اغتيال مشاعر

البارت التاسع

وصلنا زهور خايفه من الحجي وعادل ورهف اتفقو خلال اسبوع يتم زواجهم خلي نروح نشوف زهور ونرجع لعادل ورهف
زهور خايفه من الحجي اذا تهرب وين تروح اكو الف حجي وذئب بشري راح يبيعون بيها ويشترون والمطلقه ميرحمها المجتمع وهي طلقت اول مره ومرت بهل التجربه تقرر ماكو غير الله تصلي وتدعي الله لحد ماتتعب وتنام على السجاده نفس الحلم تشوف يجي الطير ياخذها ويصعد بيها للجو تعيط من الخوف ويرميها من تنزل تفز حلكها ناشف تستغفرالله تكوم تشرب مي يطب الحجي
الحجي..اشو ممغيره ملابسك تره تزوجتك من ملهى هاي ملابس التوبه والصلاة مو عليا
زهور..اسفه كنت نايمه هسه دقايق ابدلك خايفه وترجف تستلم للامر الواقع بس بداخلها تتكطع ليش هيج حالها مو مثل باقي النسوان محرومه حتى من الطفل والنومه تحسها اغتصاب
...
عادل ورهف يرتبون كلشي ويعقدون رهف كلش فرحانه بس عادل خايف من رهف خايف يتكرر السيناريو فقد ثقته بالنساء يجي يوم الزفه يصعد رهف بالصدر وياه وهو يسوق وربعه بالشركه عمال ومهندسين كلهم بالزفه وكتها زهور طلعت تتسوك لابسه جينز وقميص طويل وحجاب بدون مكياج طلعت تتمشى وكفت بالترفك تعبر الشارع وكفت الزفه كدامها شافت عادل يسوق ورهف عروسته نزلت دموعها بدون متحس  مرت الزفه حست خنجر بنص كلبها معقوله عادل اخذ رهف الي تخلت عنه وكالت ماتزوج اعمى عبرت الشارع متحملت رجليها وكعت التمت الناس بنتي اسم الله شبيج متحجي بس تبجي كامت  دايخه الناس تحجي وياها هي بس تبجي رجعت للبيت شمرت المسواك وبالفراش بقت تبجي لحد ماسمعت صوت الحجي وينك زهور دخلت للحمام غسلت وطلعتله
...
عادل..بالخير عليج رهف هذا بيتك صار
رهف..بالخير علينا الاثنين ممكن هسه تطلع علمود اغير ملابسي
عادل..صار بس استعجلي ممكن لان تعبان من الزفه والهوسه
رهف..صار حبيبي وابو بيتي وابن عمي
عادل..تبده مشاعره تتحرك من يسمع رهف يطلع من الغرفه
رهف..عادل كملت تعال
عادل..بسم الله ويدخل للغرفه يشوفها مبدله ثوم نوم مثير اسود وهي بيضه مربوعه يجنن عليها
يغير ملابسه وعينه على رهف رهف تخجل تتغطى بالجرجف
ينام وياها ويكمل رهف تحضنه وتنام على ايده يبقون يسولفون لحد مينامون يحلم عادل بزهور واكفه يمه وطير اسود جبير ياخذها عالي يصيح ويركض يحس رجليه شلل وصوته ميطلع يبقى يصيح زهور لحد ميفز وهو يصيح ينتبه رهف نايمه يمه يستغفرالله ويرجع يحاول ينام
...
نرجع لزهور
الحجي ..شنو متزوج اني جندي شنو هل الملابس
زهور..تنتبه لملابسها كنت اتسوك حجي
الحجي..ها اي يلا حضري الزلاطات جبت المشروب ويايه اريدك تشربين وتركصيلي يلا بدلي
زهور..صار حجي تمشي وتفكر يارب شلون ماعندي غيرك الجأ اله
تبدل وتحضر الاكل والزلاطات للحجي وهي تدعي تدخل تقدم الاكل للحجي تلكاه متمدد ورغوه من حلكه واخر نفس حجي تصيح الحارس الشايب يشيله وياها للمستشفى والحارس يتصل بمكتب الحجي يفحصوه الاطباء عنده جلطه تلتم عائلة الحجي كلها زهور تبقى واكفه وساكته العائله مستغربين منو هاي يدخل لؤي زهور تتفاجأ
لؤي للطبيب
لؤي..دكتور طمني على عمي
الطبيب..لاتقلقون حالته مستقره جلطه خفيفه
لؤي..الحمدلله يلتفت يشوف زهور يستغرب يجي يمها انتي شجابج الحارس الشايب
هاي زوجة الحجي العائله كلها تفتح عيونها زوجة الحجي تهجم على زهور هي وابنها وبنتها ويجروها بره يصعدوها بالسياره ياخذها ابن الحجي ويسجنها بالبيت علما امه تجي من المستشفى
زوجة الحجي تتخبل ترجع للبيت بعد ماتطمئن على الحجي
زوجة الحجي ..وينها هاي العاهره
ابنها ..حبستها بالغرفه
زوجة الحجي تفتح الباب هي وابنها تهجم كتل وكفش ورفس لزهور يموتوها كتل وراها تحجي وياها
زوجة الحجي ..انتي منو وشلون تزوجج
زهور..عفيه خاله والله هو اخذني كوه ماريده طلكيني
زوجة الحجي..كوه ها اليوم اكطعج تكطع واشمرج بالزباله تتمسكنين وتكتل بيها
زهور..كافي ظلم ابوس ايدج طلكيني
ها هسه كمتي تتمسكنين وتدورين طلاك اني اعلمج بنت الشوارع ساقطه قشمرتي الحجي مو الا اسلخ جلدج هذا الحجي يباوع عليج اكيد سويتيله سحر وتضرب زهور وتحبسها بلا اكل ولا مي بالغرفه
..
نرجع لرهف وعادل
عادل..ليش احلم بزهور خصوصا هل اليومين من تزوجت حتى من انام الضهر احلم بيها تستنجد بيا وتصيحني كافي لازم اشوف حياتي رهف متندمه وتحبني لازم اصونها واعيش حياتي
رهف..تجي من وراه لعادل وهو كاعد على كرسي بالحديقه تلف اديها على رقبته وتحضنه شبيه الحلو صافن وبشنو يفكر
عادل..افكر بزوجتي الحلوه رهف
رهف..عادل تعال نسافر شهر عسل اتمنى نروح لاربيل
عادل..خوش فكره يلا رتبي الجنط علما ارتب شغلي ويا الشركه ونسافر اريد ابتعد عن بغداد احس مختنك
رهف..سلامتك حبيبي يعني موافق فديته للي يحبني
...
نرجع لزهور حابستها زوجة الحجي لليوم الثاني هي بدون اكل والحجي بالمستشفى كلما تفتح الباب زوجة الحجي هي وابنها يكتلوها
زهور..يارب ماعندي غيرك خلصني تنفتح الباب يمد راسه لؤي
لؤي ..هاي شنو شمسويه زوجة عمي بيج ويضحك هاي تاليتج تدورين شياب متزوجين شبينا احنا الشباب يلا راح اخلصج منهم تعالي ويايه
زهور..تخاف من لؤي تطلع من هذوله توكع بيد لؤي النوب لا انتضر الحجي يجي
لؤي..ولج الحجي دزني اخذج لبيته الثاني
زهور..والله الحجي كلك
لؤي ..اي شبيج ممصدكه هسه راجعلج اشوف الطريق
يروح يتمشى يم زوجة الحجي
لؤي ..عمه مثل ماتفقنا قبل ميرجع الحجي ويعرف اني اخلصج منها
زوجة الحجي..اي بيعها مثل ماكلت للكيوليه هي ساقطه بس الحجي يموت تجي تكول الي النص
لؤي ..ولايهمج انسي جانت اكو وحده اسمها زهور راح اضيعها للابد
زوجة الحجي..واني على وعدي الك فلوس وازوجك بنتي
لؤي..اي عمه انتي تامرين يرجع لزهور
ها كومي
زهور..اتصل بالحجي اريد اسمع صوته واتاكد
لؤي ..ولج كومي لاتشوفنا الحجيه وتفشل الخطه خلي اخلصج هسه تدخل عليج تحركج وتكول حركت نفسها من يسئل عنك
زهور..اني بشاربك بس اتصل بالحجي عفيه
لؤي ..ولج كومي ويجرها بقوه تريد تعيط من الضرب والجوع مباقي صوت والمن تستنجد وبيمن
...
نرجع لعادل ورهف
عادل..ها رهف كملتي كلشي
رهف..اي حبيبي وانت كوم بدل يلا
عادل..اي عيني دقايق اجيك السياره وابدل
رهف..شنو راح نروح بالسياره مو بالطياره
عادل..بالطياره لازم احجز قبل يوم على الاقل واذا ناجر سياره لازم نروح للكراج سيارتي مابيها شي وتوصلنا
رهف ..اي همزين لعد بسيارتنا اتحرك براحتي بس اني وحبيبتي
عادل ..يلا بدلي ورتبي الاوراق وهوياتنا بجنطه وعندي فلوس بالكنتور طلعي منهن مصرف النا للطريق والباقي ناخذهن نضمهن يم ابوج
رهف ..صار حبيبي تدلل
....
للحديث تتمه
احب اسمع ارائكم ماحس اكو تفاعل
#امجد