محمد " ما سمعتها والله بس السمعتو انو واحد كورك فيها وقال ليها خشي جوا يا اسرار ...."
خالد مقاطعاً "اسرار! !!!!!?"
الضابط "يا استاذ خالد لسو سمحت ما تقاطع لو قاطعت مره تانية انا ح اطلعك برا واصل يا محمد ..."
محمد وااصل في القصة وانا طبعاً بقيت مااا قادر اجمّع عديـل وافكاري دي اتشتت كلو كلو, الوقفة غلبتني
" ياا ربي دي تكون اسرار زاتها, والبخليها تعمل كدا شنو! ومحمد دخلو شنو طيب بالموضوع, لا لا ياااخ ما اظن دي هي "
انا راااسي دا بس بقا شغال تفكير ...
محمد كمل القصه وحكا للضابط كل الكان متزكروا وانا باااقي الكلام اصلو ما سمعت منو شيء ... الضابط مشا هو والمعاو وقالوا ح يتحّروا في الموضوع دا ...
انا طبعاً من مكااني دااك ما قدرت اتحرك بس اقرب كرسي وقعدت, امي دي لمن جات خاشه وعاينت لي دمعتها نزلت ... حكيت ليها الحصــل وانو محمد جااب ليو سيرة عن اسم اسرار وانا شاااكي انها هي اسرار محمد
امي "ياا ولدي ما تظن ساااي , انت احسن بيها الظن وقول احتمال ما تكون هي تشابه اسماء سااي ..."
" والله ياا امي ماا عارف انا جاني احساس انو دي هي بس زي ما قلتي ما صح اسيء بيها الظن ..."
امي " اصبر بس يا ولدي والدايروا ربنا والكاتبو دا البجينا وكلو لخيـر"
##################
الايــام عدت ومحمد مرق من المستشفى الحمدلله مشينا البيـت والاهل طبعاً ما يدوك الدرب البيت دا مليــان التقول بيت عرس بس
اناا زاتي قربت ما اعرف انو دا بيتنا, غااايتو كاان يــوم
انا الكنت نااسيو انو بكرا يوم المحكمه, طبعاً دي فاتت علي كلو كلو
اهاا كنت قااعد بالليـل كدا بعد شوية كدا الناس خفت
الوقت بعد العشاء كدا ... جاني اتصال من عيسى
عيسى" ياا خالد كيفك ..!"
" تمام والله كيف انت يا عمي ! "
عيسى" الحمدلله بخير والله داير اذكرك بكرا طبعاً المحكمة "
" صح ااي والله اتذكرتا قبل شوية, زااتي كنت دايخ ولااافي مع المستشفى .."
عيسى " مستشفى شنو يا خالد انت عيان يا ولدي !"
طبعاً انا نسيت إني ما وريـتو بالحاصل المهم حكيت ليـهو عن محمد والرااجل دا حلف إلا يجي هسي يشوفو لكن انا رفضت ليـهو المهم حكيت ليهو وقال بكرا بعد المحكمة بجي يشوف محمد واتفقنا نتلاقى في السوق العربي الساعه 9ص ... طبعاً المحكمه الساعه 11ص ...
اها قفلت منو الخط والله انا رقدت في السرير دا النوم غلبني كلو كلو ... بفكر الليـل كلو , قمت صليت الشغع والوتر كدا كاان الوقت تقريباً الساعه 2 صباحاً ... صليـت وحااولت انوم...
##################
مرت الايــام على امنية ومعتصــم
طبعاً معتصـم ح يسافر ويخلي امنيه هنا شهر كدا وح يرسل ليها ,لمن يجهز ليها ورقها وحاجاتها هناك
الحصــل خلال الفترة دي كاان في تقدم في علاقة معتصـم وامنية,
امنية اتجاوزت عن الحصـل وحااولت تتعامل مع الوضع اللهي فيهو وخصوصاً من الاخلاق اللقتها من معتصـم
ومعتصـم قال ليها " انا داير لي زوجة تتدخلني الجنة يا امنية ... كان ممكن اتزوج اي وحده من هناك تكون ملكة جمال, لكن انا داير التربي لي اولادي تربية صح التعاملني انا معاملة طيبة تكون عاارفه ربها ودينها, وانتي كنتي غاايتي يا امنية "
امنية بقت مرتاحه نوعاً ما كدا لمعتصـم وحست انو زول طيب وزول خيـر واخلااقو طيبة ,تعاااملو راقي جداً
الزول دا مما عرفتو امنية ما شافتو فوت ليـو صلاة في جامع وطواالي يقرا القرآن ... امنية بدت ترتاح ليهو وقلبها رقَ ليـهو
سمااح بهناك ما لقت فارس الاحلام الدايراهو, بعد الزواج احمد اتغير قصادها شديد وبقا ما زي زمان مع انو الفترة قصيرة شديد
لكن علاقة احمد مع سماح حتى الونسة بقت ما زي زمان واحمد اخلاقو في نخرتو وصلااتو زاتها مقطعه
سماح " احمد انت الحصل شنو! "
احمد " ماالك يا سماح في شنو? "
سماح " ماا عارفه الايام دي حاسه بيك كدا ما مرتاح "
احمد " اختيني عليك الله يا سماح عندي زول جايني هنا امشي جهزي ليـنا شاي ولا عصير ..."
سماح مشت وزااتو مستغربة من حركات احمد دا, ليهو كم يوم متغير كدا وما بتونس كلو كلو بس نوم واكل بس
اهاا صاااحب احمد جا وسماح جابت ليهم الشاي ... سلمت علي صاحب احمد وخشت جوا
سماح غرفتها كان فيها زي شباك صغير فاتح في الصاله البرا القاعدين فيها محمد وصحبو
سمااح شالت التلفون وبس جااتها ليك امنية واتذكرتها فجأة كدا, سمااح دي لمن اتذكرت امنية دمعت, حست بإنها قصّرت فيها شديد ولا عزمتها لعرسها ولا اتصلت ليها ,طبعاً الما عارفاهو سماح انو امنية زااتها عرسوها ...
اها سماح شالت التلفون وفتشت رقم امنية واتصلـت ... امنية في اللحظة ديـك كاانت مع معتصـم مشو زيارة لناس اهلهم كدا ونست التلفون في البيـت
اها سماح اتصلت اول مره وتاني مره ولافي رد, قالت "خلاص امنية دي زعلت مني الفترة الطويلة دي كلها ما اتصلت ليـها اكيد تكون زعلت الما بخليها تزعل شنو ... تاني النتصل ليها " اتصلت قريب الخمسه مرات ولا في رد ... اها اثناء ما هي في تفكيرها دا سمعت احمد بتكلم مع صحبو ...
احمد " اها يا ياسر البضاعه دي مضمونه .."
ياسر " عيب يا احمد انا كمان بجيب لي شغل مضروب!"
احمد " والله انا من العرس ما اخدت لي حاجه قوية يااخ دي حتى سماح لاحظت لي متغيـر انت عارف انا بدون الحبوب دي بكون زول تااني راسي زااتو ما بكون معاي ..."
ياســر " الحبوب دي مفعولها قوي شديد حبتيـن في اليوم بس وحده صباح و وحده مساء وصدقني ح تبقى زي السكر يا سكر ..."
احمد " خير يا زول ... انت اتوكل وانا ببلع الحبوب دي وبوريك النتيجه بكرا "
ياسر " خير يا اصلي سلام ..."
سماح سمعت الكلام دا بس وختت يديها فوق راسها و .......
###################
خالد وعيسى وصلوا المحكمه الساعه 10 كدا مشو يشربوا ليهم شاي لحد ما زمن القضية بتاعتهم تجي
اها الساعه دي عدت وبقو راجين دورهم بس القضيـة وخالد دا بس شغال يدعي في ربنا ويستغفـر "يا الله اكتب الفيهو الخير ...يا الله اكتب الفيهو الخير " بس شغال يكرر فيها ...
اسرار وصـلت ومعاها المحامي بتاعها, خالد لمن شااف اسرار اتذكر كلام محمد طواالي ,لكن تاني استغفر وقال "مااف داعي اظن بيها ظن ما كويس ما عندي دليل علي كلامي دا "
قعدوا بدأت جلسة الحكـــم
القاضي " وبعد الإطلاع على الاوراق المقدمة من كلا الطرفين خالد إبراهيم الفكي واسرار محمد مختار في قضية الاملاك والشركات الخاصة بالمرحوم إسحق الفكي هارون المتوفى ... وبعد البحث والتحري حكمت المحكمة ............."
يتبـــع,,,
