
قبــل ما ينتهي من جملـتو واحد منهم طلع مسدس وضربوا طلقة تانيـة ...بس المره دي فاضت فيها روحو, كانت موجهة لراسو مباشــرةً ... شاافو المنظر دا قاامو جاريــن طوااالي على الباب قفلو الباب على عيسى من برا وركبو عرباتهم ومشــو ...
في العربية واحد منهم اتصل على اسرار
(........) " يا ملكه خلصنا ليـك الموضوع "
اسرار " عملتو شنو? "
(........) " عملنا اللازم يتعمل "
قفل الخط اسرار خاافت خصوصاً لمن سمعت نبره صوتو حست بإنو في شيء ما طبيعي ...طواالي اتصلت على فارس
اسرار" الو يا فارس رجالك ديل عملو شنو? "
فارس " انتي قتي ليهم شنو? "
اسرار " قت ليهم بس دقوهو وادبوهو عشان تاني ما يقرب علي ويجيبو منو كل القروش العندو "
فارس " ادبوهو دي عندنا معناها ريحوهو و ودوهو لقبرو ...الله يرحمو كان راجل طيب "
اسرار " بتقول في شنو انت يا فارس دا كلام شنو اكيد انت ما جادي? "
فارس " جادي كل الجدية يا سيده .. حبيبك ماات عشان تاني ما كل شوية يجيك ناطي لعرس عرس كدا ريحناهو ليـك ومنك "
اسرار ما كانت مصدقة البتسمعو دا, عمرها ما فكرت تقتل عيسى مع انها ما كانت بتحبو بس كانت دايرا منو المصلحة بتاعت خالد والموضوع انتهى وبقت في الطريقة التحلها منو ...فكرت تكلم فارس, فارس دا بإعتبارو رئيس العصابة ,اسرار عندو كأنها "عبد" من العبيد الزماان ديلك ... ما بتقدر تتحرك اي تحرك إلا بعلمو ..فارس بالجد كان رئيس لعصابة وكان بتاجر في المخدرات, تاجر مخدرات كبيـر وجاايب منها قروش زي التراب ...بوزع في ارقى المناطق في البلد وبأغلى الأسعار ... اسرار ما كانت عارفة إنو تاجر مخدرات العارفاهو انو فارس الخدعها بالحب زماان لمن كانت صغيـرة واتحصل منها على الـ هو دايرو ..وبقت كأنها شغالة عندو, شغلتها بقت كلها نصب على امثال "خالد" ... تشتغل ليها في شركة فترة من الزمن وتنصب على صاحب الشركة وتشيل املاكو... قضاياها كتيـرة وشغلها (نضيف) ما بتخلي اي أثر او ثغرة في شغلها ... بس عمرها ما كان بتفكر تقتل ليها زول ... دخلتها بعيسى دي كانت بإعتبـار اخر عملية ومنها (تعتزل) بس شكلها المرة دي العمليـة ح تطول خصوصاً بعد موت عيسى ...
###################
كان في تحريات عن تاجر مخدرات إسمو (فارس الجني) ... مسؤل منها صاحب معتصـم (عمر) ... التحريات ليها فترة طويلة شغالة وبفتشو في طرف خيط وااحد بس عشان يلمو في فارس الجني دا ... ما معروف شكلو ولا حصل زول شافو, بس شغلو بقا شبه مكشوف والعيون بقت وااضحه على شغلو والشرطة قاابضة كتيـر من بضاعتو
...معتصم اتصل على "عمر" عشان يتابع ليهو احمد زوج سماح ...
معتصم " يا سيادة .. "
عمر " يا عزيزي ..اخبارك وامورك يا عريس "
معتصم "تمام والله ...عندي معاك موضوع كدا "
عمر " تفضل طواالي ياااخ هو احنا لاقيـن "
معتصم " عندي واحد دايرك تشوف لي ملفو عندك ويا ريت لو راقبتو كمان تكون ما قصرت ..."
عمر " دا منو ..."
معتصم وراهو كل التفاصيـل عن أحمد راجل سماح وحكا ليهو القصص الحصلت ...
عمر جاهو احساس انو احمد بجيب 'حبوبو' من زول تابع للجني ...ربط كم قضية فاتت كدا مع بعض ... غايتو عمر وعد معتصـم بإنو ح يتحرى عن الإسمو احمد دا ...
####################
مرا الشهر و خالد مواعيد سفرو قربت للجزيـرة يومين بس و ح يسافر .. قرر يقعد هناك سنة يبعد زاتو عن دوشه العاصمه والناس وكل فترة ح يجي يشوف ناس بيتهم ...مشا الجامعة و عمل (تجميد) لانو مسافر وما ح يقدر يوفق بين القراية والشغل في الجزيره
الام "ياا خالد إنت مُصر على السفر دا? "
خالد "اي يا امي ما عندي طريقة غير دي ...لازم امش اشوف الشغل هناك خصوصاً بعد الخسارات الحصلت للشركات, ما داير اضيع الباقي من حق عمي "
الام " الله يوفقك يا ولدي بس عندي ليك طلب لو بتعزني اعملو لي قبل ما تسافر ..."
خالد " عيوني ليك يا حبيبة"
الام " باقي ليك كم يوم للسفر ..!"
خالد " يومين يا امي ...إن شاءالله "
الام " طيب ما ممكن تخليها إسبوع او اسبوعيـن كمان? "
خالد "بس كدا يا امي ح تأخر وانا واعد الناس اول الشهر اكون معاهم ...لكن لو عندك حاجة الشغل يطير المهم انتي ..."
الام " هدى بت خالتك "
خالد لمن سمع الإسـم جااهو احساس غريب ...
خالد " هدى! مالها دايره حاجه? "
الام " اي ... انا دايراك ليها يا ولدي "
خالد " لكن يا امـ....."
الام " بدون مقاطعة يا ولدي البت قلبها ح يطير عليك ...ودايراك وانت عارف كدا ,وزي ما بقولوا غتي قدحك يا ولدي والقريبة اخير ليك من البعيده عرسها وسوقا معاك الجزيرة على الاقل اكون مطمنة وانت بعيد عني ..."
خالد " يا امي انـ...."
الام " شوف يا ولدي احسن من هدى صعب ..وقليله الزيها بت مؤدبة و أخلاق وزولة ملتزمة وزولة ديـن يا خالد ... انا ما ح اغصبك علي زول بس دايراك تفكر ويا ريت ما ترفض ولو ما عاجباك هدى قول لي وانا ما ح ازعل لانو في النهاية انت الليك حق الإختيار, زوجتك وإنت الح تقعد معاها ..."
خالد " حاضر يا امي انا ح استخيـر و اوريـك الحاصل إن شاءالله ولو ربنا كاتب ماف شيء ح يوقف ..."
الام " الله يرضى عنك يا ولدي ويحفظك لي "
خالد خشا غرفتو ... ورقد الوقت داك بعد العشاء كدا ... خالد طلع المصحف وقرا وردو من القران ...عندو ورد يومي مستحيـل يخليهو ...لمن يقرا دائماً بحس بالراحة والطمأنينة ... قرا ومشا اتوضأ وصلي ركعتيـن ودعا " اللهم إني استخيرك بعلمك واستقدرك بقدرتك إنك تعلم ولا أعلم وتقدر ولا اقدر وأنت علام الغيــوب ,اللهم إن كنت تعلم أن ......" خالد إستخار في زواجو من هدى ودعى ربنا يكتب ليهو الخيــر ... خالد طبعاً معجب بهدى من زمااان وخصوصاً بعد تغيـرت وبقت متدينة ... بس ما بقدر يقول ليـها كدا وكان خاتي إنو ح يتزوجها لو ربنا كتب ليهو ...ما كلمها بكدا لانو ح يربط قلبو بشيء غيبي ...الحب حلال بس خالد داير يتم الحلال ويتزوجها ويعبر ليها عن حبـو ما حبا يلف ويدور ويقول ليها انو معجب بيها ...مع انو متأكد إنو هي برضو نفس إحساسو ....
خالد استخار وقرر بكرا يقول لأمو يمشو بيت ناس خالتهم ... قبل ما ينوم إتصل على ناس الشركة ووقال ليـهم إحتمال يتأخر ...وببقى معاهم على اتصال بتأكيد الجيه
##################
اسرار بقت عايشه في رعب ...وخايفه من فارس خوف شديد ... اي حركه تعملها بقت تعمل ليها الف حساب... عيسى مااف زول عرف إنو ميـت إلا بعد ما ريحة الجثة طلعت ونااس الحلة شمو ريحه "عفنه" طاالعة من البيـت فتحو الباب لقو عيسى على الارض ... مقتول الشرطة جات خققت و ودو الجثة المشرحة بس في النهاية البلاغ القضية اتقفلت ضد مجهول ...
خالد ما كان عارف الحصل لعيسى والعملوهو فيـهو ... الصباحيات بعد صحى من النــوم كان ماشي يوري امو انو الليلة بالليـل يمشو لناس هدى في البيـت ..جاهو إتصال من رقم الضابط الزماان كان ماسك قضية محمد اخوهو ..
الضابط " يا خالد حبيت اوريك انو عيسى مات ..."
خالد " عم عيسى ????"
الضابط " ايوا ..مقتول "
خالد " مقتول? ??? القتلوا منو! "
خالد بدون ما يحس دموعو نزلت ...بعد العملوا فيهو عيسى وكل الإتسبب فيهو لكن عيسى كان عزيز عليـهو صديق عمو المقرب ...
الضابط " ما معروف القضية اتقفلت ضد مجهول بس في حاجة مهمه "
خالد " اها ....."
الضابط " لمن جينا البيت بتاعو وفتشنا لقينا ........................"
يتبع,,,
