خالد : ورتك هي منو!
السكرتير: اي قالت إسمها (اسرار) وبتقول إنك عارف قصتها وقالت لي لمن يسمع إني اسرار ح يدخلني ....
طبعاً خالد رااسو بقا يودي ويجيب (ياا ربي دي الجابا شنو! والمراة دي شكلها جاادة ولا شنو! وبعدين عرفت زااتو المكتب كيف وإني مسكت بدل عمي!!!!) وأسئلة كتيـرة داارت في راس خالد, طبعاً اخر ما يتوقعو خالد كان زيارة من شخصية زي دي خصوصاً بعد السمعو منها في التلفون والقراهو في الرسالة ,طبعاً متزكرين إنو خاالد ما قدر يتم الرسالة وما معروف باقي الرسالة دي كان فيها شنو?
قال لي السكرتيـر دخلها, السكرتيـر مشا ليها واذن ليها بالدخول
اسرار : مرحب
خالد : مرحب وعليـكم السلام, لو سمحتي مما تقفلي الباب خليو فاتح
اسرار (بنظرة استغراب) : ليه!
خالد : تكرماً بس
اسرار : بس كلامي الدايرا اقولوا ليك دا ما ينفع زول يسمعو
خالد : معليش بس ما صح نقعد برانا والنبي بقول ( ما خلا رجل بإمراة إلا كان الشيطان ثالثهما)
اسرار : عليه الصلاة والسلام لكن انا زوجة عمك !
خالد : اولاً حكايـة انو انتي زوجة عمي دي ما عليها تاكيد ثم لو بقيتي حتي زوجة عمي برضو رسولنا نهانا عن جلوس الخلـوة مع اي مراة إلا تكون من المحارم
اسرار : انا ما جايـة آخد درس في الدين خلاص ح اقعد
اسرار لمت نفسها وقعدت, والباب كان فاتح يعني الزول الجوا بشوف البرا والعكس,
ماا عجبتها الحركة طبعاً بس لانها محتاجه وشكلو موضوعها دا جاادي كدا غاايتو الله يكشف المستور يا خالد ويكون خيـــر
###################
سماح في لحظات الان حااسه بسعادة وفرررح كدا عجيبه, مااف وصف لإحساسها
احمد : والله يا سماح انا داير اعترف ليك بشيء
سماح : اهاااا !
احمد : انا يا سماح زمان لمن كنت بشوفك في الكلية بطني بتطم عديل كدا, كنت فاكرك مفتريـة ورافعة قزازك لكن ....
سماح : لكن شنو!
احمد : انا بعد قربت منك لقيت غير الكنت ماخدو عنك, يعني لقيت ديك كاانت مجرد اوهام لقيـتك إنسانة طيبة وقلبك نضيف وبتحبي الخيـر
سماح : انا!
احمد : ااي إنتي, دا ما كسير تلج ولا مديح ساااي دي حقيقه يعني وكاان غالبني الكلام دا, بس قتو ليك بس ااااهم شيء اني .....
سماح : انك شنوووو!
احمـد: إني حبيـتك يا سماح
##################
خالد : اها اتفضـلي قولي العندك!
اسرار: طيب يا خالد, انا اسمي اسرار محمد, كنت السكرتيره بتاعت عمك الله يرحمو, كنت ماسكه ليو شغلو وكان بثق فيني ثقة عميا, هو ما كان متزوج طبعاً لكن اي رااجل عندو غريزة وحب للزواج وكدا, فلمن شافني اُعجب بي شديد وبقا طووالي يتونس ويضحك معااي واخر رااحه مع بعض, المهم في يوم عرض علي الزواج وانا وافقت, وهي دي الورقـة بتاعت القسيمه
طبعاً خاالد كان مستغرب من كلامها التقول بس حافظه ليها قصيدة وجاية تسمعها ليـو, ما ادتو فرصة زاتو للرد, مسك القسيمه وبدا يقرا فيها
طلعت القيسمه حقيقه بإسم عمو إسحق الفكي و الزوجة اسرار محمد بشهادة شخصين, يعني بالورقة دي العقد صحيح ماا فيو ااي غلط علي حسب ما في الورقة المكتوب دا
المهم وااصلت ليو في الكلام وحكت ليو كل الحااصل بأدق التفاصيـل
و خالد بقا محتار كيف عمو يتزوج وما يكلم زول ولا حتى خالد زاتو!
الجلسة انتهت اسرار رجعت بيتها, خاالد بقا في المكتب مهموم, الله يصبرك بس
بقت عليو الشغل والجامعه و وهس الظهرت جديده دي,
خاالد قفل المكتب بعد شوية كدا, وطلع متجه على البيت, طبعاَ في الطريق كلوووو خاالد يفكر في موضوع اسرار دي
##################
خااارج لحظات الهم على طررف تااني كاانت سماااح طرات من الفرحة بكلام احمد وبعد اعترافو بإنو بحبها, كدا اترسمت فوق راااسها الصورة الكانت خاتاها, اتخيلت نفسها لابسه الفستان الابيض والناس من حولها مبسوووطة وتبارك ليـها ويجي الفارس بالبدلـة السوداء ويسوقها من وســط الناس دي, طبعاً للأسف دا فكر كل فتاة لمن وااحد يقول ليها "انا بحبك" , لكن هل ياا ربي "الحب" دا ح يستمر لزواج ولا مجرد تفريغ لعاطفة مدفونـة ولا قضاء وقت بس ولا ولا ولا, الايـام ح تكشف ليـنا علاقـة احمد وسماح
في نفس اللحظات, كانت امنيـة وصلت البيـت طبعاً ولقت البيت جايط كدا واثر إنو كان في ضيوف ظاااهر, يااهو لسا الكبابي في الصالة برا و العصير
امنيـة : امي كيفك!
الام عاينت لامنيـة كدا بإبتسامة, وما ردت ليـها,
امنيـة : يا امي كيف!
تاني عاينت ليها وما ردت امنية استغربت طبعاً "يا ربي الحاصل شنو ,بسم الله امي دي مالها بتبتسم كدا وما بترد, داا اخر شغل المطبخ غايـتو يا يمه "
خشت الغرفـة لابوها
امنية : يا ابوي كيفك!
الاب ابتسـم وردا : يا بتي كيف اخبارك انتي, انتي حالياً الاهم عندي
امنيـة بإستغراب : امممم الليلة الحاصل شنو في البيت دا?
الاب : تعالي اقعدي جنبي هنا يا امنية داير اقول ليك كلام
امنيـة : اها اتفضل يا ابوي,
الاب : قبل شويـة جا ود عمك هنا,
امنية : ود عمي منو!
###################
خالد وصل بيتم منهك ومتعب ولسا بفكر في كلام "اسرار"
دخلت عليـو امو وظااهر فوق وشيو الهم الشايلـو, غاايتو يا خالد الله يصبرك
الام : مالك يا ولدي مهموم كدا!
خالد: مااف شيء يا الغالية
الام : عاد داير تغالطني في جناي, انا الولدتك يا ود كيفن ما بعرف الفوقك شنو? حااسه بيك الليله مااك طبيعي
خالد : والله يا امي شويـة هموم كدا
الام : الله يعينك ويصبرك يا ولدي, انت عارف انا الليلة كنت فاتحه التلفزيون كانو جايبلهم شيخ كدا في برنامج ذكر ليو حديث جميل شديد
خالد : اها يا يمه شوقتيني ليو انا زاتي قال شنو
الام : قال, قال رسول الله عليه الصلاة والسـلام " إن الله إذا أحب عبداً إبتلاه " انت يا ولدي احتمال رربنا بيحبك وابتلاك خليك صابر يا ولدي صبرك دا بوديك الجنة إن شاءالله
خالد إبتسم لامو, امو كمان ما قصرت اخدتو في حضنها, حنان الام دا طبعاً لا يعوض, فرقت عليـو بعد كان شاايل الهم وقعدتها جنبـو براااها بالدنيا الله يحفظ كل الامهات ويرحم من ماتت منهن,
خالد اتونس مع امو شوية, قامت استاذنت منو تمش تقضي حاجت ابوهو, طبعاً ام خالد دي مراة مكافحة صبروة مراة ينضرب بيها المثل ,شخصية ما بتلقى منها اتنين غايتو, الله يحفظها ليك يا خالد
###################
امنيـة : ود عمي منو!
الاب : معتصم
امنية : بالله هو رجع !حمدالله على سلامتو
الاب : اي رجع يا بتي, وقرر طبعاً يستقر في االسودان هنا
امنية : غريبة! هو الناس الجوا دايرين يمرقو هو جاي يستقر هنا!
الاب : هو اسس نفسو عندو شركة هناك, يعني ح يستقر هنا لكن يااهو ح يكون متابع الشغل وكل فترة يااهو ح يمش عليهم يشوف الشغل وكدا واهو اشترا ليو بيت هنا في كافوري
امنية : والله ماشاءالله, الله يسهل ليو عاد
الاب : جاني زيارة بجاي اليوم ـ وحكا لي كم قصة كدا بس الخلاصة انو قرر يتزوج
امنية : الله يديو الفي بالو
الاب : آمين, وجا وطلب يديك مني ...........
يتبــع ,,,
