الام " اها قول يا ولدي قطعت قلبي "
خالد " والله يا امي انا صرااحه ما ح اعمل حفلة في عرسي ولا غناء ولا حنة ولا اي شيء من الحاجات دي "
الام "نعم? ??? ليه يا ولدي مالك, الناس احسن منك في شنو يا ولدي وريني! ولو على القروش ابوك في وانا ببيع دهبي دا عشانك يا خالد "
خالد " ما كدا يا امي, لكن دايرا ابدا حياتي صح"
الام " صح كيف يعني? "
خالد " ما داير ابداها بمعصية لربنا ..داير حياتي مع هدى تكون مبينة على طاعة ربنا "
الام " يا ولدي لكن الحفلة دي ما..."
خالد " ما صح في الشريعة يا امي, انا سمعت امس في المسجد الشيخ بيتكلم عن الغناء والبحصل في الاعراس ..وقال الغناء دا حرام بإجماع العلماء وجاب حديث "
الام " لكن يا ولدي الناس تقول علينا شنو? "
خالد " ولا شيء يا امي ..وعلى فكرة هدى كانت اول وااحده ح تضع الشروط دي ... وانا موافق عليها هي حياتنا ودايرين نبداها صح "
الام " مخير الله ...بس انا كدا ما ...."
خالد " النبي صلى الله عليه وسلم قال يا امي ((ليكونن من اُمتي اقوامٌ يستحلون الحِر والحرير والخمر والمعازف)) حتى الشيخ جاب كلام لصحابي اسمو ابن عباس في شرح اية من الايات في القران وقال الصحابي برضو قال كدا "
خالد وااصل في نقاشو مع والدتو وطبعاً الأم مذهولة بكلام ولدها ما حصل عارضت ليهو او رفضت ليهو طلب, بس المرة دي شاافتها كبيـــرة وخصوصاً انو عرس ولازم يكون فيهو حفلة ..وقدر ما حاولت تقنعو ما قدرت .... هي من جواها كانت حاسه انو كلام خالد صح, بس ماا قادرة تقتنع ... وخالد براااحه وراها الحاصل وانو دي في النهاية رغبتو هو وهدى وأكد ليها إنو (هدى) مستحيـل ترضى بحفلة في عرسها ...وهدى بهناك كانت بتتكلم مع امها في نفس الموضوع وامها جاااطت وقلبت الارض فوق تحت وبقت تكورك فيها ...لكن هدى رفضت تماماً
في الصبـــاح
ام خالد اتصل على اختها ...
ام خالد " يااا حواء ماا شفتي الود والجابو لي جديد "
ام هدى " انتي الما شفتي البت الهبلة وكلامها معااي اخر زمن دايره نسوان الحلة يتكلمن فوقي ويقولوا عرس بتها كان زي العزاء لا حفلة لا رقيص "
ام خالد " عااااد لكن دا ما نفس كلام خالد برضو قال ما داير حفلة وقال ما بتحنن برضو قال لي الحنة للرجال حرام قال لي دي حقت نسوان "
ام هدى " بالله شوف الاولاد ديل, عيال اخر زمن "
هدى كانت بتسمع الكلام ..قاعده ورا الباب وتسمع وتضحك في كلام امها وخالتها ...
مرا اليــوم وامها صاارة ليها اليوم كلو وخشمها ما فتحتو معاها ...بعد المغرب جا خالد ومعاهو أبوهو ...قعدوا لحد العشاء وإتفقوا على العقد يكون يوم الجمعة بعد الصلاة ...
وهدى دايرا تطيــر من الفرح ..حست اخيراً ربنا ح يحقق ليها امنيتها وتجتمع مع (خالد) بالحلال ...ح تقدر تااني تعبر ليهو عن كل مشااعرها بدون خوف من زول ... ح يبقى حلالها ...
###################
الجني وصل لأسرار الساعه كانت 2صباحاً خشا البيت وقفل البيت كلو بالطِبل ..وقبلو دا في يدو من الخوف
اسرار " في شنو يا فارس? "
الجني " الشرطة يا اسرار في كل مكان وقبضو احمد اكبر مورد عندي وشكلو اداهم معلومات عني ..وحاسي اني مراقب "
اسرار " لا حول ولا قوة إلا بالله والجابك هنا شنو? داير تورطني معاك في شغلك العفن دا, اطلع برا يا معفن اطلع برا يا حيواان اطلع برا "
واسرار بقت تكورك فيهو وتبكي باعلي صوتها
الجني " اسكتي يا بت اسكتي ما تفضحينا الدنيا ليــل اسكتي ياااخ "
اسرار"اطلع من بيتي يا مجرم " اسرار تكورك والجني حااول يسكتها لزتو بالغلط وقع في الارض ضرب راسو ...و نزف
اسرار لمن شاافتو خافت خوف شديد.. هو قام والغضب دا يطاير شرار شرار منو ... ضربها بدون ما يحس بكل قوتو...وقعت ولاقاها طرف الحيطه ...والدم دا جا نازل من راسها زي النافوره ... شافها وقرب منها لقاها ماتت ...
قاام جاري جري فتح الباب وركب عربيتو وجرى .....
بس اثناء الجوطة ديك في واحد من الجيران جا قريب من البيت وسمعهم بتشاكلو ..وشاف كل الحصل بالشباك وشااف الجني لمن قتل اسرار ..واول ما الجني طلع عاين لنمر العربية وشااف شكلها وإتصل على الشرطة ...وراهم شكل العربية و النِمر و وراهم الحصل بالتفصيــل ...ساعة زمن والشرطة وصلت ..طبعاً عمر كان مشى على ناس معتصم في المستشفى ...اتصلو عليهو و وروهو بالحاصــل ... الوحدات كلها تم تبليغها بشكل العربية ورقمها ... لو اتقبض ح تكون ضربة كبيــرة في عالم المخدرات ..الجني كان يُعتبـر من اكبر تُجار المخدرات في الخرطوم,
###################
معتصم وكل العائلة كاانو في حالة صعبــة ... الصبــاح بدري الدكتور جا على معتصـم
الدكتور " استاذ معتصم "
معتصم " مرحب بشر يا دكتور ..."
الدكتور " والله يا معتصم ما عارف اقول ليـك شنو ...الحمدلله الحمدلله زوجتك حالتها إستقرت الحمدلله واتحسنت جداً وحتى ضربات قلبها إنتظمت الحمدلله "
معتصم " جد!??? "
الدكتور " اي احمد ربنا يا متعصم دي نعمة والله "
معتصم دا ماااا صدق من الفرحة وسجد لربنا شكر ,وام امنية دي قربت تزغرد, ربنا فتحها عليهم الحمدلله ...والنااس دي ما مصدقة زاااتو ...وسماااح دي نزلت منها الدموع ..دموع سعادة وفرحة بالسمعتو ... حالتهم اتغيرت بين ليلة وضحاها ...
الدكتور قال ليهم لو الحالة استقرت اسبوع كمان ويمرقوها البيـت, حالتها كويسة حتى الجرح ما خطيـر, وبقت بس شغالة علاجات عاديــة ...اليوم مرا اسعد يوم في حياة معتصم وكل الأسـرة ..وامنية دي لمن صحت حست بنفسها كأنو اول مرة تشوف الدنيا دي ... حست بطعم الموت شااافت الموت دا قرب عليـها لكن عمرها لسا ما تم ... والفرحة ما واسعاها وداير تنطط بس فوق السريـر دخلوا عليـها امها وابوها وسماح واتونســو معاها ..وهي بعيونها بتفتش في زول.. وتتلفت وتعايـن يميـن وشمال ... قلبها دق وخافت تكون خسرتو
سماح "في شنو يا امنية مالك! "
امنية بخوف " وين معتصم !"
في اللحظة دي كان معتصم جا دااخل عليهم بإبتسامة عريضــة وجاي علي امنية ...امنية دي وقت شاافتو الدموع دي نزلن منها وقالت "الحمدلله"...
معتصم "حمدلله علي سلامتك يا قلبي "
امنية " الله يسلمك تخيل للحظة بس افتكرت اني خسرتك يا معتصم "
معتصم " انا جنبك يا امنية وما ح اخليـك لمن يفرقنا الموت ان شاءالله انتي في عيوني "
امنية " انا يا معتصم دايرا اعتذر ليك عن كل تصرف بدر مني غلط او ..."
معتصم قاطعها " ما تعتذري يا حياتي ..انتي عندي اهم من كل شيء وصحتك الان هي المهمة بالنسبة لي ,الله يحفظك لي "
امنية حست براااحة عجيبة وهي جمب معتصم ...عندها ظهر يحميها ويد تتمسك بيها و شخص يسندها ويحافظ عليـها ... رجل زي معتصـم وحست بإنها كانت ظالماهو ..وشافت نظرات و العميييق في عيونو ليها ... ودعت ربنا انو يحفظهم لبعض ويبعد عنهم كل حاسد وحاقد ....
سماح عرفت كل الحصـل على أحمد وإتمنت إنها ما حصــل شافتو ولا سمعت بيهو ... وندمت على كل لحظة ضيعتها معاهو في حرام. و وعد حب فاشــل ... ندمت على اللحظات الضيعتها واحمد خدعها فيها بإسم الحب. والزواج ... شافت نظرات الحب بيـن معتصم وامنية وكمية العطف البينهم والود والرحمة ...عرفت معنى الحب الحقيقي ياا داب وقلبها فتح, وعرفت إنها ضيعت من عمرها سنيـن كان ممكن تكون في وضع ومكان افضــل, بس كل شيء قسمة ونصيب
أحمد اتقبض ببضاعة ما بيأخد فيها أقـل من عشـرة سنيـن, ودا الكلام القالو ليـها عمر ... قررت إنها تمشي تطلب الطلاق من المحكمة ويدوها حقوقها وتنسى تاريـخ بإسم أحمد, فارس الأحلام الزمان ...
####################
بطرف تااني تمت كل الترتبيات للزواج ..والعقد ما باقي عليهو إلا دقايق ...
خالد في المسجد ..صلاة الجمعة إنتهت ..خطبة كانت جميلة خصوصاً مع خالد كانت تتكلم عن حياة النبي عليه الصلاة والسـلام مع زواجاته ..وكيف كاان التعامل والشيخ ضرب امثال وقصص لامهات المؤمنيـن مع الرسول عليه الصلاة والســلام,
بعد الصــلاة ...
المأذون مسك المايـك وقبلها ذكّر بفضل الزواج في الإسلام ,وحث الشباب على الزواج والأباء على تزويج اولادهم ...
المأذون "وين وولي الزوج و ولي االزوجة "
ابو خالد وابو هدى اتقدمو الصفوف وقعدوا قدااام ..المأذون عمل إجراءات العقـد
المأذون " قول وراي يا عمنا إبراهيـم ,بسم الله والصلاة والسلام علي رسول الله "
عم ابراهيم " بسم الله والصلاة والسلام على رسول الله "
المأذون " اما بعد فقد ......."
تمت الإجراءات ...
(زوجتك - قبلت)❤
خالد لمن سمع الجملة دي دايـر يطيـر من السعادة والفرح وحمد ربنا الوفقو لأجمل لحظة في حياتو واداهو البت الكان بتمناها
(والتبيركات اشتغلت ..مبروك يا عريس عقبال اولادك, بيت مال وعيال, مبارك عليـك, بارك الله لكما يا عريس )
وهدى في نفس اللحظات تتلقى التبيركات والفرحات ...وهدى ما اقل فرحة من خالد بزواجها ...
###################
مرت سنيـــن سعادة وحب بيـن أسعد اتنيـن وزوجيـن (خالد وهدى)❤ سنيـن حب و ود ورحمة ,اجمل ايام حياتهم ورزقهم ربنـــا بطفلة وسموها (مريم)
وكاانت بداية لسعادة جديـد ونور جديد دخل على البيت
خالد " عارفة يا هدى انتي اغلى حاجة عندي في كل الدنيــا دي "
هدى " عيب, ومريـم وين? "
خالد " مريم دي اغلى منك ههه "
هدى " ايووووا, خلاص شوف ليك مربية ليها وزولة تمسكها ليك كويس? "
خالد " خلاص خلاص ما تزعلي يا ستي انتي ومريـم اغلى حاجة عندي "
وبيت امنية ومعتصم ما بقل سعادة عنهم ...وربنا رزقهم بمعتز و حنيـن...وزاد الحب حب والمودة مودة ...سماح تزوجت من عمر بعد ما اتطلقت من احمد وعاشت حياتها ..وحكمو عليهو سجن 15 سنة ...و جاهم خبر بإنو فارس الجني إتقبض عليهو واتحكم عليهو بالسجن المؤبد وقدروا يقبضوا على كل الشبكة والعصابة ...
#حياتنا فيها سماح وهدى, فيها أحمد وخالد, معتصم أمنية ..فيها فارس الجني وأسـرار ,فيها عمر ...
قصتنا خياليـة من وحي التصور الخيالي, بس واقعها موجود بينا .. بنعيش لحظات حب وكره ..لحظات عطف وحنان ...لحظات صداقة وعداوة ... في النهايـة ما بنجح إلا الحب الحلال (الصامت) بدون تعابيـر بتوكيـل كل شيء لربنا ... وكل علاقة حب حرام أو (متكلم بدل صامت) بتنتهي زي اسرار وعيسى او الجني ..فرصة في الحياة وااحدة عشان كدا لااازم #نعيشها_صح
حبنا في الحلال بعيد عن أي صورة في حرام هو #الصح ..
لي وليك وليكي 😊
تمت بحمدالله
