عيسى : بس يا "اسرار" في كلام داير اقولوا ليك
اسرار : اتفضل ....
عيسى : انا ما مطمن لشلغتنا دي, حااسي انو احنا كدا ما ماشين كويس
اسرار : كيف يعني !
عيسى : يعني حااسي كانو خالد دا ح يكشف لعبنا دا
اسرار : ههه خالد دا زول الله ساااي, انا قعدت معاو وعرفت تفكيروا ما من النوع المفتح زول مولانا سااي
عيسى : ما مرتاح انا
اسرار : لا لا ارتااح خااالص, وخلي بس الـ4 شهور تعدي و ننتهي من شغلة خالد دي ونتزوج
عيسى: ليه اربعة هس نمش!
اسرار : انت غبي!? نمش هس كيف يعني, انا بإعتباري زوجة اسحق وعلي عدة يااا بتاع العدة إنت
وااصل عيسى واسرار ونستم لحد ما وصلها البيت و اتحرك رجع علي بيتم, عيسى لسا ما مطمن للحكاية مع انو عارف انو خالد بثق فيو ثقة عميـا بس زي ما بقولوا اهلنا "الكذب حبلو قصير" وشكلو خالد لقا طرف الحبـل القصير دا
###################
خاالد في حالة يُرثى لها, نص الاملاك دا كتيــر ودا غير ورثتها الشرعية من الاموال يعني تقريباً ح تمشي ليها كل الاموال دي, يعني خالد بعد شوية ح يلقى نفسو شغال "تحت" اسرار, وبطريقتها دي خالد حااسي انها ح ترفدو, ودا المتوقـع اصلاً
الام : ماالك يا ولدي!
خالد : والله يا امي ما عارف ابدا ليك من وين ولا احكي ليك شنو ولا اخلي ليك شنو!
الام : اها قول يا ولدي ...
خالد : .........
وخالد بدا يسرد ليها في القصة بكل التفاصيـل, اسرار والاملاك والورق والإثبات إنها زوجة إسحق المرحوم ...
طبعا الام زااتها ما صدقت عيونها من الخلعة بقن كبااار ودمعاتها نزلن, على اللاقيو ولدها من هم وغم ومشاكل وكمان على المراة الفجاة ظهرت ليـهم من ماافي, عمهم دا من شدة ما طيب كان تقش الملاح فوق جبهتو زي ما بقولوا وماا قعد يدس حاجة على زول كلو كلو, قلبو ابيض وزول على نياتو, يعني صعب تصدق ليـك انو زول زي دا ممكن يدس حاجة كبيـرة زي دي علي اقرب ناس ليـو
الام بس حضنت ولدها وبقت تمسح علي راسو وتدعي ربـنا يفرج عنو ويكشف عنو الهموم الوقعت عليـو
##################
مرت الإسبــوعيــن بسررعة شديدة على امنيـة في ظل الضغط الكان عليها وفي النهاية لقت نفسها لابد ترضى بالواقـع وتتحمل بس
كل التجهيزات تمت للعرس الحفلة بعد ساعات بس
الحصــل لامنية خلال اسبوعين , انها ممكن تقول اتغيرت بقت امنية غير امنية القديمة, لمن لقت ماااف زول سندها عاينت للمصحف وبقت يوميا عندها ورد بتقرا,
بقت تحس براااحة عجيبة وهي بتقرا القرآن, لقت شفاها و كشف همها في القرآن, تفتح المصحف تتدبر الايات وتتلو وتقرا ليـل ونهار, سبحان الله قعدتها في البيـت كان ليها اثر عظيـم
عرفت حاجات عمرها ما كانت بتعرفها عزمت انها تاني ما ح تطلع من بيتها من غير حجاب,
امها كانت مستغربة شديد من الحصل علي بتها دا, واصلو ما سالتها قالت "البت دايرا تعمل مجنونة عشان نقول ليها خلي العرس" ومشّت الموضوع
امنيـة يوم حفلتها قاالت لازم تلبس حجاب شرعي وفستان وااسع
مع انو كان قرارها الاول الرفض التاام لاي حفلة او غناء, لكن مااف زول اشتغل بكلامها وفووق راسها قامت الحفلة وباغلي فنان وصالة
بس عزيمتها انها ما ح تقلع حجابها مهما حصل
المهم عزلت فستان مناسب ,بحجاب و ملامح الحزن ظااهرة فوق وشيها, اصلو ما تقول عروس,
##################
بس عكس الحاااصل تماما بجهة تانية لـ"سماح" مبسوطة وطااايره من الفرحة
حفلتها كلها كم سااعة, الملاحظ انو اصلو لامنية اتصلت علي سماح لا سماح اتصلت علي امنية ولا في وحدة سألت من التانيـة,
كل وحده كانت مشغولة بهمها,
سمااح اختارت احسن فستان لاجمل يوم في حياتها, وبدري كاانت جاهزة و على الفندق بتتصور مع الفارس احمد في شيء بتصورهو العرسان قبـل العرس في الفندق البقعدوا فيو, غايـتو صرف قروش سااي, اتصوروا وجهزوا واتحركوا علي الصالة
سماح : مبروك ليـنا يا روحي
احمد : الله يبارك فيك يا حبيبه
سماح : دا اسعد يوم لي في حياتي, انت ما عارف انا كنت بحلـم باليوم دا قدر شنو !
احمد : وانا كمان دا اسعد واحلى واجمل يوم لي ـ اخيرا ح تبقي لي#..
وااصل ونستم كاي عروسين جدد فرحانين باليـوم دا فررحة لا توصف وسعاادة ما بتتقاس
وفي مكان ما بعيد, امنية حالتها ما كانت نفس حالة سماح, امنية عادت نفسها إنها ح ترضى بالوضع والخير فيما اختارو ربنا ليها, وبقت تستغفر بس من الح يحصل في الحفلة, طبعاً امنية خلال فترة الإسبوعين البسيطة دي كاانت عرفت حاجات كتيييرة عن دينها وكانت بتخش النت وتتطلع و قرت كتاب في السيرة النبويـة اسمو "الرحيق المختوم" نزلتو من النت,
سبحان الله توفيق من ربنا عجييب لامنية, قررت بس في الفترة دي تعيش صح وتتغيـر وربنا وفقها واعانها
مرت الساعات والعريس وصـل عشان يسوق عروستو و واقف ليها تحت بالعربية عشان يمشو علي الصالة
##################
(......) : ياا بتي الله يرضى عنك الود جاي يطلب يدك امرقي سااي وريو وشك
(.....) : حاضر يا امي, مارقه بس ما ح اكشف ليو وشي
الام : ياا بتي طيب فايدة النظرة الشرعية شنو!
البت : ما عارفه, انا الزول دا استخرت فيو وما ارتحت ليـو والمفترض انا الارضى بيو ما انتو ولا ما كدا يا امي! يعني انا الح اعيش معاو ....
الام : ااها يا بتي عاد ارتحتي لمنـو! لحبيب قلبك خالد !!!?
البت : ....................................
يتبــع,,,
