القاضي " وبعد الإطلاع على الاوراق المقدمة من كلا الطرفين خالد إبراهيم الفكي واسرار محمد مختار في قضية الاملاك والشركات الخاصة بالمرحوم إسحق الفكي هارون المتوفى ... وبعد البحث والتحري حكمت المحكمة بأن نصف الأملاك المزعومة وبعد تقديـم الاوراق تثبت شرعاً للمدعية اسرار محمد مختار بعد اطلاع المحكمة على صحة الاملاك و لها نصيبها الشرعي من ورثة المرحوم زوجها المتوفى إسحق الفكي, وبذلك يكون حق المدعو خالد ابراهيـم الفكي من حصة الشركة وما قدرته المحكمة على وجه الضرورة ونصيب مفترض له 15% من جملة الأملاك والإستثمارات على أن تحول الإدارة بتحول الملكية الشبه تامة لأسرار محمد ... رفعت الجلسة "
انا صرااحه مع اني كنت متوقع حكم زي دا بس قلبي اكلني واصلو ما ارتحت خصوصاً لمن حسيت عيسى ما مضايق من الحصل دا وما شكلو زعل, انا والله ما مزعلني القروش الراحت ولا الاستثمارات بس قلبي اصلو ما ارتاح للمراة دي, ومع الاوراق والحاجات دي لكن لسا حاسي بيها كذابة وحاسي بيها لاعبة لعبه كبيـرة في الشغلة دي ...
اها بس رجعت البيـت والهم دا فوق وشيء انا من المحكمة مااشي برجليـني ما حاسي زااتي ولا عارف نفسي مااش وين ولا الساعه كم
ما وقفني إلا اذان العصـر في مسجد القبلة بتاع شارع المطار دا, انا وقفت استمع للأذان دا والله حسيت كأني اول مرة اسمع اذان وارتحت راااحة كدا عجيبة لمن سمعتو, خشيت المسجد اتوضيـت
دخلت لقيت المسجد لسا الناس دي ياا داب بدت تجي... كبرت وصليــت والله انا الصلاة دي كلها بس شغال ادعو في ربنا يفرج عني ودموعي ديل فجاة كدا نزلن , كانت حاالة لا يعلم بيها الا ربي,
لكن انا بعد الصلاة دي ارتحت رااحة كدا عجيبة اتذكرت حديث النبي صلى الله عليه وسـلم لمن قال "ارحنا بها يا بلال ..." ـ انا ممكن ياا داب اكون حسيت بمعنى وطعم الحديث دا لمن صليت الركعتيـن ديــل ... ياا دااااب عشت مع " ارحنا بها " وخصوصاً لمن إتأملت في شاب جنبي وهو بصلي بسرعة مباالغ فيها ـ قبل الناااس زاتو ما يقيمو الصلاة هو كان صلى ركعتيـن وصلى بعدهن العصر وطوااالي قام داير يمرق ... انا نسيت همي واي شيء بقيـت في الزول دا وصلاتو دي واستعجالو وحركة إنو يصلي قبل الناس ما يصلو
طواالي لحقتو
" يا شاب السلام عليـكم"
جاوبني بإستغراب " مرحب وعليكم السلام .."
" كيف اخبارك...!"
" الحمدلله معليش بس مستعجل شوية كدا داير حاجه. .."
" اي بس تعليق بسيط "
الشاب " نعم تفضل ..."
" صرااحة يبدو عليك إنك مستعجل وكدا بس داير انبهك على حاجه صغيرة ياا ريت لمن تجي تصلي تخت انك بتصلي لربنا سبحانه وتعالى وانك وااقف بين يديهو الان وهو بعايـن ليك وشاايفك ورااجيـك تدعوهو , حااول فتش طعم - ارحنا بها يا بلال - لمن قالها رسولنا الكريم لبلال بن رباح ..."
الشاب " شكراً ليك يا اخوي انا صراحة صليت مستعجل لاني ءا ..."
" ماا تبرر لي بس عذرك دا لربنا إن شاءالله وياا ريت تستنى الجماعة الاصلية بتاعت المسجد وما تصلي قبلها "
الزول دا سمع كلامي بكل تفاهم وعجبتو النصيحة وقال لي ما كان عارف كدا ... غاايتو هو مشا و وعدني انو ح يصلح من صلاتو ...
انا صليت العصر وبعد العصر مرقت من المسجد وركبت الحافله على البيت ...
###################
وصلت البيـت ,ماا كنت شااايف قداامي زااتو ... والبيت دا مليـان الضيوف ما يدوك الدرب, جيت خااشي على الصالون, ما كنت قايل في زول وقفلت باب الصالون علي على اساس انوم واخد لي رااحه لحد ما اروق كدا اطلع للضيوف واشوفهم
فجأة اشوف ليـك الشيء قااعد في السريـر,
" هدى! !! ,,, ءااا الجابك هنا شـ ..!"
هدى " ءاااا ءاا انا مـ ما..."
طبعاً انا زااتي ما عرفت اسوي شنو والبت دي اتكبكبت كبكبه كدا عجيبة
انا مشيت على الباب فتحتو والبت دي الزي الساكينها جري على الباب ... انا طبعاً قفلت الباب وفكيتها ليـك ضحكة بأعلى صوت من المنظر الشفتو ـ ما زدت غاايتو إلا يقين بادبها و حياءها ـ
اهااا اخدت نومتي وصحيت مع المغرب مشيت اتغديت ولا هو فطرت يااها اول لقمه من الصـباح
مشيت الصلاة وجيـت لقيت امي راجياني في الصالون
عرفتها داير تعرف الحصـل ـ غااايتو اانا زااتي كنت محتاج لزول احكي ليهو و افضفض معاهو ...
حكيت ليها الحصل بكل تفاصيلو والقصة يااها
امي دي ولا عبرت غلبها زااتو الكلام و ورت ابوي
ابوي ما زاد من " إنا لله وإنا إليه راجعون "
" انا يا ابوي والله ما مطمن للشغلة دي وحاسي بيها فيها لعبة كبيرة "
ابوي " يا ولدي ما تظن بالناس ساي البت دي شكلها طيبة و ..."
"ابوي والله انا في كم موقف كدا جمعتهم وحسيت بيها ما جاده وشغلتها دي سرقة وانا ما عندي دليل على كلامي دا فعشان كدا ما بقدر اقولوا لزول وسااكت بس لكن ربنا ما بضيع حقنا ..."
ابوي " صح يا ولدي بس انت خلي يقينك في ربنا وربنا بعمل الفيهو الخير لينا كلنا ..."
امي حاولت تغير الجو وتطلعنا من الموضوع واتونسنا كدا ونسينا ليـك الضيوف زااتو
جاتنا خالتي وشافتنا طبعاً وإستغربت من الإحنا فيهو " هياااا يا ناس البيت عاد لكن ما عملتوها ظااهرة دا شنو! "
امي دي فكتها ضحكة كدا وكلنا ضحكنا وراها ...
امي " عااد ما نسينا يا بت امي ..."
خالتي " تنسي النستو عفاف ها قومي على ضيوفك ديل ..."
ابوي مرق معاهن ومشا على الضيوف بهناك في الصالة
الساعه كانت زي 9 وحاجه كدا, مسكت المصحف وبديت اقرا
بعد زي نص سااعه كدا تلفوني ضرب ...
( الضابط هشام يتصل بك) هشام دا طبعاً الضابط الكان جا لمحمد في المستشفى واتحرى معاهو ...
" ألو السلام عليـكم "
الضابط " وعليكم السلام خالد كيفك! "
"تمام والله كيف انت ..?"
الضابط " الحمدلله ما اطول عليـك وانا زاتي مشغول بس داير ااقول ليـك كلام مهم .."
" اتفضل يا سعادتك ..."
الضابط " أسرار ......................"
يتبــع ,,,
