الام : اها يا بتي عاد ارتحتي لمنو! لحبيب قلبك خالد !!?
البت : يااا امي انـ.....
الام : ياا بتي اعرفي إنو الشغلة دي قسمه ونصيب, يعني نصيبك دا بجيك بجيك ماااف زول بقلعو بس انتي اعملي العليـك يا "هدى" الله يهديك يا بتي
هدى : ااااه حااضر يا امي
هدى علي الأمين, جامعة (#)سنة تانية صيدله
بت خالة خالد طوالي, كانوا من زماان ساكنين معاهم في نفس البيـت , بس رحلو ام درمان الثورات السنة الفاتت
شغلة امهات وكدا من زماان كانو بقولوا يعرسوا خالد لهدى, هزار امهات بس هدى كانت معجبة بخالد من صغيـرة, بس عمرها ما فتحت خشمها معاو في كلام زي دا, بس سلام واخبار عادية
هدى زولة بالجد هدي, زولة ملتزمة وعارفها حدودها, طيبة وقلبها ابيض اتنقبت في اولى جامعه من زمان كان عندها فكرة النقاب من هي صغيــرة
زولة الله زي ما بقولوا اهلنا
إتقـدم ليها عريس واحد من اهلم بعييد كدا باللفه, وهي ماا راضيه ما عجبها الوضـع وما لقت فيو المواصفات الطالباها
زي ماا اي بت عندها مواصفات هدي كمان خااته مواصفات معايير معينة لزوجها المستقبلي
هدى " دايراوا يكون زول بخااف ربنا ويراعي ربنا فيني, يعيشني علي طااعة ربنا زواجنا يكون مشروع لدخولنا الجنة دايراوا يااخد بيدي للجنة, شخص ملتزم بحدود الشرع عاارف ديـنو حاافظ لكتاب ربنا, صاحب خلق ...."
ختت مواصفاتها بنفسها لزوجها المستقبلي دايرا زول صاحب دين وخلق عشان ترضى بيـو
##################
انتهى العرس والمعازيـم ودعو العروس والعريس بكل فرحة وسعادة
سمااح كانت الفرحة ما واسعاها, سعاادة ما بتتوصـف
امنبة حاولت تتصنع السعاده والفرح بس الفي القلب ما بنستر بسهولة والملامح بتبيـن
امنية ومعتصــم وصلوا على الفندق و كدا ح تبدا حياتم الزوجيــة
معتصـم : مالك يا امنية, شكلك كدا ما مبسوطه!
امنيه : اااء اا انا ! لا بالعكس انا فرحانه شديد ومبسوطه اني معاك
معتصم : ما تحاولي تخبي, ممكن يكون اهلك غصبوك علي بس انا بالجد بحبك ومعجب بيك وعملت العملتو دا كلو عشان اجي واتزوجك وتكون عيني مليانة وانا بطلبك من ابوك
امنية : بس اا.....
معتصـم : مااف داعي تبرهني لي شيء بس بإذن الله ما ح تشوفي مني إلا كل خيــر يا امنيـة, ح اكون معاك زي ما إنتي دايرا ولو طلبتي فرقة وما راضية بي انا مستعد هس ارجعك بيتكم
امنية : ماا قصدي كدا بس انا د ....
معصتم ختا يدو في (فم) امنية مقاطع ليها :" انا قت ليك ما محتاج منك اي تبرير" عاارفه انا مبسوط قدر شنو انك بقيتي زوجتي وعلي فكرة لمن اتغيرتي انا حبيتك اكتر وكدا اطمنت على نفسي واولادي لقدام انو امهم ح تكون عارفة الله وحدودو وح يتربو احسن تربيه
واصل معتصـم في شرح شعروا لامنية وتوضيح انو قدر شنو كان بحبها, امنية حست بتغير تجاه معتصـم وكأن ربنا قسم ليها الزول الصح, قلبها قال ليها كدا, بس لسا عقلها في صرااع انو هي مغصوبة عليـو ورضت بيو غصب عنها وما كاانت طااايقه خلقتو
بعد ونسة من معتصـم وحس برااحة ليو تجاه امنية
امنية : دقيقه دقيقه! في حااجه لازم نعملها قبـل كل شيء طيب
معتصـم :شنو!
امنية : دايرين نبدا حياتنا مع بعض بطاعة لربـنا مفروض نصلي ركعتين شكر لربنا وانت فيهم امامي
معتصم ابتسم ابتسامه جميلة وجاو ااحساس رضا عجيب بالسمعـو : "طيب مش نتوضأ ولا كيف يا شيخه!
امنية بإبتسامه خفيفه : طيب
معتصـم خشا يتوضا بس بااالو لسا مع امنية وكيف ح يخليها تغير فكرتها عنو وكيف ح يقدر يعالج الحاجه الحصلت من ناس بيتها دي
اتوضــأ , وجا لقاها فرشت المصلاية للصلاة وجهزت المكان
صلو ركعتيـن كسنة لبداية حياة زوجية سعيدة, بادية بطاعة لربـنا و دعت في سجودها انو ربنا يهديها للصح والطريق الكويس ويسهل ليها حياة زوجية سعيدة و يرضيها بوضعها
انتهت الصـلاة
معتصـم : انا كمان ما ابخل عليك بسنة
امنية : اها
معتصم : سمعت قبل كم يوم في الجامع كان بتكلم عن سنن الزواج وشرح حاجات كتيـرة كمان انا حفظت منو دعا قال الزول مفترض يقولوا
معتصــم ختا يـدو في راس امنيـة ودعا
"اللهم إني أسالك خيرها وخير ما جلبتها عليه واعوذ بك من شرها وشر ما جلبتها عليه "
# بداية لحياة زوجية علي السنة إمتثالاً لقوله عليه الصلاة والسـلام " إذا تزوج احدكم امرأة او اشترى خادما فليأخـذ بناصيتها وليسم الله وليدع بالبركه وليقل : اللهم اني اسالك من خيـرها .... الدعاء"
بداية بأنس ومودة وحب,
###################
من جهة تانيـة بعد مراسم الزواج و وداع العروسيـن سماح واحمد, اتجهو على الفندق ,وبدوا رحلة القفص الذهبي السعيـدة
كأي عروسـين عادييـن , بس ما زي امنية ومعتصــم
مرور إسبوعيـن على خالد ما كان سااهل,
مروا بما فيهم من مشاكل وهموم وإبتلاءت والوااقف الوحيد مع خالد امو, بحنانها وحبها وتصبريها ليـو خالد صبر بعد تيسير ربنا
خاالد لسا في دوامه اسرار والاملاك واسرار.رفعت قضية في المحكمة طاالبت فيها بحقها الشرعي من الاملاك والورثة الشرعية ليها
القضية طبعاً الكان سائر عليـها "عيسى" خالد بثقتو في عيسى مسكو القضية وقال ليو ادي اسرار حقها عشان نرتاح منها واقدر اواصـل في الشركة و احاول احافظ علي الفضـل من الشركة
خالد قبـل المحكمة خطرت في باالو فكرة كويسة يقدر يحاافظ بيها علي جزء من الشركات بتاع عمو المرحوم
كان في شركة بتاعت استثمارات في الجزيـرة تابعة لعمو بس كانت مسجلة بإسم ابو خالد
خالد مشا لابوهو وطلب منو تنازل عن ملكية الشركة وانها تتكتب باسمو, الاب اصلا ما كان مستفيد منها كتيـر وهو و ولدوا واحد ,
طواالي مشو المحكمه عملو تنازل لخالد عن الملكية, لااحظتو انها قبل رفع القضية من اسرار,
يعني الملكية صاافيه شرعاً لخالد,
هي شركة صغيرة كدا, ما فيها شغل كتيـر بس خالد افتكر اانو دي حل بسيط للمشكلة ,
ورُفعت القضية ضد خالد إبراهيـم الفكي مديـر شركات إسحق الفكي للإستثمارات مطالب فيها خالد بدفع الاملاك لاسرار محمد ودفع ما لها من حقوق شرعية من ورثة المرحوم.......
يتبــع,,,
