اغتيال مشاعر

البارت الثامن

تفز زهور خايفه يدخل الحجي ويا مره جبيره ياشر على زهور يلا شوفي شغلك
زهور..عفيه خاله لاتاذيني لاتوكعين الطفل ماريد حجي طلكني واني اربي الطفل
القابله..لاتخافين هاي حبايه تاخذيها يوكع وعندي ابره
زهور..لاخاله ليش هيج ماريد اقتله هذا جريمه حجي ابوس ايدك خليه
الحجي..يلا يلا كافي لغوه يصيح ويا القابله مره يجتفون زهور ويضربوها ابره
زهور..مجرمين الله لاينطيكم طلكني مابقى يمك بعد
الحجي..هاي كطنه وطلعيها من اذنك طلاك ماطلك سمعتي ويضربها راشدي يغمى على زهور
...
بعد فتره تصحى زهور على الم بطنها قوي ونزيف حاد القابله موجوده تبتسم بده يوكع الطفل تفقد الوعي زهور تصحى هي بغرفه بعياده واكع الطفل نهائي وموكفين النزيف بعد هاي الحادثه تبده تكره الحجي كلش تتعلم الصلاة وتتحجب وتبده تدعي الله يوميه يخلصها من الحجي بس كل مده تشوف الحلم نفسه الطير الاسود يخطفها وتطير عالي وقلبها ينخطف من الخوف بالجو ويشمرها وتكعد مفزوعه تمر سنه على زواجها من الحجي تنشغل بالدوام والحجي من يزورها تحس يغتصبها بيوم هي بالدوام وتباوع للاطفال بالروضه وتبجي على ابنها الي فقدته تتخيل تشوفه ويكبر وتلعب وياه وتعلمه وتبجي بقوه تجي المديره تشوفها
المديره..شبيج زهور ليش تبجين
زهور..ها مابيا شي تخاف تحجي تخاف من الحجي بس ماعدها احد بالدنيا يسمعها
المديره..تحضنها احجيلي بنتي اني مثل امك
زهور..تحضنها بقوه للمديره ويزيد بجيها
المديره..بنتي والله كسرتي كلبي احجيلي اني مثل امج
زهور..ماكدر ست وتبجي
المديره..ميخالف بنتي براحتك ربي يفك كربتك
يجي اتصال للمديره من التربيه  راح يجون تفتيش للروضه
المديره ..يلا بنتي كومي غسلي جايين تفتيش من التربيه
زهور..صار ست تروح تغسل زهور جمالها رباني بدون مكياج حلوه وانيقه والحجاب زادها جمال
يجون التفتيش من ضمنهم لؤي لان متعين بواسطة عمه بالتفتيش لؤي بعده على حاله تثيره البنات ويحب يلعب وياهن ويتركهن يشوف زهور يبقى يباوع عليها هي تحاول تتلافى نضراته تنزل راسها
لؤي..حلوه الروضه ونضيفه
المديره ..نورت استاذ
لؤي..منوره بيكم ويباوع على زهور بنضرة شهوه
زهور..اترخص ست عندي حصه فنيه للاطفال
لؤي..اجي وياج خلي اشوف حصة الفنيه
زهور..براحتك استاذ تفضل تمشي ويمشي وراها لؤي ويباوع بنضرة ذئب لجسمها يتمنى يفترسها تلتفت زهور تخاف من نضرته تتاخر بالمشي حتى تصير بصفها وشويا شويا ترجع وراه وتاشرله على طريق الصف لحد ميوصلون يكعد هو على كرسي وهي تبده تعلم الاطفال على نشيد والاطفال يحبوها ويرددون وراها
لؤي..هاي خوش وصله بس وين شايفها اكيد شايفها بس لو اتذكر
...
نرجع لعادل ورهف بعد مرور سنه عادل تجاوز الازمه بس فقد ثقته بكل البنات رجع لعمله بس ماله واهس لكلشي رهف تتودد اله يخاف بعد يسلم كلبه لامراه وهم تتخلى عنه بداخله يتمنى يعرف السبب الي خلا زهور تختفي فجأه منه يرجع من شغله يلكه البيت مرتب واكله حاضر ملابسه مغسوله كلشي مكمله رهف وتاركتله رساله على الثلاجه بيوم تاخرت رهف بالتنضيف ودخلت تسبح بحمام عادل رجع عادل ميدري بيها كانت ناسيه باب الحمام مفتوح هو حب يسبح ويطلع يتغده دخل انصدمو بعض كانت عاريه
تغطت ولبست هو اتفاجا وطلع للحديقه عي غيرت ملابسها وتريد تطلع
عادل..رهف لحضه ممكن
رهف..تفضل عادل كول
عادل اني اسف والله مكنت اعرف موحوده
رهف..ليش صارلي سنه وياك حسيتي بيا لاتشيل هم انت ابن عمي وتسترني اذا تعريت
عادل.. اسف مره ثانيه بس انتي السبب الي خلاني ابتعد عنك انتي تخليتي عني واني جنت محتاجج
رهف..كنت مراهقه وهسه صحيت انت ابن عمي ودومك تخاف عليا وكلشي اطلبه تجيبه الي وكنت متخلي الاطفال تاذيني عادل اني احبك وحتى من تخرجت مفكرت اتعين اريد ابقى اخدمك
عادل..رهف اني لازم اكون وياج صريح اني بعدك مريت بعلاقه ويا زهور
رهف..ارجوك ااتكمل اعرف كلشي بابا حجالي عنك
عادل.. همزين تعرفين كلشي اني اليوم عندي كلام ويا عمي ان شاء الله
رهف..على شنو بس تبتسم بداخلها
عادل..راح تبقين هنا هذا بيتك
رهف..لاعادل اني ابقى اخدمك بعيوني لان انت ابن عمي
عادل..اني ماقبلها على نفسي  روحي وبالليل يصير خير
رهف..باي عادل
عادل..في حفظ الله
رهف تطلع مبتسمه وسعيده اخيرا راح ترجع لعادل مكانت تعرف هي تحبه الا بعد.تجربة لؤي
عادل يريد ينسى من شافها عاريه يتكرر المشهد يغمض يغير تفكيره يرجع يفكر برهف يحجي ويا نفسه هل رغبته برهف عطف لو حب لو شهوه ورهف هم تتخلى عنه مره ثانيه مثل الاولى لو تريد تتخلى كان مابقت تخدمه كان توظفت وعاشت حياتها
واكيد هوايه يتمنوها لان جميله ومتعلمه قرر يرجع يخطبها بس تبقى زهور حسره بكلبه يتمنى يعرف ليش اختفت فجأ
رهف ترجع فرحانه للبيت تفكر بعادل بس خجلانه لان شافها عاريه بالحمام تسئل نفسها فعلا تحب عادل لو لا وهي تفكر يرن موبايلها رقم عادل
رهف..الو هلو عادل
عادل..هلو رهف من يجي والدك ممكن تنطيني خبر
رهف..صار ابن عمي تدلل وتبتسم
عادل..رهف الانسان كلشي يتعرض باجر جايز اتعرض لحادث واتعوق هم تتخلين عني
رهف..عادل اول مره ارجوك لاتذكرني بيها جنت زعطوطه
عادل..لامحشومه بس الزواج مو لعبه بنت عمي هاي حياة وعائله
رهف..عادل اني هسه متاكده من حبي الك واريدك والا كان رحت قدمت تعيين وطلعت وطبيت بس الي صار بيني وبينك درس كان الي
عادل..اني بس حبيت اتاكد مو اكثر من يجي عمي انطيني خبر وكوليله عادل يريد يزورك
....
نرجع لزهور ولؤي والحجي  لؤي يريد يتذكر وين شايف زهور
لؤي..ست ممكن اسمك الكامل حتى اسجله بسجل الزيارات
زهور ..اي ليش لا سجل عندك زهور علي
لؤي..يبتسم تذكرت وين شايفك
زهور..خير يارب
لؤي..موكنتي مطربه انتي شجابج على التعليم والنوب بروضه واطفال صدك راح تعلميهم اناشيد
زهور..استاذ من فضلك اني معلمه وخريجة كلية فنون جميله مابيها شي اذا كنت اغني وهسه اعلم الاطفال
لؤي..اي صدك مابيها شي ويغمز تك عين
زهور... يستفزها اسلوب لؤي يلا يا اطفال اني رايحه للاداره انتهت حصة النشيد تمشي للاداره بعصبيه
لؤي..يلحكها للاداره يحجي ويا المديره ست حلوه الروضه خصوصا حصة ست زهور خبيره بالانشاد ماشاء الله
زهور..استاذ من فضلك لشنو تلمح
لؤي ..لا بالعكس اني امدح بتدريسك وتعليمك الاطفال النشيد
المديره..ست زهور صار شي
زهور..ست الاستاذ اتذكر كنت اعمل مطربه وهذا شي ماضي واني خريجة فنون جميله طبيعي اكون مطربه او  ممثله او تدريسيه
المديره..استاذ لؤي ست زهور صارلها من تعينت ويانا والحمدلله قمه بالاخلاق
لؤي..مكلت شي اني مدحت بتدريسها ويبتسم
ويا نفسه اؤف الا اصيدك
زهور..اترخص ست ارجع للصف
المديره ...روحي بنتي كملي حصصك
يخلص الدوام ترجع زهور للبيت يصير المسا يتصل بيها الحجي
زهور..الو
الحجي..هلو زهور اليوم جاي اني حضري نفسك
زهور..حجي اني بعد ماتحمل اعتقني ارجوك اني
تعبت وانت تريدني فقط لونستك ارجوك مشبعت مني
الحجي..الضاهر طولان لسانك ينرادله كص طلاك ماطلك سمعتي وجاي اليوم مراح اتونس اريد اكسر راسج
...
نترك زهور ومشاكلها ونرجع لعادل
رهف..الو عادل بابا اجه
عادل..دقايق ويمكم
يروح عادل لبيت عمه  ويلتقي عمه
عادل..عمو اليوم جايك بشغلتنا اني ورهف
ابو رهف..ابني انت وياها ولدي المهم اسئلها يصيح رهف تجي رهف بنتي عادل يريدك شنو رايك رهف تبتسم وتسكت بنتي موافقه على عادل احجي تهز راسها وتبتسم بصوت ناصي موافقه  ابني بالخير عليكم
عادل..عمو اني اريد اكمل خلال اسبوع هسه هي تخرجت واني بيتي كامل بس اشتري ذهب وملابس
ابو رهف..ابني هاي انت وبنت عمك لادخلوني بيناتكم اثنينكم ابنائي
عادل..تسلم عمو متقصر يشهد الله اعتبرك والدي
.....
للحديث تتمه
احب اسمع ارائكم ممكن
#امجد